شیخالاسلام مولانا عبدالحمید، ماں زاهدان ءِ نمازجمعه ءِ دیوان ءَ (16 آبان 1404/ 7 نومبر 2025) گۆں اشاره به ملک ءِ هر رۆچێں مشکل ءُ گپچلانی گێشی ءَ ءُ اے که ته ءِ ءُ ڈن ءِ سیاستاں بائد مردمانی سۆبانی رد ءَ ردءُبند به انت، شه کارمستراں لۆٹ ات که ماں نونێں جاور ءَ اێشی بدل ءَ که یک هبر ءِ سر ءَ وس کن انت، په دێمداری شه جنگ ءُ بندشاں سیاستانَ ٹگلێن انت ءُ شه وتی هبر ءَ جهل بیا انت.
🔹گرانی ءُ تورم ملک ءِ ته ءَ سک باز انت
په سنیآنلاین ءِ سرهال ءَ مولانا عبدالحمید درشان کرت: اے رۆچاں گرانی ملک ءِ ته ءَ سک باز بوتگ ءُ زر هررۆچ بےارزشتَ بیت ءُ مچێن پاٹیاں مشکل ءِ آماچ انت. پهکێں مردماں په سکی زندگی ءَ گوازێن انت، وانێنۆک ءُ کارنشت ءُ پوریاگر ءُ حتا جمهوری کماشی اداره ءُ وزارتجاهانی کارمندانی ماجب په آوانی زندگی ءَ بسَ نه کنت، پچےکه ملک ءِ زر ءِ ارزشت هررۆچ کم بیان انت ءُ ساماناں هررۆچ گرانَ به انت.
🔹فقر ءُ ناداری ءَ مردمانی دین ءُ دنیا ءَ تاوان رسێنتگ
واجه ءَ ناداری ءَ را شه دزی ءُ ناامنیانی بنی سوباں زانت ءُ گوشت ئی: دزی ءُ ناامنی ماں چاگرد ءَ باز بوتگ که بنی سوب اش ناداری انت. ناداری ءَ مردمانی دین ءُ دنیا ءَ تاوان رسێنتگ. وهدےکه لاپ گشنگ بیت بازێں مردمے نه توانت اۆپار کنت ءُ گناه ءُ فساد ءِ آماچ ءُ شه دین ءَ ناامێت بیت.
واجه ءَ گێش کرت: بژن انت که ایران ءِ مردمانی دین ءُ دنیا ءَ تاوان دیستگ. مشکل ءُ زندگی ءِ سکیانی سوب ءَ مردماں شه دین ءَ دور بوتگ انت. ماں چۆشێں جاور ءَ پهکانی اگده گرانَ بیت. بائد پهکاں کۆشست کن انت که ماں چاگرد ءَ دزی ءُ راهزنی مه بیت ءُ مردماں سۆگه کن اێں که اے سکیاں آزمود انت ءُ آوانی سوب «دین» نه انت، بلکه آوانی سوب ردێں کارمستری انت، پمێشا الله ءِ دین ءَ یله مه کن ات ءُ الله ءُ آیی رسول ءَ شه وت ناوشنود مه کن ات.
🔹راهزنی، دزی ءُ هلوچگری په هر نیمۆنے که بیت «حرام» ءُ «ٹوهێن جنایتے» انت
مولانا عبدالحمید وتی هبرانی دێمتر ءَ وتی بژن ءُ دلگرانی ءَ شه «کۆش، دزی ءُ هلوچگری ءِ گێش بوگ ءَ» په ترندی درشان کرت ءُ گوشت ئی: ارمان انت که هالَ رس ایت که انچێں پاٹی جۆڑ بوتگ که مردمانَ په وام ءِ گرگ ءَ یا باج ءِ لۆٹگ ءَ هلوچ کن انت. هلوچگری په هر نیمۆنے که بیت، چه په وام ءَ یا باج ءِ گرگ ءَ حرام انت ءُ اگاں په باج ءِ گرگ ءَ بیت حرمت ئی چنکه برۆبر گێشتر انت.
واجه ءَ ٹکاٹک گوشت: هلوچگری مردم ءِ شرپ ءُ آبرو ءِ پادمالی انت. مردمانی بندیگ کنگ په وام ءِ گرگ ءَ سرکار ءِ اگده انت. ما نه توان اێں په وتی وام ءِ گرگ ءَ کسے را بندیگ کن اێں. نون یک رسمے جۆڑ بوتگ که مسیت ءِ راه ءِ سر ءَ اۆشت انت ءُ وهدے که آ شه مسیت ءَ در بوت آیرا هلوچ کن انت ءُ بر انت؛ اے سک بدێں رسمے.
زاهدان ءِ آدێنگ ءِ امام ءَ درشان کرت: زاهزنی ءُ دزی هر رنگ ءُ نیمۆنے که بیت شریعت ءِ رد ءَ گناه ءُ باز ٹوهێں جنایتے. باز بد انت که مردم شه الله ءَ روزی مه لۆٹ ایت ءُ راهبندی ءُ دزی کنت ءُ مردمانی گسانی سر ءَ بێڑ بارت ءُ مسیت ءِ راه ءَ مردماں هلوچ کنت.
🔹آ که ملک ءِ سرۆک انت، آئی اگده شه پهکان گرانتر انت/ زهرشانی کنۆکانی بندیگ کنگ ردێں کارے
مولانا عبدالحمید دێمتر ءَ گۆں استناد به حدیث «کلکم راع و کلکم مسئول عن رعیته»، حکومت ءِ اگده ءِ بابت ءَ کڈن کرت ءُ گوشت ئی: حکومت ءِ اگده، هاسکار هما که ملک ءِ سرۆک انت، باز گران انت ءُ آوان که جاگهاش جهلتر انت، اگدهاش هم کم تر انت.
واجه ءَ گوشت: حکومت ءِ اگده وڑوڑێں پاٹیانی بابت ءَ که هررۆچ کوکار ءُ زهرشانیَ کن انت که ماجباش کم انت، چنکه برۆبر انت. نه بائد آوانَ بندیگ کن ات. وانێنۆک ءُ آدگه پاٹیانی بندیگ کنگ که اێراد دار انت ردێں کردے. کانود ءِ رد ءَ آوانی حق انت که زهرشانی کن انت ءُ بائد مشکل ءُ لۆٹاں اش رندگیری به انت.
🔹«بندش» شه «جنگ» ءَ باز بدتر انت
زاهدان ءِ آدێنگ ءِ امام ءَ بندش ءُ جنگ ءَ دو مزنێں پاترپ په ملک ءَ زانت ءُ گوشت ئی: مرۆچی ملک گۆں دو جنگ ءَ دێمپهدێم انت؛ یکے سلاهی جنگ ءُ دومی بندش ءِ جنگ. بلێں بندش ءِ جنگ شه سلاهی جنگ ءَ بدتر انت.
واجه ءَ کڈن کرت: پچے دشمن مدام بیهار دنت که ملک ءِ مالزانشتی بنجاه یا کارمسترانَ جنت؟ اگاں کارمستراں ملک ءِ جاور ءَ دلگۆش کن انت ءُ سیاستاں بدل کن انت، اے هم ایران ءُ استمان ءِ سۆب ءَ انت ءُ هم په ملک ءِ سیمسر ءُ یکویی ءِ پهازگ ءَ زبر انت.
🔹ماں اے آزگسمائێں جاور ءَ سیمسراں پچ به انت ءُ تاوان دیستگێں مردمانی کٹءُکارانی دێم گرگ مه بیت
مولانا عبدالحمید ماں دگه بهرے شه وتی هبراں گوشت: الحمدلله استان ءِ کارمستری دمگی انت ءُ اێشی جوانیان شه سُستیانی گێشتر انت. همےرنگ چهبار ءِ آزاتێں ڈیه ءِ اگده دمگی مردماں دیگ بوتگ ءُ آوان هم جوانێن گامگێج زۆرتگ.
واجه ءَ درائێنت: ماں اے آزگسمائێں جاور ءَ بائد انت سیمسراں پچ به انت ءُ تاوان دیستگێں مردمانی کٹءُکارانی دێم گرگ مه بیت. ما را امێت انت که دمگی کارگساں ماں سیستان ءِ آزاتێں ڈیه ءَ که نۆک ءَ جۆڑ بوتگ ءُ اۆدا کار په مردماں آسانتر انت، زرکاری کن انت.
واجه ءَ همےرنگ گوشت: بائد ماں زاهدان، سیستان ءُ دگه ادارهاں شه پهکێں راج ءُ مذهبان برۆبر کارگرگ بیت ءُ ادارهاں هاس یک راج ءُ پاٹی ءِ مه به انت، پچےکه اے په ڈیه ءِ دێمریی ءَ هژدری انت.
🔹سیستان ءِ بلوچاں گلگ دار انت که ماں آ ڈیه ءِ کارمستری ءَ شه آوان کارگرگ نه بوتگ؛ استان ءِ کارمستری «عدالت» ءَ ماں سیستان ءَ کمار کنت
واجه ءَ گێش کرت: سیستان ءِ بلوچاں گلگ دار انت که شه آوانی بودیگاں ماں آ دێه ءِ کارمستری ءَ کارگرگ نه بوتگ. اے ظلمے که شه گوست ءَ روان انت. شه استاندار ءُ استان ءِ کارمستری ءَ همے امێت دار اێں که عدالت ءَ ماں سیستان ءَ کمار کن انت. ما پهکان شه بلوچ ءُ زابلی ءُ بیرجندی ءُ کرمانی ءُ آدگه مردماں براس ءُ سیاد اێں ءُ گۆں وت زند گوازێن اێں.
واجه ءَ همےرنگ زاهدان ءِ علوم پزشکی شهدربرجاه ءِ باروا گوشت که مردماں گلگ دار انت که پچے آئی کارمستراں بس شه یک پاٹی ءِ انت ءُ اے په استان ءِ سۆب ءَ نه انت. ما شه جانسلامتی ءِ وزیر ءَ لۆٹ اێں که اے بنگپ ءَ دلگۆش کنت.
🔹کارمستراں ملک ءِ ته ءِ مشکوکێں کۆشاں پٹءُپۆل کن انت
مولانا عبدالحمید وتی هبرانی گڈسر ءَ گۆں اشاره به مشکوکێں کۆشاں گوشت: اے زوتاں مشکوکێں کۆش ملک ءِ ته ءَ بوگ ءَ انت. یک لاشے په نام «امید سرلک» ماں ماشینے ودی بوتگ ءُ ماں ایرانشهر ءَ هم یک اسپےریش ءُ کماشے جنگ بوت. اے کۆشاں مشکوک انت ءُ مردمانی جانانی پهازگ کارمسترانی اگده انت ءُ بائد شه چۆشێں کۆشاں دێمدرای کن انت.
واجه ءَ کڈن کرت: کارمستراں بائد انت اے کۆشاں پٹءُپۆل کن انت که مبادا «آتش به اختیار» ءُ وتسرێں مردماں که لهتے ادارهانی ته ءَ انت، چۆشێں کارے کن انت. کۆشکاراں دزگر ءُ سزا دیگ به انت.