شیخالاسلام مولانا عبدالحمید، ماں زاهدان ءِ نماز جمعه ءِ دیوان ءَ (17 بهمن 1404/ 6 فبروری 2026) گۆں اشاره به انقلاب ءِ چلءُهپتمی سالرۆچ ءَ وتی بژن ءَ شه آ رۆچانی وعدهانی پیلو نه بوگ چۆ عدالت ءِ اێر دارگ ءُ ملک ءِ آبادی ءَ درشاں کرت ءُ گوشت ئی که مردماں په «عدالت» ءُ «گهترێں زندگی» ءَ انقلاب کرت.
🔹ایران ءِ مردمانی انقلاب «راجی» ات؛ کسے قوم ءُ مذهب ءِ پد ءَ نه ات
په سنیآنلاین سرهال ءَ مولانا عبدالحمید درائێنت: ایران ءِ مردماں انقلاب ءِ زمان ءَ گۆں وت مهر ءُ مهبتَ داشت ءُ قوم ءُ مذهب ءُ دین ءَ نه چارت اش. ایران ءِ مردمانی انقلاب «راجی» ات که په وتی حق ءَ ءُ گهترێں زندگی ءَ انقلاب اش کرت.
🔹 ملک ءِ مشکلانی رۆتگ بنیادی کانود انت
زاهدان ءِ آدێنگ ءِ امام ءَ گوشت: وهدےکه خبرگان ءِ دیوان ءَ بنیادی کانود ءِ نبیسگ ءِ اراده ءَ کرت، مشکلاتے ماں کانود ءَ جۆڑ بوت. مولانا عبدالعزیز رحمهالله ءَ اێراد گپت که پچے اسلامی دین ءِ بدل ءَ یک هاسێں مذهبے په ملک ءَ گچێن کنگ بیت، چیا که اسلامی دین تیوگێں مسلمانانی دین انت چه شیعه به انت یا سنی. خبرگان ءِ دیوان ءَ دگه کانود هم په حکومت ءِ مانگ ءَ نبشت که نه ماں اسلام ءَ انت ءُ نه ماں میاناستمانی کانوداں.
واجه ءَ گێش کرت: ماں بنیادی کانود ءَ انچێن بند هست انت که ملک ءِ مرۆچی ئێں مشکلانی سوب انت. پمێشا ملک ءِ مشکلانی رۆتگ بنیادی کانود انت ءُ مدام گوشگ بوتگ که بنیادی کانود بائد بدل کنگ بیت.
🔹 انقلاب ءَ پد مذهبی ءُ قومی لێکه ملک ءِ ته ءَ غالب بوت
مولانا عبدالحمید وتی هبرانی دێمتر ءَ گوشت: انقلاب ءَ پد هوارێں سرکار ءِ جۆڑ کنگ ءِ بدل ءَ هما گلاں که انقلاب ءِ سۆبمندی ءَ کمک اش کرت ات، گلێنگ بوت انت ءُ مذهبی ءُ قومی لێکه ملک ءِ ته ءَ غالب بوت، وهدےکه الله ءِ وشنودی ءُ دین اسلام ءِ راه همێش ات که برزتر شه راج ءُ مذهب ءُ حتی دین ءَ بیت ءُ آ کمێں مردماں که دگه دینے دار انت دلگۆش بهانت ءُ بودیگانی کارگرگ ءَ ابید، پهکانی حقاں کمار بهانت.
واجه ءَ گوشت: کمکم ءَ تنکچمیاں گێشتر بوت انت ءُ گردی ءَ تنکتر اش کرت، هما زمان ءَ هم ڈاه دیگ بوت که دین اسلام ءِ گردی پراه انت ءُ جمهوری اسلامی هم که به دین اسلام ءَ لچتگ، بائد آئی گردی پراه ءُ شاهگان بیت. ڈاه دیگ بوت که اگاں تانسرپسنداں کارگرگ بهانت مشکل جۆڑ بیت، بائد کارانی دیگ ءِ درگت ءَ وس ءُ بود دلگۆش بیت.
🔹 «تنکچمیاں» ءُ «گرانێں گچێن کنگاں» پارلمان ءُ سرکار ءَ پادبند کرتگ
مولانا عبدالحمید گێش کرت: تنکچمی تاں اۆد ءَ رست که پارلمان ءَ هم پادبندء کرت ءُ گۆں گرانێں گچێن کنگ ءَ بودیگ ءُ وسیئێں مردماں شه پارلمان ءَ پشت کپت انت. سرکارانی آسر هم همےرنگ بوت، کارمستر ءُ وزیرانی گچێن کنگ بودشت ءُ وس ءِ رد ءَ نه بوت، بلکه سیادی ءُ رهوت ءُ دگه چیزانَ چار انت. مدام ڈاه دیگ بوتگ که تنکچمیاں ملک ءَ بنبستانی آماچ کن انت.
واجه ءَ درائێنت: اصلاحطلباں هم که په انقلاب ءِ سۆبێں بوگ ءَ جهد اش کرت ات، لۆٹاتاش که ملک ءَ اصلاح کن انت، بلے کارے نه کرت اش ءُ نه توانت اش که بدلی بیار انت. کمکم ءَ ملک ءِ جاور امنیتی بوت ءُ مذهبانَ انگت امنیتی اش کرت. پێسر ءِ مزنرهشۆن ءَ گوشت ات که سلاهبنداں نه بائد ملکاری ءُ مالزانشت ءِ ته ءَ هوار به انت، بلے آوان پتر ات انت ءُ ملکاری ءُ مالزانشت ءَ وتی دست ءَ گپت اش، وهدےکه سیاستزانتاں بائد سیاست ءِ ٹهێنگ ءَ کن انت نه سلاهبنداں، آوان دگه راهے دار انت که ملک ءِ ایمنی ءِ واگ آوانی اگده انت.
واجه ءَ ٹکاٹک گوشت: مذهبان اش هم امنیتی کرت ءُ ماں لهتے مزنمێتگاں نمازجاهان اش بند کرت یا واهندی اش کرت. رۆتاک ءُ تاکبنداں هم امنیتی بوت انت. سیاست ءَ هم امنیتی اش کرت ءُ باز براں شکایت بوتگ که مردمانی زندگی ءِ ته ءَ پتر انت.
🔹 دیماه ءِ پێشامد سک دلبرێجۆک ات/ هچ میانهرۆئێں عالمے اے کشتاراں روا نه زانت
زاهدان ءِ آدێنگ ءِ گشتانکار ءَ درشان کرت: بوتگێں پێشامد سک دلبرێجۆک ات، درێگے پێش مهیاتێں. نون که کمکم ءَ گواچن پدر به انت سک دل ءَ رێش کنت. مردم ءِ دل کپَ بیت وهدےکه کشگ بوتگێں مردمانی کهولانی آه ءُ نالگاں اشکنت. من گمان نه کن آں که میانهرۆئێں عالم چۆشێں کشتاراں روا زانت ءُ من سدک آں که هچ کسے نه توانت الله ءِ دێما پرے رێتگێں هۆناں نیمۆنے پێش کنت.
🔹هچ کارمستر ءُ سیاستزانتے نه بائد ماں یک راهے وتی پاد ءَ مرّ کنت
مولانا عبدالحمید گێش کرت: هچ کارمستر ءُ سیاستزانتے نه بائد راه ءُ رهبندے ءِ سر ءَ پاد ءَ مٹ دنت. هچ مردمے شه ردی ءَ پاک نه انت؛ وختے کسے ردی ئے کنت بائد شه آ ردی ءَ برگرد ایت. پهکێں مردمانَ شۆر پکار انت. کسے که وت ءَ وتبود ءُ شه شۆر ءَ بےنیاز زانت، آ ٹوهترێں ردی ءَ کنت. بائد انت گۆں جنێں ءُ مردێں ءُ ورنا ءُ دیدانک ءِ واهنداں شۆر ءُ سلاه بیت.
واجه ءَ گێش کرت: اے ٹوهێں ردی ئے که حاکم بس گۆں سنگت ءُ دۆزواهاں شۆر کنت؛ بلکه بائد گۆں شرگدار ءُ مخالفاں هم شۆر بیت، اگاں شرگدارانی گپاں اشکنگ بوتێن انت، اے پێشامداں جۆڑ نه بوت انت.
🔹 ایران ءِ ته ءِ جێڑهاں اے لشکرگری ءِ سوب انت/ گێشتری مردم ناوشنود انت
زاهدان ءِ آدێنگ ءِ امام ءَ درائێنت: نون ایران شه چنکه نێمگ ءَ انگِرّ انت. اگں اے جێڑهاں ایران ءِ مردمانی میان ءَ مه بوتێن انت اے لشکرگریَ نه بوت. اے لشکرگری ءِ سوب ملک ءِ ته ءِ جێڑه انت.
واجه ءَ گێش کرت: من مدام ڈاه داتگ که گۆں مردماں نند ات ءُ هبران اش گۆش دار ات ءُ مردمانی سۆبانی پکر ءَ به ات. انون ایران ءِ گێشتری مردم ناوشنود ءُ مشکلانی آماچ انت که په آسانی جۆڑ نه به انت. پچے آ سکیاں که بۆجگ اش آسان ات دلگۆش نه بوت انت که نونێں گرانێں جاور پێش آت؟!
🔹 اسلامی دین گۆں ترندی ءُ هۆنرێچی ءَ چپ انت/ اگاں اعتدال ءِ راه ءَ تچان بوتێں ءُ «عدالت» ءُ «آزاتی» اێر دارگ بوتێن انت، نونێں مشکل جۆڑ نه بوت انت
مولانا عبدالحمید گۆں اشاره به مکه ءِ فتح ءَ ءُ پیامبر صلیاللهعلیهوسلم ءِ درگوز کنگ ءَ شه دشمنان گوشت: اسلام اعتدال ءُ میانه ئێں دینے ءُ گۆں ترندی ءُ هۆنرێچی ءَ چپ انت. منی کلۆ په همملکیاں اێش انت که شه دین ءَ بدبین مه به ات، دین هما انت که پیغبمر صلیاللهعلیهوسلم ءُ صحابه ءُ اهلبیتاں داشتگ. دریگے مردمان زانتێں که اسلام ءِ ته ءَ چنکه رحم ءُ نرمی هست.
واجه ءَ درائێنت: اگاں ملک اسلام ءُ اعتدال ءِ راه ءِ سر ءَ بوتێں اے سکیاں هچبر پێش نه یات انت. اگاں عدالت ءُ آ وعدهاں که انقلاب ءِ اول ءَ دیگ بوت ات انت، اێر دارگ بوتێن انت، مرۆچی ملک اے گپچلانی آماچ نه ات. انقلاب ءِ اول ءَ هبر شه آبادی ءُ انچائێن آپ ءُ لین/برق ءَ ات.
🔹 هلوچگری ماں استان ءَ باز بوتگ؛ اے بنگپ راست «شورای تأمین» ءِ اگده انت
مولانا عبدالحمید وتی هبرانی گڈسر ءَ گۆں ترندێں شرگداری شه هلوچگری ءَ گوشت: بژن انت که هلوچگری ماں استان ءُ هاسکار زاهدان ءَ باز بوتگ. زهگ، ورنا ءُ پیرێناں پلگ به انت ءُ ٹوهێں زر شه آوانی کهولاں لۆٹگ بیت. شه لهتے مردماں که برگ بوتگ انت هچ هالے نێست. بهمانگ اێں که پچے جاور اےرنگ انت؟
واجه ءَ گوشت: مارشتَ بیت که آ کارمستراں که اگده اش امنیت ءِ پجائێنگ انت، وتی اگده ءِ رد ءَ کرد اش نه کرتگ. شورای تأمین ءِ اگده مردمانی امنیت انت ءُ بائد شهر ءُ استان ءِ امنیت ءَ جۆڑ کنت، مردم هم بائد همکاری کن انت، بلێں راست ءُ بنی اگده کارمستر ءُ استان ءِ شورای تأمین ئے انت.