بےکاری ءُ ناداری، ڈکال ءِ ٹێکی

بےکاری ءِ کچءُکساس ماں سیستانءُبلوچستان ءَ 12.8 درصد انت. سرکاری کچءُکساسانی رد ءَ ماں 90 ءِ دهگ ءَ سراوان، ایرانشهر، زابل، سیب ءُ سوران، هیرمند، زهک ءُ سرباز هما بیست شهر ءِ لڑ ءَ بوتگ انت که آوان گێشتری بےکاران داشتگ ءُ اے استان پد شه خوزستان ءَ (گۆں 8 شهر ءَ) ماں اے بن‌گپ ءَ دوم بوتگ.

پێسر ءَ هم گۆریچانی شهرانی کارمستراں گوشت ات که بےکاری ءِ سبباں ماں اے شهراں ڈکال، کم آپی، هامون ئِے رۆد ءِ هشکی ءُ لوڈ ءُ دَزّ انت.

اے میانجین ءَ هامون ئِے مزن مێتگ که 5 هزار کیلومتر انت ءُ 130 هلک ءُ گێش شه 45 هزار آباتی دار ایت گێشتری نقصان ءَ را شه اے ڈکال ءُ بےآپی ءَ دیستگ ئِے. آ مزن مێتگ ءِ کارمسترانی گپانی رد ءَ گێش شه 40 درصد شه آیی مردماں بےکار انت که په کار ءِ جدءُهل ءَ زاهدان، یزد، رفسنجان، کرمان، تهران ءُ دگه شهراں شتگ انت.