په ملک ءِ مشکلانی گیشءُگیوار ءَ بائد گۆں دنیا ءَ په پگر ءُ هوش رهوت کن اێں

شیخ‌الاسلام مولانا عبدالحمید ماں زاهدان ءِ نماز جمعه ءِ دیوان ءَ (10 اسفند 1403/ 29 فبروری 2025) گرانی ءَ را په ملک ءَ ٹوهترێں بیهار زانت ءُ په پگر ءُ هوشێں رهوت گۆں دنیا ءَ ءُ تهے ءُ ڈنے سیاستانی ٹگلێنگ ءَ را گهترێں توجیل په ملک ءِ پهکێں هستێں مشکلاں زانت.

🔹مولءُمراد شه هر حکومت ءِ جۆڑ بیگ ءَ ماں دنیا ءَ «مردمانی ردۆم ءُ دێمروی» انت

په سنی‌آنلاین ءِ سرهال ءَ مولانا عبدالحمید گوشت: مردمانی وڑوڑێں پاٹیاں گۆں سکێں رۆزیگی مشکلاں آماچ انت. ماں اے جاور ءَ بائد کارمستراں ایران ءِ استمان ءَ دلگۆش کن انت ءُ آیی پگر ءَ به انت.

واجه ءَ گێش کرت: مولءُمراد شه هر حکومت ءِ جۆڑ بیگ ءَ ماں دنیا ءَ، چه اسلامی بیت یا غیر اسلامی، همێش انت آیی استمان ماں تیوگێں پڑاں دێمروی کنت ءُ دنیا ءِ آدگه استمانانی دێم ءَ عزت ءُ حرمت داشته بیت.

🔹گرانی ٹوهترێں بیهار انت په ایران ءِ مردماں/ ماں ترانکاری ءَ بائد «استمان ءِ لۆٹ ءُ سۆبان» دلگۆش به انت.

زاهدان ءِ آدێنگ ءِ امام ءَ ٹکاٹک گوشت: کارمستراں ءُ فیصله کنۆک ءُ آوان که حکومت آوانی دست ءَ انت بائد انت ماں پهکێں کاراں اول استمان ءَ دلگۆش کن انت ءُ اگاں جائے ترانکاری ئے کن انت په استمان ءِ سۆب ءَ گپءُتران کن انت.

واجه ءَ گێش کرت: گرانی په ایران ءِ مردماں ٹوهترێں بیهار انت ءُ تیوگێں پاٹیاں هاسکار هلک نندۆکاں په سکی زند گوازێن انت ءُ زر ءِ بےارزشتی سوب بوتگ که کٹءُکاراں تاوان گند انت. ماں اے جاور ءَ ترانکاریانی ته ءَ تهنا مردمانی مشکل ءُ لۆٹانی سر ءَ دلگۆش بیت.

واجه ءَ درائێنت: لهتێنے گوش انت که ماں اے جاور ءَ که بندشاں گێش بوتگ انت، بائد مردمانی اۆپار هم گێش بیت. اۆپار هم کساسے دار ایت، مردم سکیانی آماچ انت. درێگے آوان که اے گپاں جن انت شه مردمانی جاور ءَ سهی بوتێن انت که مردماں چنکه اۆپار کرتگ ءُ نون هم آوانی رۆزیگی جاور سک خراب انت.

🔹اسلام رهوت ءُ مدارا ءِ دین انت؛ کارمستراں په بندشانی دور کنگ ءَ ءُ مردمانی زندگی ءِ گهبودی ءَ گۆں دنیا ءَ رهوت کن انت

مولانا عبدالحمید گوشت: گهترێں راه همێش انت که کارمستراں گۆں دنیا ءَ رهوت کن انت. اسلام رهوت و مدارا ءُ پرایمنێں زندگی ءِ دین انت. «إلا أن تتقوا منهم تقاة» [آل‌عمران: 28] اے پاگپ ءِ مولءُمراد همێش انت که گۆں آوان که الله ءِ منّوک نه انت، په دل مهر مه کن ات، بلێں رهوت کن انت. پمێشا ما توان اێں گۆں تیوگێں دنیا ءَ جوانێں رهوت داشته به اێں، انچێں رهوتے که بندش ءُ مردمانی مشکلانَ دور کنت.

واجه ءَ گێش کرت: ابید شه تهے ءُ ڈن ءِ سیاستانی ٹگلێنگ ءَ جاور زبر نه بیت. کارمستراں بائد زوتێں فیصله ئے کن انت که مردم گێشتر سکیانی آماچ مه به انت ءُ توان انت زندگی کن انت.

🔹ماں نونێں آزگ‌سمائێں جاور ءَ بائد استان ءِ امنیت پهازگ بیت

مولانا عبدالحمید گوشت: چنکه ماه ات که استان امن ءُ امان ات، بلے اپسۆز انت که لهتے پێشامد کپتگ. من دوارگ آوانَ که ملک ءِ ته ءَ یا ڈن ءَ انت، سک سۆگهَ کن آں که  ملک ءِ امنیت بائد پهازگ بیت.

واجه ءَ گێش کرت: ملک ءِ امنیت پهکانی سۆب ءَ انت. نون که ملک ءِ کارمستری دمگی کارمسترانی دست ءَ انت ملک ءِ امنیت گێشتر ساتگ بیت تاں آوان توان انت گۆں دلسۆچی ءَ مردمانی هزمت ءَ کن انت.

زاهدان ءِ آدێنگ ءِ امام ءَ گوشت: منی سۆگه په تیوگێں ادارهاں ءُ مردماں همێش انت که شه شۆرێنۆکێں کاراں پهرێز کن انت، هاسکار ماں نونێں آزگ‌سمائێں جاور ءَ باز په سار به انت. لهتے ماں چاگردی رسانکدراں گونڈێں بن‌گپے را ٹوه کن انت که مشکل جۆڑ بیت. پمێشا پهکاں شه چۆشێں بن‌گپاں پهرێز کن انت.

🔹سلاهبندێں واکدارانی آمیدگس پنچ سالگێں ایرانشهری زهگ ءِ بن‌گپ ءَ په‌دل ءُ زوت رندگیری کنت

مولانا عبدالحمید گۆں اشاره به «یوسف شهلی‌بر»؛ ایرانشهری ئێں پنچ سالگێں زهگ ءِ شهادت ءَ گوشت: ماں ایرانشهر ءَ همے زوت ءَ ماشینے ءِ نێمگ ءَ تیرگواری بوتگ که یک پنچ سالگێں زهگے شهید بوتگ ءُ آیی ماس ءَ تیر لگ اتگ که زهگء پرێنتگ.

واجه ءَ درشان کرت: منی سۆگه په تیوگێں سلاهبندێں واکداراں همێش انت که په سار تیرگواری کن انت. اگاں یک ڈوه‌دارے جِه ایت گهتر انت تاں یک بےمیارے کشگ بیت.

زاهدان ءِ آدێنگ ءِ امام ءَ گوشت: منی لۆٹ شه سلاهبندێں واکدارانی آمیدگس ءَ همێش انت که اے واکدارانی کرد ءَ په دل ءُ زوت رندگیری کن انت ءُ شه مظلومێں لۆگمان ءَ هم دلجویی بیت ءُ آوانی لۆٹاں هم رندگیری به انت.

واجه ءَ درائێنت: گهترێں راه «عدالت» انت. اگاں کسے ظلمے کرت چه مامورے بیت یا کارمسترے یا لس مهلوکے بائد کانود ءُ عدالت ءِ رد ءَ گۆں آیی کرد بیت تاں دوارگ دگه کسے ردی ءُ ظلمے مه کنت. همےرنگ شه کارمستراں لۆٹ اێں که لهتے که شه پێسر ءَ ماں دلان اش چیزے هست ءُ لۆٹ انت مشکل جۆڑ کن انت، آوانَ سرپد کن انت.

🔹اۆگانستان ءِ کارمستراں آپ ءِ دێم ءَ پاچ کن انت تاں سیستان ءِ ڈیه ءَ هم سر بیت

مولانا عبدالحمید گۆں اشاره به اۆگانستان ءِ نونێں هورانی گوارگ ءَ گوشت: الحمدلله ماں اۆگانستان ءَ جوان برپ ءُ هور بوتگ. مئے لۆٹ شه امارت اسلامی ءِ کارمستراں همێش انت که مه هل انت اے آپ «گود زره» ءِ نێمگ ءَ تچ ایت که هشکێں گیابانے، بلکه آپ ءِ راه ءَ سیستان ءِ نێمگ ءَ پاچ کن انت، پچےکه سیستان ءِ جاور سک نگێگ انت.

🔹گێشتری دگی پێشامدانی سوب «بےپروایی» انت؛ هلائێنۆکاں رهنمایی و رانندگی/ٹرافیک ءِ کانوداں دلگۆش کن انت

مولانا عبدالحمید وتی هبرانی گڈسر ءَ گۆں بژن شه استان ءِ دگ وێلاں په راهنمایی ءُ رانندگی ءِ کانودانی کمار کنگ ءَ سک سۆگه کرت ءُ گوشتء: گێشتری دگی پێشامداں که بازێں تاوانے دار انت، شه بےپروایی ءِ سوب ءَ انت. پمێشا بائد انت هلائێنوکاں کانودانَ کمار کن انت.

واجه ءَ گێش کرت: اگاں کسے اے کانودان کمار مه کنت ءُ په بےپروایی ءِ سوب ءَ مردمے کشگ بیت، شرع ءِ رد ءَ «کۆش» زانگ بیت ءُ ٹوهێں گناهے. قرآن ءَ ٹکاٹک گوشتگ که اگاں کسے ردی ئێں کۆشے کنت بائد دو ماه رند په رند رۆچگ گیت.

مولانا عبدالحمید همےرنگ شه زنونێں چراگانی کارمرز کنگ ءَ مکن کرت ءُ گوشتء: آ هلائێنۆکاں که شپاں شتءُآت کن انت هچبر شه زنونێں چراگاں کارمرز مه کن انت که آدگه هلائێنۆکانی دیدے دێم ءَ گر انت ءُ دگ وێلانی سوب به انت.