شیخالاسلام مولانا عبدالحمید، ماں زاهدان ءِ نمازجمعه ءِ دیوان ءَ (17 اسفند 1403/ 7 مارچ 2025) «گوستگێں سیاستانی بدل نه کنگ» ءَ را ملک ءِ مشکلانی گێشی ءِ سوب زانت که استمان ءَ را بنبست ءِ آماچ اش کرتگ ءُ «رهوت گۆں تیوگێں دنیا» ءُ «سرکار ءِ آزات هِلّگ په رهوت گۆں دنیا» ءَ را په استمان ءِ مشکلانی جۆڑ بیگ ءَ سک هژدری زانت.
🔹استمانانی ردۆم ءُ دێمروی گۆں رهوت ءَ انت/ هر ملکے که وتی رهوت ءَ تنک کنت مشکل ءِ آماچَ بیت
په سنیآنلاین ءِ سرهال ءَ مولانا عبدالحمید گوشت: استمانانی ردۆم ءُ دێمروی ماں تیوگێں پڑاں چۆ زانتی، مالزانشتی، دۆدی، ملکاری ءُ دگه دگه پڑاں گۆں رهوت ءَ انت. هر استمانے را جوانی هست ءُ الله پاک ءَ زمینی، دریابی ءُ هوایی راهان په ملک ءُ استمانانی رهوت ءُ بهرزوری شه همدگر ءِ جوانیاں هشتگ که شه اے راهاں وتی زانتی، مالزانشتی ءُ دۆد ءُ ملکاری جاوراں جۆڑ کن انت.
واجه ءَ دێمتر ءَ گوشت: په ایران ءِ استمان ءُ آدگه استماناں باز هژدری انت که گۆں دنیا ءَ په جوانی رهوت کن انت. گۆں رهوت ءَ استماناں توان انت شه همدگر ءِ ساچشت ءُ زانت ءُ دۆداں کارمرز کن انت که همے چیز ملک ءُ استمانانی دێمروی ءِ سوبَ بیت.
🔹ایران ءِ مشکلاں گۆں گونڈێں ملکانی رهوت گرگ ءَ گیشءُگیوار نه بنت/ اۆگاماں یله به کن اِت ءُ ملک ءِ دێمروی ءِ بابت ءَ به جێڑ ات
زاهدان ءِ آدێنگ ءِ امام ءَ گوشت: ایران که آئی ءِ آبادی نزیک به نود ملیون انت، یکے شه دنیا ءِ مزنیں ملکاں انت که آئی ءِ مشکلاں گۆں گونڈێں ملکانی رهوت گرگ ءَ گیشءُگیوار نه بنت ءُ دێمروی کرت نه کنت.
واجه ءَ سک سۆگه کرت: گهترێں توجیل همێش انت که گۆں دنیا ءَ جوانێں رهوت داشته به اێں. داں کدی کار چۆش برجاہ بنت؟! تاں چنکه سال ء دگه فلانی ءُ فلانی ءِ مرگے اۆگام ءَ جن ایں؟ وهدے که رسولالله صلیاللهعلیهوسلم ءَ په وتی هچ دشمنے مرگ ءِ اۆگام ءَ نه جتگ. پمێشا اے اۆگاماں یله کن ات ءُ په مردم ءُ ملک ءِ آبادی ءُ دێمروی ءَ به جێڑ ات.
🔹بنیادی کانود ءَ پورهێں بدلی ئے په کار انت
مولانا عبدالحمید گوشت: چلءُشش سال پێسر ءِ کانودانی برورد همێش انت که مرۆچی استماں صفر ءَ رستگ ءُ گۆں بنبست ءَ دێم په دێم انت. زوتێں توجیلے په کار انت.
واجه ءَ گێش کرت: گوستگێں تهے ءُ ڈن ءِ ملکاریاں که استمان ءَ گۆں بنبست ءَ دێم په دێم اش کرتگ بدل به انت. بازێنے شه بنیادی کانود ءِ بنداں مشکل دار انت ءُ تاں نون هچ بدلی ئے آوانی ته ءَ آرگ نه بوتگ. اے بنیادی کانود ءَ پورهێں بدلی ئے په کار انت.
زاهدان ءِ آدێنگ ءِ امام ءَ همےرنگ درائێنت: ایران ءَ دو ٹوهێں مڈی هست: یکے آیی مردم ءُ دومی آیی زراں که دگه ملکاں بند بوتگ انت. بژن انت که ملیوناں ایرانی که آھانی ته ءَ بازێنے ایران ءِ ته ءَ ونتگ ءُ کاربلد بوتگ انت مرۆچی درملک ءَ نشتگ انت ءُ ماں آ ملکاں اثردارێں مردم انت. اگاں آواں برگرد انت توان انت ملک ءَ جۆڑ کن انت. اے کار وهدے بیت که گشنگی ءُ ناداری شه ملک ءَ دور بیت.
🔹گۆں استان ءِ شورای تأمین هێمات ءَ ایرانشهر ءِ پێشامد رندگیری بوت/ تیوگێں بنگپانی «زوتێں ءُ عادلانه ئێں رندگیری» لس مردمانی لۆٹ انت.
زاهدان ءِ آدێنگ ءِ امام ءَ ماں دگه بهرے شه وتی هبراں گوشت: ماں ایرانشهر ءِ پێشامد ءَ که گۆں سلاهبندێں واکدارانی تیرگواری ءَ ماشینے ءِ نێمگ ءَ یک پنچ سالگێں گونڈلے تیر وارت ءُ شهید بوت ءُ آیی ماس ءَ هم تیر لگ ات ءُ لاپ ءِ زهگ ء کپت، شه کارمستراں لۆٹگ بوت که آ پێشامد ءَ رندگیری کن انت.
واجه ءَ گێش کرت: الحمدلله گۆں سیستان ءُ بلوچستان ءِ گورنر/ استاندار ءُ شورای تامین ءِ هێمات ءَ اے پێشامد پهدل رندگیری بوت ءُ ردیکارێں ماموراں دزگر ءُ وتی جرم ءَ منّ ات اش. پهکانی لۆٹ انت که عدالت مچانی حق ءِ ته ءَ اێر دارگ بیت. لس مردمانی لۆٹ انت که تیوگێں بنگپاں «زوت» ءُ «گۆں آمید» ءَ رندگیری به انت.
🔹وشال اێں که اۆگانستان ءِ کارمستراں په نێمروز ءِ آپ ءِ یله دیگ ءَ سیستان ءِ نێمگ ءَ همکاری کرتگ
مولانا عبدالحمید گوشت: شه اۆگانستان ءِ کارمستراں لۆٹگ بوتگ تاں اے رۆچانی هورانی آپ ءَ سیستان ءِ نێمگ ءَ یله دےانت. ما وشال اێں که آوان هم همکاری کرتگ ءُ آپ ءَ را سیستان ءِ نێمگ ءَ یله اش داتگ.
واجه ءَ گێش کرت: اۆگانستان ءِ نێمروز ءِ والی ءَ که لهتے شه مئے سنگتاں گۆں آیی نیاد کرتگ، لبز ء کرتگ که آپ ءِ راه ءَ «گودزره» ءِ نێمگ ءَ بند کنت تاں مچێں آپ سیستان ءَ بئێت. ما را امێت است که تیوگێں همسایگێں ملکاں گۆں وت جوانێں رهوت داشته به انت.
🔹«دُزّی» ءُ «ناامنی» استان ءِ ته ءَ گێش بوتگ/ من په امنیت ءِ ساتگ ءَ سک سۆگهَ کن آں
زاهدان ءِ آدێنگ ءِ امام ءَ وتی هبرانی گڈسر ءَ گۆں گڑتی ءُ ارمان ءَ شه «دزی ءُ ناامنی ءِ گێشی» ءَ ماں چاگرد ءَ گوشت: ناداری فساد ءِ سوبَ بیت. اپسوز انت که دزی ءُ ناامنی ماں چاگرد ءَ باز بوتگ انت. لهتے شه ڈن ءَ هم استان ءِ ته ءَ ناامنی جۆڑ کرتگ. من په استان ءِ پهازگ ءَ سک سۆگهَ کن آں.
واجه ءَ گێش کرت: ما پهکاں بائد شیوار به اێں. شه یک نێمگ ءَ مال واهنداں په وتی مال ءُ مڈیانی پهازگ ءَ جهد کن انت ءُ شه دگه نێمگ ءَ پاگواجه ءُ اسپےریشاں ءُ کهولاں زهگ ءُ ورنائانَ دلگۆش کن انت ءُ مه هل انت که گۆں کۆشکار ءُ دزاں گندءُنند کن انت. مامور ءُ کارمستراں که امنیت ءِ ساتگ آوانی اگده انت هم په سار به انت که چاگرد ءِ ته ءَ ناامنی مه بیت.
مولانا عبدالحمید سک سۆگه کرت: مچاں بائد کوشست کن انت که شه شۆرێنۆکێں کاراں پهرێز بیت. اے چیز پێسر ءَ هم کارمسترانَ گوشگ بوتگ ءُ آوان هم تاں یک کساسے کوشست کرتگ که چۆشێں کارانی دێم ءَ گر انت. امنیت ءِ پهازگ پهکانی سۆب ءَ انت.