بلوچستان ءِ ھمک نیمگ ءَ ھونریچی اِنت

بلوچ یکجھتی کمیٹی ءِ سروک ڈاکٹر ماہ رنگ ءَ ماں چاگردی رسانکدر ایکس ءَ ماشکیل ویل ءِ پژدر ءَ نبشتگ کہ بلوچستان ءِ ھمک نیمگ ءَ ھونریچی اِنت، ھمک نیمگ ءَ لاش، پرس ءُ یک نہ کٹوکیں دردے.

آئی ءَ گوشتگ کہ زی (سےشمبے، 28 مئی 2024/ ۸ خرداد ماه ۱۴۰۳)  ماشکیل سیمسر ءَ ایرانی لشکر ءَ بلوچ ڈرائیورانی سر ءَ تیرگواری کرتگ چہ ایشی ءَ سے بلوچ ڈرائیور شھید  ءُ شش مردم ٹپی ءُ دو  مردم دزگیر بوتگ، یک لاشے ھم گوں وت برتگ.

ڈاکٹر ماہ رنگ ءَ گوشتگ کہ سیمسر ءِ اے نیمگ ءَ بلوچ ڈرائیور پاکستانی لشکر ءِ نیمگ ءَ یکشل ءَ آزارانی دیمپان اَنت ءُ سیمسر ءِ دومی نیمگ ءَ ایرانی لشکر ءِ زوراکیاں مئے مردمانی زندماں جنجال کرتگ.

آئی ءَ گوشتگ کہ بلوچ راج اے وھد وت ماں وت گرءُ چیل نہ اِنت راجی یکجاھی ءُ یکمشتی اِنت. اے وھد ءَ ما یک ترسناکیں چکچینی  ءِ دیم پہ دیمی ءَ کنگ ءَ ایں. چہ ماشکیل ءَ بگر داں تربت ءَ مرچی مئے ھمک گس پرسیگ اِنت.  ھمک گس ءِ تیوک ءَ لاش ایر اِنت. اگاں مرچی ما وتی لڑانی تہ ءَ یکجاھی ءُ یکشمتی ءِ ودی کنگ ءَ بے سوب بوت ایں گڑا مئے آھوکیں پدریچ ما را نہ بکش ایت ءُ مئے دژمن مئے چکچینی ءَ تیز کنت.  ھدا بچار اِت پہ  اے کودکیں لاشاں تیوک ءَ اے بلوچ چکچینی ءِ بگیری ءَ وتی میان ءَ یکجاھی ودی بہ کن اِت.

بنشۆن: زرمبش بلوچی