په بلوچ ءِ ھستمان ءَ زْرمبشت ءِ مھکم کنگ ھژدری انت

یکجھتی کمیٹی ءِ سرکماش ڈاکٹر مھرنگ بلوچ دو شمبے ءِ روچ ءَ (25 نومبر 2024) گوادر ءَ بار کونسل ءَ شُتگ که بار کونسل ءِ سروک نئیم شریپ ءُ آدگه مردماں آئی ءَ وش اتک کُرتگ.

ڈاکٹر مھرنگ بلوچ ءَ گوں وکیلاں تران کنان ءَ گْوشتگ که ما را سیاسی کارکن ءُ وکیلاں باز جُھد کنگی اِنت، چے ءَ کہ مئے مردم انگت سرپد نه اَنت کہ چے بیگ ءَ اِنت، آ چہ پیسر ءَ ھمنچُک زوراکی ءِ آماچ کنگ بیتگ اَنت کہ مرچی لشکر آیانی گِساں ماندار ایت ءُ مردماں چه گِساں در کنت بلے جُست کنوک نیست.

آئی ءَ بلوچستان ءِ انیگیں لشکرکشی ءِ بابت ءَ گْوشتگ که بلوچستان ءَ لشکرکشی کنگ ءِ پیسله کنوکیں ٹولی کانودی ٹولی یے که چوشیں پیسله کُرت کنت.

آئی ءَ گْوشتگ که بلوچستان ءِ لشکرکشی ءِ باروا مرچی پاکستان ءِ زانوگر بےتوار اَنت. پنجاب ءِ اھوالکار ءُ آدگرانی لوٹ ھمے بیتگ که بلوچستان ءَ لشکرکشی کنگ به بیت. پمشکا ما ھمے زوراکی ءِ بگیری ءَ یک سیاسی زْرمبشت ئِے بِناہ کُرتگ.

آئی ءَ گْوشتگ که پاکستان ءِ آمیدگس ھم بلوچ چکچینی ءَ ھوار اَنت، دیمتر ءَ گیشتِر زوراکی کن اَنت بلے په بلوچ راجی ھستمان ءَ ما را اے زْرمبشت مھکم کنگی اِنت.

بنشۆن: زرمبش بلوچی