قاری عبدالرحمان؛ شه اهل‌سنت ءِ نام‌پرشتێں قاریاں وفات کرت

قاری عبدالرحمان، شه ملک ءِ زبردست ءُ نامءُتواری ئێں پاک‌واناں چارشمبی ءِ تهار ی ءِ مانشانگ ءَ (۵ آذرماه ۱۴۰۴) ناجۆڑی ءِ سوب ءَ ماں ۹۳ سالگی ءَ کۆڑَهێں دنیا ءَ یله دات.

په سنی‌آنلاین ءِ سرهال ءَ قاری عبدالرحمان رحمه‌الله ءَ گێش شه نێم قرن شه وتی عمر ءَ را  ماں سیستان ءُ بلوچستان ءِ دینی وانگجاهاں په قرآن ءِ قرائت ءِ هێل دیگ ءَ کارمرز کرت. همێشی سوب ءَ بازێنے شه سیستان ءُ بلوچستان ءُ آدگه استان ءُ همےرنگ همسایگێں ملکانی پاک‌وان ءُ قرآنی وانێنۆکاں آئی شاگرد انت.

◼️هدامرزی قاری عبدالرحمان رحمه‌الله ءِ نماز جنازه مرۆچی پنچ‌شمبی ءَ (۶ آذر ۱۴۰۴) ادار ۱۲:۱۵ ءَ پێشین ءِ نماز ءَ پد ماں زاهدان ءِ مکیء مزن مسیت ءَ وانگ بیت.

◼️قاری عبدالرحمان ماں سال 1311 ءَ ماں نصرت‌آباد ءَ، شه زاهدان ءِ هند ءِ هلکاں ودی بوت. هما گونڈی ءَ شه ماس ءِ پرمهرێں ساهگ ءَ زبهر بوت ءُ وهدےکه ورنا بوت آئی پس هم بێران بوت.

◼️هدامرزی ءَ وانگ ءَ ماں زاهدان ءَ بنگێج کرت ءُ دێمتر ءَ په وانگ ءَ رۆدراتی بلوچستان، کوئٹه ءَ شت ءُ ماں «تجویدالقرآن»ء دینی وانگجاه ءَ شه زبردستێں استاداں چۆ قاری نورمحمد، قاری غلام‌نبی، قاری سید عبدالستارشاه ءُ قاری اسماعیل پنجابی ءَ بهر زورت ءُ زانتء کٹ ات. قاری عبدالرحمان ءَ یک سال قاری نورمحمد ءِ دێم ءَ قرائت وانت ءُ آدگه سال ءَ قاری غلام‌نبی رحمه‌الله ءِ دێم ءَ روایت حفص ءُ ده ئێں قرائتانی وانت ءُ گڑا ماں هما وانگجاه ءَ استاد بوت ءُ هم پنچ‌وهد ءِ نمازاں امامت ء کرت.

◼️هدامرزی قاری عبدالرحمان وهدے که ایران ءَ برگشت چنکه سال ماں زاهدان ءِ «فاروقیه»ء دینی وانگجاه ءَ ءُ همےرنگ گڈی سالاں ماں دارالعلوم زاهدان ءَ گۆں قرائت ءُ تجوید ءِ وانێنگ ءَ گلائێش بوت.