شیخالاسلام مولانا عبدالحمید ماں زاهدان ءِ نمازجمعه ءِ دیوان ءَ (۱۵ تیرماه ۱۴۰۳) گۆں اشاره به واجه رسول الله صلی الله ءُ علیه وسلم ءُ خلفای راشدین ءُ اهلبیتانی سیرت، حکومت ءُ باانصافێں کرداراں گوشت: مهتر رسول الله ءُ مهتر علی ءِ حکومت بےعدل ءُ انصاف ءَ خیال ءِ تها نه یێت.
په سنیآنلاین ءِ سرهال ءَ زاهدان ءِ آدێنگ ءِ امام، مولانا عبدالحمید ءَ گوشت: وهدےکه مهتر علی ءَ هلاکه داران ءَ دێمَ دات، آوان ءَ سۆگه کرت که گۆں مردماں په جوانی رفتار کن انت. مهتر عمر ءَ پرمان دات که دیوالے را که مصر ءِ هلاکه دار ءَ بست ات، ٹالێنگ بیت تاں په مردمانی نیاد ءُ آوانی هبرانی اشکنگ ءَ هچ رکاوٹے مه بیت.
شیخالاسلام مولانا عبدالحمید گێش کرت: ایران ءِ پێسر ءِ شاه ءِ اێشکءُآشک ءَ را یک پاٹی ءِ گپت ات ءُ مردمانَ مکن اشَ کرت، پمێشا آیی نه توانت گۆں مردماں دێم په دێم گپ جنت. وهدےکه سال 57 ءَ انقلاب بوت شاه ءَ گوشت من مردمانی انقلاب ءِ کلۆ ءَ اشکت.
واجه ءَ به ترکیه ءِ گوستگێں شهرداریانی گچێنکاری ءِ کتهکاری ءَ ھم اشاره کرت ءُ گوشتء: ماں اے گچێنکاری ءَ وھدےکه حاکمێں گل، انصاف ءُ دێمروی ءَ پرۆش وارت ءُ مخالفێں گل سۆبمند بوت، گڑا اردوغان میدان ءَ آت ءُ ترکیه ءِ مردمان ءَ گوشتء که من ءَ شمے کلۆہ رست.
🔹 گوستگێں هپتگ ءِ گچێنکاری ءَ مزنێں کلۆئے داشت
زاهدان ءِ آدێنگ ءِ امام ءَ گوشت: گْوستگێں ھپتگ ءِ گچێنکاری ءَ په مئے ملک ءِ کارمستراں یک مزنێں کلۆہ ئے داشت ءُ ھمے پدر کنگ بوت که حکومت ءِ اگدہداراں شه چاگرد ءِ تهے راستالاں ءُ ایرانی چاگرد ءِ مزنێں ناوشنودی ءُ مزنێں کچے شه ایرانیانی درانڈیه بیگ ءَ ماں دگه ملکاں ءُ همےرنگ مردمانی ناداری ءُ ملکی زر ءِ بےارزشتی ءَ سهی نه بوتگ انت ءُ آوانی اێشکءُآشکے مردماں آوان ءَ راستی ءِ ھال نه داتگ ءُ نه هشتگ اش که دلسۆچ ءُ خێرلۆٹاں کارمستران ءَ شه گواچناں سهی کن انت.
🔹 مردمانی بهر نه زورگ ماں گچێنکاری ءَ ناوشنودی ءِ چێدگ انت
شیخالاسلام مولانا عبدالحمید درشان کرت: خدا زانت که اے هپتگ ءَ گچینکاری چون بیت، بلێں شه گوستگێں هپتگ ءِ گچینکاری ءَ وزارت داخله ءِ جار جتگێں سرهال ءِ رد ءَ پدر بوتگ که ایوک ءَ 40 درصد ءَ ماں گچێنکاری ءَ بهر زرتگ، وهدےکه دگه چارۆکانی سرهال ءِ رد ءَ بهر زورۆکانی کساس کمتر بوتگ.
واجه ءَ ٹکاٹک گوشت: وھدے که چاگرد ءِ 60 درصد ماں گچێنکاری ءَ بھر نه زور ایت گڑا اے آوانی ناوشنودی ءِ چێدگ اِنت، نه که آوان ءَ کار بوتگ ءُ وھد نه بوتگ.
🔹 حکومت ءِ اگدهداراں سیده مردمانی گپان ءَ گۆش دار انت
زاهدان ءِ آدێنگ ءِ امام ءَ گوشت: ما شه ھمدردی ءُ خێرلۆٹی ءَ گْوشت که مردمانی هبران ءَ گۆش دار اِت ءُ اگاں مردمانی گپ گۆش دارگ بوتێں گڑا 60 درصد مردماں شه جابگ ءَ دور نه بوت انت. ما امێت کن اێں که کارمستراں ءَ کلۆہ رستگ ءُ وتی کارانی سرا پدا ھیال ءُ لێکه کن انت ءُ بے میانجی ءَ گوں مردماں نند انت ءُ آوانی گپاں گۆش دار انت.
واجه ءَ گێش کرت: لھتے سال پێش ءَ مزن رھشۆن ءَ گْوشتگ اَت که من لس مردمانی گپان ءَ گۆش دارگ لوٹ آں. ما گْوشت که اے باز جوانێں گامگیجے، بلے پد ءَ ما سرپد بوت اێں که شه دمگاں انچێں مردمان ءَ په نیاد گۆں مزن رهشۆن ءَ بر انت که آ لس مردمانی گپان ءَ نه جن اَنت ءُ اگاں گپ جن اَنت، ایران ءِ استمان ءِ بُنکی ءُ ھاسیں لوٹان ءَ اگده داران ءَ سر نه کن انت.
واجه ءَ گێش کرت: شه مزن رهشۆن ءِ هبراں چۆش زانگ بیت که آ شه جاور ءَ سهی نه بوتگ. پمێشا بازێں مردمے که آیاں بائد چۆشێں مسائلان ءَ آیرا رسێنتێں، جُست به اَنت که پرچا راستیان ءَ آیرا نه رسێنتگ اش؟
🔹 مرۆچی ایران ءِ استمان گران تریں جاوراں زند گوازینگ ءَ اِنت
شیخالاسلام مولانا عبدالحمید درشان کرت: تیوگێں کارمستراں هر جاگه ءِ واهند انت، بائد لس مردمانی میان ءَ به رونت ءُ چاگرد ءِ جاور ءَ به گند انت. مرۆچی ایران ءِ استمان گران تریں جاوراں زند گوازینگ ءَ اِنت ءُ اے چل سال ءِ تبعیض ءُ نابرابری ءُ رۆزیگی ءُ مالزانشتی جاوراں لس مردمان ءَ گرانیں جاوراں اێر کرتگ ءُ لس مردمانی لوٹ ءُ جُھداں بے سۆب بوتگ اَنت، ءُ ما را امێت هست که اے مسائلاں گیش ءُ گیوار کنگ بنت.
🔹 ابید شه ایران ءِ استمان ءِ خیر ءِ لۆٹگ ءَ ما را دگه مولءُمرادے نێست
زاهدان ءِ آدێنگ ءِ امام ءَ گێش کرت: ما جاگه ءُ مادی چیزانی پد ءَ نه اێں، په ما زند ءِ گوازێنگ گۆں طالبی پچاں گهتر انت ءُ ما را ایران ءِ سرجمیں استمان ءِ پار ءَ نێکی ءُ دلسۆچی ءَ ابید دگه ھچ مول ءُ مرادے نێست.
🔹ایران ءِ استمان آگاه بوتگ
مولانا عبدالحمید وتی هبرانی گڈ سر ءَ گوشت: استمانانی سۆبمندی ءِ مسترێں سوب «آگاهی» اِنت ءُ ایران ءِ استمان مرۆچی آگاهی ءَ سر بوتگ ءُ وتی گێشءُ گیواری ءَ وتی آگاهی ءُ ارادہ ءِ رد ءَ کنت. ھر انسان ءَ «آزاتی» ءُ «زرد» ھست ءُ ھمے آزاتی ءُ زرد ءِ رد ءَ کار کنت. ما را اُمێت هست که الله تعالیٰ په ایران ءِ استمان ءَ خیر ءُ رحمت بیار ایت.