شیخالاسلام مولانا عبدالحمید، ماں زاهدان ءِ نمازجمعه ءِ دیوان ءَ (1 فروردین 1404/ 21 مارچ 2025) میانرۆدرات ءِ جاور ءَ «سک نگێگ» زانت ءُ اے جاور ءِ توجیل ءَ «ترانکاری» ءُ «عادلانه ئێں گێشءُگیواری» زانت. زاهدان ءِ آدێنگ ءِ امام ءَ همےرنگ ملک ءِ کارمستران ءَ په «تچک ءُ بےمیانجی ئێں ترانکاری گۆں امریکا» ءَ سۆگه کرت ءُ اێشرا «گهترێں توجیل په ملک ءِ نونێں جاور» ءَ زانت.
🔹میانرۆدرات ءِ جاور سک نگێگ انت؛ پهکان بائد راه ءُ توجیلے پرے جاور ءَ درگێج انت
په سنیآنلاین ءِ سرهال ءَ مولانا عبدالحمید درشان کرت: اے رۆچاں میانرۆدرات که دنیا ءِ تێل، انرژی ءُ باپاری ءِ بنجاه انت، جاور ئی سک نگێگ انت ءُ گۆں فوجی جوڑشت ءُ اُرشاں دێم په دێم انت ءُ دمگ ٹوهێں جنگ ءِ ھترہ ءِ آماچ انت.
واجه ءَ گێش کرت: ماں اے جاور ءَ میاناستمانی هۆربند ءُ امنیت ءِ شورجاه ءُ مزنێں سرکاراں ترانکاری ءُ عادلانه ئێں سُهل ءُ انچێں توجیل ءِ پکر ءَ به انت که دمگ ءَ شه اے جاور ءَ رکێن ایت ءُ جنگ ءِ هتره ءَ دور کنت ءُ تیوگێں ملکاں تاهیر ءَ رس انت. اگں جنگ ءِ هتره مه بیت گڑا سلاهی رقابت هم که شه اے رۆچانی مهمێں بنگپان انت، زورگ بیت.
🔹دنیا ءِ تیوگێں چێڑهانی رۆتگ اسرائیل ءُ فلسطین ءِ جێڑه انت؛ گهترێں توجیل سراسری ئێں فیصله ءُ عادلانه ئێں گیشءُگیوار انت
زاهدان ءِ آدێنگ ءِ امام ءَ گوشت: گهترێں توجیل، یک جوانێں فیصله ئے انت که هم فلسطین ءُ اسرائیل ءِ جێڑه ءُ هم دمگ ءِ آدگه جێڑهانَ جۆڑ کنت. البت اول ءَ بائد فلسطین ءِ بنگپ ءِ فیصله بیت.
واجه ءَ گێش کرت: اسرائیل ءُ فلسطین ءِ جێڑه یک بنداری جێڑه ئے که دمگ ءِ تیوگێں جێڑهانی سوب انت. من سالاں پێش ءَ گوشت که بیمکاری ءِ رۆتگ ءُ دگه بنگپانی سوب که امریکا ءُ لهتے دگه ملکاں داشتگ همے جێڑه ءُ ظلم ءُ بےعدالتی ئے که ماں فلسطین ءِ سرڈگار ءَ هست انت.
🔹بیت کنت «فلسطین ءِ جیڑہ» ءُ « جوهری بنگپاں» ءُ «نیابتی واکانی بنگپ» ماں یک دیوانے گیشءُگیوار به انت؛ اے گپءُتران ءِ آسر برد ـ بردَ بیت
مولانا عبدالحمید گوشت: تیوگێں جێڑهاں چۆں فلسطین ءِ جێڑه، جوهری ءُ نیابتی واکانی بنگپاں گۆں وت همگرنچ انت ءُ بیت کنت آوان ماں یک دیوانے گیشءُگیوار کن انت. اے رنگ ءَ گیشءُگوار آسانَ بیت ءُ آسر هم برد ـ برد بیت، پچےکه میانرۆدرات امنَ بیت.
واجه ءَ گێش کرت: ناامنی ماں میانرۆدرات ءَ تیوگێں دنیا ءَ ناامن کنت. پمێشا بائد انت ناامنی ءِ رۆتگ ءَ سند ات که اے کار گۆں جنگ ءُ بێڑ ءُ مردمانی زندگی ءِ بێران کنگ ءَ نه بیت، بلکه گهترێں راه ترانکاری ءُ عادلانه ئێں گیشءُگیوار انت.
🔹په یک مردمے ءِ ترۆندێں هبر ءَ زهر مه به ات ءُ ترانکاری ءَ یله مه کن ات
زاهدان ءِ آدێنگ ءِ امام ءَ گوشت: منی سۆگه په ملک ءِ کارمستراں همێش انت که په یک مردمے ءِ ترۆندێں هبر ءُ ترپان ءَ زهر مه به انت ءُ ترانکاری ءَ یله مه کن انت. ترانکاری ءِ جند جوانێں چیزے. ترانکاری ءِ بزانت همێش انت که هردو پاٹی وتی هبراں گوَش انت.
واجه ءَ ٹکاٹک گوشت: منی سۆگه همێش انت که په ترانکاری ءَ دگه ملکے را وتی جهگیر مه کن ات، بلکه وت سیدّه ترانکاری کن ات. چه مشکلے هست که ایران ءِ جمهوری کماش گۆں امریکا ءِ جمهوری کماش ءَ دێم په دێم گپ ءُ تران کنت؟! مئے جمهوری کماش ماں دێم په دێمی ئێں گپ ءُ تران ءَ گهترَ توانت وتی منانکاں پێش کنت ءُ وتی دیدانک ءَ به منّێن ایت.
🔹استمان شه «اۆگام ءُ جذباتی هبراں» دلسرد بوتگ
زاهدان ءِ آدێنگ ءِ امام ءَ سک سۆگه کرت: من اے ملک ءِ یک نندۆکے آں که ابید شه دلسۆچی ءُ خیرلۆٹی ءَ دگه هچ مولءُمرادے نه دار آں، ترانکاری ءَ په ملک ءُ استمان ءِ خیر ءُ صلاح ءَ زان آں. فلسطین ءِ جێڑه هم گۆں ترانکاری ءَ گیشءُگیوار بیت تاں په اسرائیل ءَ دگه نیمونے په بێڑ ءَ فلسطین، لبنان، سوریه، ایران ءُ دگه ملکانی سر ءَ مه مان ایت. ماں اے عادلانه ئێں گیشءُگیوار ءَ وهدےکه اسرائیل فلسطین ءِ ڈگارانَ پد ءَ دنت، گڑا توانت گۆں آدگه ملکاں جوانێں رهوت داشته بیت.
واجه ءَ تچکاتچک گوشت: بائد انت په هۆش به اێں ءُ مارشتانی پد ءَ مه رو اێں که کار ءَ خراب کن انت. مردماں شه جذباتی اۆگاماں باز لٹ وارتگ ءُ نون دلسرد بوتگ ات. شه انقلاب ءِ اول ءَ ما همے مشکلانی آماچ بوتگ اێں. ارمان که لهتے گوشێگاں ماں اے دنیا ءَ زندگی نه کن انت ءُ په لهتێں ترۆندرو ءِ وشال کنگ ءَ جذباتی اۆگام جن انت ءُ آوانی آسر ءَ نه سنج انت. یک برے مزنرهشۆن ءَ گوشت: «اۆگاماں یله دےات ءُ عقل ءُ شعور ءِ نێمگ ءَ بیا ات» پمێشا نه بائد رسمی تریبونانی سر ءَ جذباتی ۆگام جنَگ بیت.
🔹مهتر علی رضیاللهعنه ماں راستی ءُ عدالت ءَ گهترێں نمونگ انت
مولانا عبدالحمید ماں دگه بهرے شه وتی هبراں گۆں اشاره به «مهتر علی رضیاللهعنه ءِ شهادت» ءَ گوشت: مهتر علی رضیاللهعنه نامدارێں مردم ءُ شه راجدپتر ءِ کارندهێں چێدگاں انت که چۆ آدگه صحابیاں واجه رسول الله صلیاللهعلیهوسلم ءِ شاگردانی میانجین ءَ جلشک ات. واجه رسول الله صلیاللهعلیهوسلم ءَ مهتر علی رضیاللهعنه ءَ دۆست داشتگ ءُ گوشتگ ئی که الله ءُ آئی رسول آیرا دۆست دار انت.
واجه ءَ گێش کرت: مهتر علی رضیاللهعنه ماں راستی ءُ یکرنگی ءُ قضاوت ءُ عدالت ءَ گهترێں نمونگ انت. گهترێں مهر ءِ چێدگ گۆں آ واجهاں همێش انت که شه آوانی سیرت ءَ پدگیری کن اێں.
🔹ماں زاهدان ءِ دارالعلوم مکی ءَ په تیوگێں مردمانی سۆب ءَ پگر بیت؛ اے بنجاه ءِ بابت ءَ «هاسێں دلگۆشے» بیت
مولانا عبدالحمید وتی هبرانی گڈسر ءَ لس مردمان ءَ په «دارالعلوم زاهدان ءُ مسیت مکی ءِ هرچءُدرچانی پچائێنگ ءَ» سۆگه کرت ءُ گوشت ئی: الحمدلله په علامه مولانا عبدالعزیز رحمهالله ءِ برکت ءُ دعا ءُ شما درێں مردمانی هێمات ءُ پلهمرزی ءَ دارالعلوم زاهدان ءِ سۆب عام بوتگ. امێت دار اێں که ماں اے جاور ءَ گێشتر شه پێش ءَ دارالعلوم زاهدان ءَ دلگۆش کن ات ءُ وتی خیرات ءُ کمکاں دارالعلوم زاهدان ءَ بدے ات ءُ ماں آئی هرچءُدرچانی پجائێنگ ءَ هوار به ات.
واجه ءَ گێش کرت: مسیت مکی هم الله ءِ عبادتجاه انت ءُ په شما ءُ آزاوران خێر ءُ سۆب ءِ سوب انت. ماں اے جاگه ءَ په ایران ءِ استمان ءُ مچێں مردماں دعای خێر بیت. ماں دارالعلوم مکی ءَ شه مردمانی سۆباں ءُ مظلوم ءِ حق ءَ چه مسلمان بیت یا نامسلمان، گپَ بیت.