گواچن ءُ راستی مشکوکێن مردمے باروا که ماں مسیت مکی ءَ پجارگ بوت ءُ پدے پێشامداں

🔸اے رۆچاں سرکاری رسانکدر ءُ هالرساناں میاریگێن مردمے ءِ گپانَ که وت آیی دپ ءَ اش داتگ، شنگ کرتگ. آ مردک چنکه وخت پێسر ءَ ماں دارالعلوم زاهدان ءَ پجارگ بوت ءُ په گێشێن سرءُسۆج ءَ چێرێن اداره ءِ کارمندانی دست ءَ دیگ بوت.

🔹اے بن‌گپ ءِ گواچن اے رنگ انت که ماں مسیت مکی ءَ مشکوکێن مردمے گندگَ بیت. پد شه پٹءُپۆل ءَ زانگ بیت که شه مسیت ءِ طالبان نه انت. شه پٹءُپۆل ءَ پد پَدر بیت که اے مردک چنکه وخت انت چێرکایی ماں مسیت ءَ نشتگ ءُ اے درگت ءَ شه طالبان هاسێن جست ئِے کرتگ.

🔹آ اول ءَ لسَ پڑ ایت بلێن گڈسر ءَ بےزۆر ءُ ترپان ءَ گوش ایت که په جاسوسی ءُ شیخ‌الاسلام ءِ نزیکێن مردمانی پجارگ ءَ دارالعلوم زاهدان ءَ آتگ.

🔹وهدےکه شیخ‌الاسلام شه اے گپان سهی بیت واجه گوش ایت که آیی لۆگمان ءَ لۆٹ ات ءُ هماوانی دست ءَ دے ات ئِے.

🔹بلێن دێم شه آیی لۆگمان ءِ آیگ ءَ به زاهدان ءَ، آ دگه گپے جنت؛ آ دو کسے نام ءَ گیت که من ءَ زاهدان ءَ دێم اش داتگ تاں ادا یکے په من زهر بیار ایت که من گۆں آوان وتی دستانَ مُش آں ءُ پد ءَ گۆں واجه شیخ‌الاسلام ءَ دست‌کله بدے آں…

🔹اے گپ که واجه شیخ‌الاسلام ءَ رسێنگ بیت، واجه گوش ایت که امنی واکاں شه اے بن‌گپ ءَ سهی کنگ بےانت ءُ گهتر همێش انت که لۆگمان ءِ بدل ءَ چێرێن اداره ءِ واکانی دست ءَ دیگ بیت.

🔹یکشمبی ۲٨ خرداد ۱۴۰۲ ءَ ادار ۱۰ ءُ نێم شپ ءَ چێرێن اداره ءِ کارمندانَ سهی کن انت. آوان گوش انت که نون شپ دێر بوتگ، باند ءَ سهب ءَ کا اێں.

🔹آدگه رۆچ ءَ چێرێن اداره ءِ سرمستر ءِ کمک‌کار گۆں کاربلدے مسیت مکی ءَ کا انت ءُ آ مردک ءَ سرءُسۆج کن انت. آ مردک هم بےزۆر ءُ لٹءُشاپ ءَ وتی پهکێن هبران منّ ایت.

🔹مسیت ءُ وانگجاه ءِ کارمستراں پرێشی که بن‌گپ شه کانودی راه ءَ رندگیری بیت ءُ همےرنگ وتی حسن نیت ءَ نشان دےانت، مشکوکێن مردک ءَ امنی واکانی دست ءَ دےانت تاں پٹءُپۆل کن انت ءُ دارالعلوم زاهدان ءِ کارمسترانَ شه برورد ءَ سهی کن انت، بلێن ارمان که آوان په گواچن ءِ چێر دیگ ءَ گۆں سرکاری رسانکدراں درۆگ ءُ آچاوگ ءُ بنڈ ئے شنگ کنگ ءَ بنگێج کن انت. آوان گۆں اے کار ءَ نشان دات که سرکاری واک ءُ آمیدگسے سر ءَ هچ برۆسه ئے نێست ءُ البت که اے آوانی کُٹ‌تری ءِ چێدگ انت.

🔹اے چیز هم ٹک گوشگ بیت که اول ءَ شه دارالعلوم ءِ نێمگ ءَ اے باروا ماں رسانکدر ءَ چێزے شنگ نه بوتگ، بلێن وهدےکه لهتێن رسانکدر ءَ اے هال ءَ را شنگ کرت امنیتی واکاں شه دارالعلوم ءِ کارمستراں لۆٹ ات که شما گوش ات اے هال درۆگے. پمێشا شه آدێنگ ءِ امام ءِ کارگس ءِ نێمگ ءَ گێشواری بوت که مشکوکێن مردکے پجارگ بوتگ ءُ بن‌گپ پٹءُپۆل بیگ ءَ انت. پرێشی که مردم پرێشان مه بےانت، گێشتر چیزے گوشگ نه بوت.

🔹اێشرا هم گوش اێں که آ مردک ءِ لۆگمان ماں زاهدان ءَ شه امنی واکانی نێمگ ءَ گۆں زۆر ءَ آماچ بوتگ انت تا شه دارالعلوم زاهدان ءِ کارمستراں شکایت کن انت که آوان اے لۆٹ ءَ را نه منتگ.

🔹اێش هم الم گوشگ بیت که راستال ئے چێر دیگ ءُ زۆرێن استه گرگ گۆں لٹءُکٹ ءَ مئے رسم ءُ باور ءِ تها نه انت ءُ ما مدام آیرا نگد کرتگ.

🔹ٹکاٹک گوش اێں که آ هبراں که مردک ءِ دپ ءَ دیگ بوتگ ءُ ماں سرکاری رسانکدراں شنگ بوتگ انت پکائێن درۆگ انت. شاهگانێن پروپگانڈائے که سرکاری رسانکدراں بنگێج کرتگ، آچاوگ ءُ درۆگ انت. اگه آمیدگسَ لۆٹ اێت مزن‌رهشۆن ءِ سۆگهانی رد ءَ کرد کنت، گڑا شه اے رنگێن سرکاری رسانکدراں که گواچن ءَ چپکایی کن انت تاں لس مردمانی مجگ ءَ ٹگلێن انت، دێمداری کنت.

🔹یات به به اِت که آ لگورێن مردک ءِ گپاں که وتی مولءُمراد ءَ هورت درشان ئِے کرتگ ءُ همےپێم آ مردماں که آیرا پرے کار ءَ امر کرتگ آوانی نامانی هم گپتگ. آیی پهکێن گپاں ضبط بوتگ انت، که په دێمداری شه اێشی که مردم مه شۆر انت، شنگ نه بوت انت.

🔹اێشرا هم گوش اێں که لهتے شه دارالعلوم زاهدان ءِ کارمنداں که په همے نیمۆن ءَ آوار جنگ بوتگ انت، آوانَ هچ رهوتے گۆں اے بن‌گپ ءَ نێست ءُ مولءُمراد شه آوانی آوار جنگ ءَ سیاسی زۆر ءُ دارالعلوم زاهدان ءِ توار ءُ رسانکی جهدانی بند کنگ انت. وهدےکه لگورے که دێم اش دات ات سۆبێن نه بوت ءُ آوانی رهبند ءَ پرۆش وارت، نون شه وتی مۆٹۆیی ءَ اے آوار جنیانَ بنگێج اش کرت تاں دارالعلوم ءَ سکیانی آماچ کن انت.

📝زاهدان ءِ آدێنگ ءِ امام ءِ کارگس

7 تیرماه 1402