بلوچستاں ءِ سیمسری باپار ءِ جیڑھانی سر ءَ بی این ایم ءِ گزارش

بلوچ راجی زْرمبشت ( بی این ایم) ءِ گھبودی بھرگ ءَ سیمسر ءِ بندش ءُ باپار ءِ کمیں پارست ءُ درانی پد ءَ بلوچستان ءِ گزرانکی جیڑھانی سھرا کنگ ءَ گزارشے شنگ کرتگ. گزارش ءِ ته ءَ انگریزانی زورگری ءِ پد ءَ بلوچستان ءِ بھر ءُ بانگ ءِ دمگ ءِ سر ءَ سان ءُ انگیں نوکیں نوک‌آبادی زوراکی ءِ جاور درشان کنگ بیتگ اَنت.

بلوچ راج ءِ بدیں جاور ءِ سر ءَ چمشانک دیگ بیتگ، بلوچ که وتی پجار، ربیدگ، وانگ ءُ پاکستانی زیردستیں بلوچستان ءَ گیش بیوکیں گزرانکی ناگیگی ءِ آسر ءَ چارپھناتیں ارشانی دیمپانی کنگ ءَ اِنت. گزارش ءِ رد ءَ بلوچستان ءَ دلجمیں کارجاہ نیست اِنت. لسبیله ھنکین ءِ شھر ھب تیوکیں کارجاھی شھر اِنت بلے آ اود ءَ ھم دری مردم کار ءَ دارگ به اَنت چه ایشی ءَ بلوچستان ءِ شھرمنند چہ روزگار  ءِ ھمے کسانیں در ءَ ھم زبھر کنگ بیگ ءَ اَنت.

گزارش ءَ گچینی روکپتی سیمسر ءَ باپاری راھداریانی نیمگ ءَ دلگوش گْور کنگ بیتگ. گزارش ءِ ته ءَ پرارزشتیں باپاری راھداری تپتان، ماشکیل ، ابدوئی، پیشن ۔مند، ریمدان، کوھک، پروم، پسابندن، گْوتر ءُ کلانی، کنٹاٹی ھور ءِ نام گرگ ءُ باپار کنوکیں مردمانی جیڑہ درشان کنگ بیتگ اَنت.  مردماں پہ زور سنگ گرگ، ٹوکن سسٹم، ناوشیں راہ ءُ سیمسر ءِ بے سمائی بند کنگ، جیڑہ اَنت. گزارش ءَ اوسپانانی (اوسپان ۔ وقفہ) سر ءَ سیمسر ءِ بندش ءِ تباہ کنوکیں سانانی بارہ ءَ  گْوشگ بیتگ که چه ایشی ءَ شد ءُ بےروزگاری گیش بیت.

چہ ایشاں ابید گزارش ءِ ته ءَ پاکستانی لشکر ءُ ھندی ناراھیں پرواکانی (مافیا) نیمگ ءَ منڈگ بیتگیں ھلکیں گزارانک (غیرمستحکم معشیت) ءِ نیمگ ءَ دلگوش پرینگ بیتگ که چه باپاری سرگرمیاں ناگتیں اوشتگ ءَ گزرانکی تباہی بیت ءُ دمگ ڈکال ءِ آماچ بیت. گزارش بلوچ راج ءِ بدیں جاورانی سر ءَ میان استمانی آگاھی ءُ ھمے رد ءَ گپ ءُ تْران ءِ پارست ءَ گزرانکی داشت ءُ مردمی کمک ءِ ’اشتاپیں لوٹ‘ ءِ سر ءَ زور دنت.

 بنشون: ریڈیو زرمبش بلوچی