«هلوچ‌گری» ءُ ناامنیانی بنی سوباں ماں اے ڈیه ءَ «ناداری» ءُ «بےکاری» انت

سنی‌آنلاین| زابل ءِ آدێنگ ءِ امام ءَ وتی گڑتی ءَ شه هلوچ‌گری ءُ ناامنی ءَ ماں سیستانءُبلوچستان ءَ درشان کرت ءُ ناداری ءُ بےکاری ءَ را شه چۆشێں پدرائشتانی بنی سوباں ماں چاگرد ءَ زانت.

مولانا عبدالرشید شه‌بخش ءَ (7 دی‌ماه 1403) یکے شه زاهدان ءِ ورنائانی شهادت ءَ که هلوچ گرگ بوت ات، «سک دلبرێجۆک» زانت ءُ گوشتء: چۆشێں دل‌په‌دردکنۆکێں جرم ءُ جنایتاں په تیوگێں کارمستراں خطر ءِ چێدگ انت. هچ کس نه توانت چۆشێں جنایتانَ توجیه کنت. بلێں هربرے که ڈیه ءِ ته ءَ کار ءُ دندا بوتگ چۆشێں مشکلاں هم کم بوتگ انت.

زابل ءِ آدێنگ ءِ امام ءَ ٹکاٹک گوشت: ناداری، بےکاری، گرانی ءُ مالی مشکلاں سوب به انت که لهتے خدانترسێں مردماں دزی ءُ باجگری ءُ دگه جرم کن انت.

زابل ءِ بدرالعلومء دینی وانگجاه ءِ سرمستر ءَ گێش کرت: بژن انت که مردمانی رۆزیگی مشکلاں رۆچ په رۆچ گێش بیان انت. کارمستراں بائد مردمانی معیشت ءُ مالزانشت ءِ پکر ءَ به انت.

🔸 زابل آدێنگ ءِ امام ءَ همےرنگ شه ملک ءِ آمیدگس ءُ امنیتی کارمستراں لۆٹ ات که همے زوتێں هلوچ‌گری ءَ که سوب بوت یک زاهدانی ورنا ئے شهید کنگ بیت، زوت رندگیری کن انت ءُ آیی کنۆکاں دزگر ءُ سزا دیگ به انت.