چنکه ٹک دل‌برێجۆکێن ارش ءِ باروا که کلانتر 16 ءِ سر ءَ بوت ءُ پد ءِ پێشامداں

🔹شمبی ءِ سهب ءِ (17 تیر 1402) تهلێن ارش که زاهدان ءِ کلانتری 16 ءِ سر ءَ بوت، بازێن ایران ءِ مردمانی دلانَ ملک ءِ تها ءُ ڈن ءَ جسکێنت ئِے. پد شه ارش ءِ هلاسی ءَ که دو نپر شه بنجل ءِ واکاں کشگ بوت انت، لهتے شه سرکاری رساکندراں گۆں بنڈ آچاوگ ءِ شنگ کنگ ءَ مولانا عبدالحمید ءِ باروا زاهدان ءُ سیستان ءِ بلوچستان ءِ مردمانی دلان پدرد کرت.

آ ارش ءُ پد ءِ پێشامدانی باروا چنکه ٹک ءِ زانگ هژدری انت.

📌1. اولی ٹک آ پێشامد ءِ کنۆک ءُ آوانی مولءُمراد شه آ پکا ردێن ارش ءِ باروا انت. تاں نون انگت کارمستراں آ پێشامد ءِ ناشی ئێں  کنۆکانَ پچار نه کرتگ که باز په نازانتی بنجل ءِ سر ءَ که آزگ‌سمائێں جاگهے بوتگ، ارش اش کرتگ. په راستی اے پێشامد ءِ کنۆکاں گۆں چه عقل ءُ رهبند ءُ مولءُمراد ءِ اے پکا ردێن ارش ءَ را کرتگ. چۆنَ بیت که لهتے نپر سلاح زور انت ءُ رۆشنائێن رۆچ ءَ آ هم شمبی ءِ سهب ءَ که پهکێن واکاں آگاه انت ءُ وتی دیوانانَ برجم دار انت، بنجلے را گر انت، که آسرات ءَ چۆن بیت؟ زاناں چشێن زهگکی ئێں کارے مردمانی سۆب ءَ انت یا برورد ءِ دار ایت؟ په راستی مراد شه اے کار ءَ چے بوتگ؟ تاں نون انگ معلوم نه انت!

📌2. دۆمی ٹک اێش انت که گۆں اے پهکێن جست ءُ ٹوهێن ابهام ءِ هستی ءَ، انگت بنّامێن سرکاری رسانکدراں زوت ءَ زوت وتی ندان دست ءَ گپت ءُ گۆں وتی مدامی ئێن داب ءَ که اے آپ ءُ هاک ءِ امنیت ءِ بگێر ءَ نبشتگ اش، زاهدان ءِ آدێنگ ءِ امام، مولانا عبدالحمید ءِ باروا پاترپ ءُ زۆرگوشی ءَ بنگێج اش کرت.

تسنیم ءِ هالرسانی ءَ مولانا عبدالحمید ءِ بیانیه ءَ که آ پێشامد ءِ باروا شنگ بوت «دستپاچگی ءِ چێدگ» زانت ءُ واجه ءَ را آ پێشامد ءِ سبب ئِے زانت.   

نورنیوز که شورای امنیت ملی ءِ رسانک انت تاں نون بازێن برے مولانا عبدالحمید ءِ باروا بنڈ ءُ آچاوگ شنگ ئِے کرتگ، هم واجه ءَ را بے اێشی که نام ءِ گیت، بیهار ئِے دات.

جمهوری اسلامی ءِ رۆتاک ءَ هم بے اێشی که واجه مولانا عبدالحمید ءِ نام ءَ گیت، ماں گونڈێن نبشتانک ءِ آ تهلێن پێشامد ءِ سبب ءَ را هما مردمانی «ترندێن هبرانی برورد» زانت، که په آ رۆتاک ءِ گمان ءَ «شه نماز جمعه ءِ تریبون ءَ جهد کن انت تاں چاگرد ءِ تها بدگندی بیار انت.»

پمّن که یکے شه اے ملک ءِ لس نندۆکان آں ٹوهێن جستے انت که رسانکدرانی کارمستراں چنکه شموشکار انت یا چۆن وتی چم ءُ گۆشان بند انت تاں گواچنان مه گند انت ءُ مه اشکن انت. یکے نه انت که شه آوان سۆج کنت که اے پێشامد ءِ پڑا را مولانا عبدالحمید جۆڑ کرتگ یا آوان که هۆنێن جمعه ءِ جنایت ءِ سبب بوت انت ءُ دێمءُدرا دهاں مردم ءِ هۆن ءَ رێت اش؟! اے پێشامد ءِ سبب نماز جمعه ءِ «ترندێن هبر» انت یا آوان انت که جهد کن انت هۆنێن جمعه ءِ کنۆکان شه سزا ءَ رکێن انت؟! اے وتگڑێں سرکاری رۆتاک‌نبیساں چۆں توانتگ اے بن‌گپ ءَ نادلگۆش کن انت که هۆنێن جمعه ءِ پێشامد چنکه ماه انت مۆل دیگ بیت؟! گۆں اِنکه نادلگۆشی ءَ چۆں امێت دار ات که مردم ناوشنود مه بےانت؟!

اے چۆنێن هالتاک‌نبیس انت که ملک ءِ جاور ءَ چپیَ گند انت؟! چی ءَ شه همے ند ءَ شرم نه کن انت؟! چی ءَ شه «هالتاک‌نبیس» ءُ «هالکار» ءِ پاکێن نام ءَ شرم نه کن انت؟! ءُ وتی وار ءِ پد ءَ انت؟! کجام هالتاک‌نبیس ماں راجدپتر ءِ دراجی ءَ اِنکس شه مردمانی درداں ناسهی بوتگ ءُ آوانی نالگان نه اشکتگ ئِے ءُ آوانَ بیهار ئِے داتگ؟!

📌3. گڈی ٹک اێش انت که اے بیهاراں په آ مردماں که وتی دل ءِ بندانَ گۆں هۆنێن پچاں کلّ اش کرتگ ءُ ٹپ اش انگت چۆ اۆلی رۆچ ءَ آزگ انت، بےپۆک انت، بلکه جاور ءَ بدتر کن انت. اگه اے ملک ءِ کارمسترانی دل په اے هاک ءِ مردمانَ سُچ ایت، گڑا اے بدزبانێں رسانکانی دێم ءَ گر انت ءُ تۆجیلے درگێج انت. گۆں بیهار ءُ زۆر ءَ اے مردمانی سر ءَ، نه تهنا مشکلاں حل نه بےانت بلکه آیۆک ءَ دگه مشکل جۆڑ بیت ءُ اے آچش ءِ آچه ٹوهتر بیت./ سنی‌آنلاین