سیاسی بندیگانی پاهو، هاسکار جنێنانی پاهو ءَ بند کن ات

شیخ‌الاسلام مولانا عبدالحمید، ماں زاهدان ءِ نمازجمعه ءِ دیوان ءَ (۵ مرداد ۱۴۰۳) سیاسی بندیگانی پاهو، هاسکار جنێنانی پاهو ءِ بند کنگ ءَ لۆٹۆک بوت.

په سنی‌آنلاین ءِ سرهال ءَ مولانا عبدالحمید اے باروا درائێنت: ملک ءِ تها مردێن ءُ زالبۆلێں سیاسی جھدکارانی دزگیر کنگ گێش بوتگ انت ءُ لھتے ءَ پاهو ءِ حکم دیگ بوتگ انت. ما گوں دلسۆچی ءَ گوش اێں که پاهو ءِ حکم ءَ بند کن ات. پاهو په ملک ءَ ءُ په ھمایاں کہ سرۆک اَنت تاوان بار انت. پاهو ءَ ءُ هاسکار جنێنانی پاهو ءَ بند کن ات. مۆکل دےات سیاسی جھدکاراں  وتی کار ءَ به کن انت. آوان ءَ بندیجاه ءِ کُنڈ ءَ مه کن ات ءُ جهد کن ات ایران ءِ درێں استمان ءِ واھگ ءُ لۆٹان ءَ پیلو به کن ات.

🔹 «تبعیض» ءُ نابرابری تانسرپسند ءُ بےانصافانی کار انت

شیخ‌الاسلام مولانا عبدالحمید گۆں اشاره به سۆگند چست کنگ ءِ دیوان ءَ ماں آیوکیں ھپتگ ءَ ءُ سرکار ءِ نوکێں کابینه ءِ پێش کنگ ءَ ماں پارلمان ءَ، گوشت:

 واجه پزشکیان ءِ گپانی رد ءَ که آئی ءَ زالبۆلانی حق ءُ راج ءُ مذھبانی حقانی بابت ءَ گپ جتگ ءُ ایران ءِ استمان ءِ درداں یات ء کرت انت، لس مردمان امێتوار بوت انت که کارمستراں اے گپ ءِ سر ءَ سر بوتگ اَنت که 46 سال ءِ تبعیض ءُ نابرابریاں نه بائد به انت. تبعیض ءُ نابرابری تانسرپسند ءُ بےانصافانی کار انت.

🔹 46 سال ءِ نابرابریاں هلاس به انت

واجه ءَ گێش کرت: اے انصاف انت که 46 سال ءِ نابرابری ھلاس به انت ءُ ایران ءِ استمان امێتوار بیت که آمید ءُ انصاف ءِ بو کێت. گهتر انت که نوکێں کابینه ءِ تها زالبۆل ءُ راج ءُ مذهب هم ھوار به بنت. په یک ملکے ءَ مسترێں اقتدار ءُ تۆک ملکی یکۆیی ءُ تپاک انت. اے کار شه انصاف ءُ برابری ءَ رس ایت. ما را اُمێت انت که اے کار به انت. اسلامی جمهوری ءِ تها سلاہ بندێں واکاں ءُ دگه اقتدار ءِ بنجاهاں زالبۆل، راج ءُ مذهبانی بودیگان ءَ منّ انت، چی ءَ که شه اێشی ملکی یکویی رس ایت. شه ملکی یکویی ءَ ملکی ایمنی جۆڑ بیت ءُ تهے ءُ ڈنے خطران ءَ دور کنت.

🔹 بےانصافی ءُ نابرابری بنّامی دار ایت

زاهدان ءِ آدێنگ ءِ امام ءَ درشان کرت: آمید ءَ نان ءُ نام ھم ھست، بلے بےانصافی ءُ نابرابری ءَ بنّامی هست. مئے سۆگه اێش انت که لائکێں مردماں کار گرگ به بنت. سست ءُ بےتۆکێں مردم دین ءُ خاصێں چیزانی دارگ ءِ دروشم ءَ پیش دار انت؛ اے سۆداگر انت.  گند ات که کئے لائک انت.

🔹 «هول ءُ فساد» گچێنانی آسر انت

واجه ءَ «ملک ءِ کارمسترانی گچێن کنگ ءِ رهبند ءِ بےپۆکی» ءِ سر ءَ زۆر پر دات ءُ گوشتء: ھماوان که گچێن کن انت، اے گپ ءَ دلگۆش کن انت که آوانی گوستگێں گچێن کنگاں کار نه کرتگ ءُ اے که ملک انچۆ هول ءُ فسادانی آماچ انت، اے ھمے ادارهانی گچێن کنگ ءِ آسر اِنت. گردی ءَ گێش کن ات ءُ آوان شما را مه رێپێن انت که ماں مراگشاں دیم ءَ نشتگ انت. آ سۆداگر انت که اے کار ءَ کن انت. بچار ات کئے ءَ زرد ھست ءُ بنی ابرم ءِ سر ءَ منتگ. اے لس مردمانی راجی حق انت کہ په کار ءَ لائکێں مردم بیا انت نه دلال که مۆک دیوک اَنت. ما پهکاں زان اێں که ملک ءَ چے بوهگ ءَ انت. ما نه گْوش اێں پهکاں چۆش انت، بلے بازێں مردمے شه سیادی ءُ رهوتی راهاں کاینت ءُ پستاں گِر انت ءُ پد ءَ استمان ءَ گۆں بدبختی ءَ آماچ کن انت.

🔹 ظلم ءُ بے‌انصافی په هچ استمانے روا نه انت

زاهدان ءِ آدێنگ ءِ امام ءَ گۆں اشاره به اسرائیل ءِ زۆراکیاں درشان کرت: اگاں مسلماناں هم یهودی ءُ عیسائیانی سر ءَ ظلم ءُ زۆراکی به کن انت گڑا آ اێر جنَگ بنت. ظلم ءُ نےانصافی په هچ استمانے روا نه انت. اے کارے که اسرائیل کنگ ءَ انت آ اسرائیلیانی راجدپتر ءَ سیاہ کنت. یهودیانی مزنێں بهرے ءُ اسرائیل ءِ بازێں مردمے گۆں جنگ ءَ چپ انت، بلے آوانی عاقلانه ءُ راست‌بندگِری ئێں گپاں که دێمداری شه جنگ ءُ ھون رێچی ءَ انت، گۆش نه دار انت.

شیخ‌الاسلام مولانا عبدالحمید گوشت: مئے باور ءَ ھرکس زۆراک ءِ ھمراھی ءَ کنت سرجهل ءُ ذلیل بیت ءُ ماں وتی حکومت ءَ هم بےسۆب بیت. اێشی ءِ درور امریکا ءِ جمهوری کماش انت که گۆں آیی هزمتاں په ملک ءَ انگت مردماں آیرا وێل کرت ءُ پیری ءِ نیمون ءَ پد ءَ کش اتء. اے همێشی نشان انت که ماں دنیا ءَ هچ مردمے شه الله ءِ دیم ءَ چێر نه انت. اے راجدپتر ءُ درونت انت ءُ هرکس اے بابت ءَ به جیڑ ایت.