تیوگێں جنگ کنۆکێں گلاں «زوتێں آسبندی» ءُ «عادلانه ئێں گێشءُگیواری» ءِ پد ءَ به انت

شیخ‌الاسلام مولانا عبدالحمید، ماں زاهدان ءِ نمازجمعه ءِ دیوان ءَ (27 مهرماه 1403) وتی بژن ءَ شه «میان‌رۆدرهت ءِ جاور ءِ خراب بوهگ ءَ» درشان کرت ءُ جنگ کنۆکێں گلان ءَ سۆگهء کرت که په «عادلانه ئێں گێشءُگیواری» ءُ «زوتێں آسبندی» ءَ جهد کن انت.

🔹 میان‌رۆدرهت هاسێں ءُ سکێں جاور ءِ ته ءَ انت

په سنی‌آنلاین ءِ سرهال ءَ مولانا عبدالحمید گوشت: ارمان که نون میان‌رۆدرهت هاسێں ءُ سکێں جاور ءِ ته ءَ انت. اے جاور ماں راجدپتر ءَ کم گندگ بیت که میان‌رۆدرهت چشێں ٹوهێں جنگانی آماچ بیت.

واجه ءَ گێش کرت: مردمانی جۆڑکرتگێں ءُ باز دێما شتگێں سلاهاں که سک خطرناک انت، دمگ ءَ آرگ بوتگ انت؛ حتا زۆرآورێں حکومتاں جوهری سلاهان ءَ اے دمگ ءِ ته ءَ آورتگ که اے سلاهاں په دمگ ءَ سکێں خطر انت. سرجمێں حکومتاں په وتی پهازگ ءَ سلاه جۆڑ کرتگ که اگاں آوان کارمرز به انت بازێں مشکلے دێم ءَ کێت.

🔹 نونێں جاور ءِ لۆٹ همێش انت که تیوگێں جنگ کنۆکێں گلاں په «زوتێں آسبندی ءَ» پگر کن انت

🔹 «فلسطین ءِ بن‌گپ ءِ عادلانه ئێں گێشءُگیواری» دمگ ءِ برجاهێں سهل ءُ امنیت ءِ سوب بیت

زاهدان ءِ آدێنگ ءِ امام ءَ گوشت: ماں نونێں جاور ءَ که لهتے شه حماس ءُ حزب الله ءِ سرۆکاں شهید بوتگ انت ڈیه ءِ جاور بدتر بوتگ. نونێں جاور همێشرا لۆٹ ایت که پهکێں میان استمانی هۆربنداں ءُ ڈیه ءِ سرکاراں په اسیرانی آزاتی ءُ زوتێں آسبندی ءَ تۆجیلے درگێج انت.

واجه ءَ سک سۆگه کرت: مچاں بائد جهد کن انت تاں یک عادلانه ئێں سهل ءُ گێشءُگیواری ءِ هاس فلسطینی ءُ اسرائیلیانی میانجین ءَ جۆڑ بیت. گێش شه هپتاد سال انت که فلسطین ءِ بن‌گپ روان انت ءُ اے دمگ ءِ ته ءَ ٹوهێں جنگ ءُ ناامنیانی سوب بوتگ. پمێشا عادلانه ئێں گێشءُگیواری ءُ فلسطینیانی ٹگارانی دێگ ءُ جتائێں ملک ءِ جۆڑ کنگ که آیی بنجاهی شهر بیت‌المقدس بیت، دمگ ءِ برجاهێں سهل ءُ امنیت ءِ سوبَ بیت.

🔹 جنگ کنۆکێں گلاں وتی مارشتان ءَ واگ کن انت ءُ جنگ ءِ آچش ءَ هپ مه کن انت

مولانا عبدالحمید گوشت: مئے لۆٹ شه دمگ ءِ تیوگێں گل ءُ پاٹیاں همێش انت که جنگ ءِ آچش ءَ هپ مه کن انت ءُ آیرا گێشتر رۆک مه کن انت، بلکه پهکاں په آسبندی ءُ عادلانه ئێں گێشءُگیواری ءَ جهد کن انت. ترندێں ءُ رادیکالێں اۆگاماں که پێسر ءَ بوتگ انت، شه هر نێمگے که به انت وش نه انت، بلکه پهکاں بائد انت وتی مارشتان ءَ واگ کن انت ءُ عدالت ءُ آمید ءُ زوتێں آسبندی ءِ اۆگام ءَ چست کن انت.

🔹 سیاستانی زوتێں ٹگلێنگ ءُ مردمانی مشکلانی گێشءُگیواری په یکویی ءُ ملکی امنیت ءَ باز هژدری انت

مولانا عبدالحمید ماں دگه بهرے شه وتی هبراں گوشت: زند ءِ گوازێنگ په مردماں باز سک بوتگ. منی سۆگه په واجه پزشکیان ءُ پهکێں کارمستراں همێش انت که سیاستانی زوتێں ٹگلێنگ ءُ مردمانی مشکلانی گێشءُگیوار کنگ سک هژدری انت. مردمانی وشنودی ءُ آوانی دلانی دست آرگ په ملکی امنیت ءَ باز زلورت انت.

واجه ءَ گێش کرت: هژدری انت که ایران ءِ استمان ءِ لۆٹاں چۆ: آمید ءِ اێر دارگ، نابرابریانی دور کنگ، په کارێں آزاتیانی پجائێنگ ءُ بنیادی کانود ءِ اێر دارگ منّگ به انت. ملک ءَ یکویی ءُ همدلی په کار انت ءُ اے یکویی ءُ همدلی گۆں سرکار ءُ کارمسترانی ترندێں گامگێجاں جۆڑ بیت.

🔹 پزشکیان ءِ سرکار ءِ دست په بدلی ءُ چستءُاێراں یله کنگ بیت

زاهدان ءِ آدێنگ ءِ امام ءَ گوشت: بائد پزشکیان ءِ سرکار ءِ دست یله کنگ بیت. اگاں لۆٹ انت اے سرکار کارے کنت، نه بیت که دستء بندگ بیت، بلکه بائد اختیار داشتگ بیت تاں توانت بدلی بیار ایت.

واجه ءَ درشان کرت: ملک ءِ مالزانشتی جاور رۆچ په رۆچ گیشتر نگێگ بوھگ ءَ انت ءُ مردماں سکێں رۆزیگی مشکلانی آماچ انت. وانێنۆک، کارنشت، پوریاگر، پرستار، کارمند ءُ وڑوڑێں پاٹیاں کوکار کن انت. مالزانشتی جاور بائد وش بیت تاں مردم تاهیر داشته به انت. اے ایران ءِ تیوگێں استمان ءِ لۆٹ انت ءُ ما پهکاں بائد ایران ءِ مردم ءُ آوانی لۆٹان ءَ سرپد به اێں.