شیخالاسلام مولانا عبدالحمید، ماں زاهدان ءِ نمازجمعه ءِ دیوان ءَ (9 آبان 1404/ 31 اکتوبر 2025) وتی بژن ءَ شه گپچلانی گێشی ءَ ملک ءِ ته ءَ درشان کرت ءُ کارمستری گپچل ءَ اے چیز ءِ بنی سوب زانت ءُ کڈن ئی کرت که په ملک ءُ مردمانی رکێنگ ءَ شه اے جاور ءَ بائد انت جوانێں توجیلے درگێجگ بیت.
🔹هررۆچ ملک ءِ ته ءَ نۆکێں گپچلے درا بیت
په سنیآنلاین ءِ سرهال ءَ مولانا عبدالحمید درشان کرت: ملک ءِ ته ءَ وڑوڑێں گپچل هست ءُ هررۆچ نۆکێں گپچل درا بیت که همے چیز رنگ رنگێں پاٹی ءُ استمان ءِ دلگرانی ءُ پرێشانی ءِ سوب بوتگ که آواں ملک ءِ بنی واهند انت.
واجه ءَ گێش کرت: ایران بازێں پتانسیل ءُ دادانی واهند انت که اگاں په جوانی کارمرز بوتێن انت نه تهنا ایران ءِ مردماں بلکه یک بهرے شه دگه ملکانی مردماں هم شه اے داداں سێرَ بوت انت.
🔹ملک ءِ گپچلانی بنی سوب سستێن کارمستری انت
زاهدان ءِ آدێنگ ءِ امام ءَ گوشت: شه یک نێمگ ءَ بندشاں ملک ءُ مردمانی سر ءَ زۆر آورتگ ءُ شه دگه نێمگ ءَ ملک، ته ءِ ءُ ڈن ءِ سیاستانی ته ءَ ءُ همےرنگ مالزانشت، هێلکاری، جانسلامتی، آپ، رۆزگاری جاور ءُ آپبنداں ءُ دگه پڑاں گپچلانی آماچ انت.
واجه ءَ ٹکاٹک گوشت: اے مچێں گپچلانی بنی سوب سستێن کارمستری انت. مرۆچی چۆناهی ءَ ملک مالزانشتی گپچل ءِ آماچ نه انت، بلکه کارمستری گپچل ءِ آماچ انت.
مولانا عبدالحمید درائێنت: وهدےکه ملک ءِ کارمستری سست بیت یا چنکه جاگه په کارمستری ءُ گیشءُگیوار ءَ بیت ءُ ملکی سۆباں نادلگۆش به انت ءُ بودیگاں کارگرگ مه به انت، بلکه بودیگانی کارگرگ ءُ کانود ءِ اێردارگ ءِ بدل ءَ رهوت ءُ سیادی اێردارگ بیت ءُ آوان که زۆر ءِ واهند انت کانود ءَ نادلگۆش کن انت ءُ بازێں دستے ملک ءِ مالزانشت ءُ مڈیانی ته ءَ هوار بیت ءُ ملک ءِ مڈیاں هماوانی دست ءَ به انت، گڑا ملک ءِ ته ءَ گپچل ءُ جنجال جۆڑ بیت ءُ ملک ءِ کارمستری تاوانَ گند ایت. لهتے مردم انت که زۆر اش شه ادارهاں هم گێشتر انت ءُ هرکارے که دل اش لۆٹ ایت، کن انت.
🔹بائد په ملک ءُ مردمانی رکێنگ ءَ شه اے مشکلاں پهدلێں توجیلے درگێجگ بیت
مولانا عبدالحمید وتی هبرانی دێمتر ءَ گوشت: گۆں اے ملک ءِ گپچلاں بائد کارمستر، مردم، زانشتجاهی ءُ مچێں مردم که هبر اش گۆش دارگ بیت، په ملک ءِ رکێنگ شه اے گپچلاں پهدلێں توجیلے درگێج انت. اے گپچلانی نادلگۆش کنگ بےپۆک انت. بائد انت په مردمانی رکێنگ ءَ شه اے گپچلاں رۆشنائێں آیۆکے نشان دےات.
واجه ءَ کڈن کرت: همپکری پهکار انت. گوستگێں کتهکاریاں نشان داتگ که اگاں سیاست ءُ گێشءُگیواراں په پکر مه به انت، ناتپاکی ءُ جتایی ءِ سوبَ به انت.
🔹هر حکومت ءُ سرکار ءِ بُندار عدالت انت
زاهدان ءِ آدێنگ ءِ امام ءَ وتی هبرانی گڈسر ءَ درائێنت: عدالت هر حکومت ءُ سرکار ءِ بندار انت، هاسکار آ حکومتاں که وت ءَ به اسلام ءَ لچێن انت. بائد ماں تیوگێں مسائلاں چۆ سیاسی، مالزانشتی ءُ چاگردی ءَ پهکێن مردمانی میان ءَ عدالت ءَ اێر دار انت.
واجه ءَ گێش کرت: مئے ملک ءِ ته ءَ جنێنانی کساس شه آباتی ءِ نێم ءَ گێشتر انت؛ بائد انت حق ءُ حرمت اش کمار بیت. همےرنگ راج ءُ رنگرنگ ءِ مذهب ملک ءِ ته ءَ زندَ گوازێن انت، بائد اے حکومت ءِ ساهگ ءِ چێر ءَ که وت ءَ اسلامیَ زانت، حق اش کمار به انت.
مولانا عبدالحمید کڈن کرت: تهنا «اسلام» ءِ نام ءِ دارگ پهرءُشان نه انت، بلکه اسلام ءِ رد ءَ کرد کنگ پهرءُشان انت. منی سۆگه په آوان که وتی حکومتانی نام ءَ «اسلامی» اش کرتگ یا لۆٹ انت کن انت، همێش انت که پێسر شه هر چیز ءَ په «عدالت» ءَ پکر کن انت؛ اگاں عدالت ءُ آمید مه بیت، گڑا هچ پایدگے نێست. الله پاک ءَ مچانَ هاسکار حاکمانَ پرمان داتگ که پهکێن استمان شه منّۆک ءُ نه منّۆکاں یک رنگ ءُ گۆں یک چم ءَ چار انت.