شام ءِ بالی پٹ ءَ اسرائیل ءِ میزائل اُرش، دو پوجی کارندہ بیران

شامی لشکر ءِ گوشگ اِنت اسرائیل ءِ لشکر ءَ دو شمبے ءِ سھب ءَ میان‌اُستمانی بالی‌پٹ ءِ سر ءَ میزائل اُرش کرتگ چریشی ءَ دو پوجی بیران ءُ دو زدگ بیتگ اَنت.

ھال سرکنوکیں ایجنسی ایسوسی ایٹڈ پریس ءِ رد ءَ شامی لشکر ءَ اے درگت ءُ ابید ءِ سرجمی ءَ گوشتگ که دمشق ءَ میان‌اُستمانی بالی پٹ ءَ ھپت ماھانی توک ءَ اے دومی اُرش اِنت که چریشی ءَ نزیکیں دمگاں تاوانباری بوگ ءَ اِنت.

اسرائیل ءَ سر زاھر ءَ لبنان ءِ ھزب الله ءَ ھوار تھران ءِ پلامرزی‌کنوکیں ناشریں ٹولی ایران ءِ نیمگ ءَ سلاہ رسگ ءِ دارگ ءِ جھد ءَ شامی سرکار ءِ دستیگیں جاہ بالی‌پٹ ءُ بندرگاھاں نشانگ کنگ ءَ اِنت.

شام ءِ جنگی جاورھالانی سر ءَ نگاہ ایرکنوکیں گلے ءَ گشتگ که اسرائیل ءِ اُرشاں بالی‌پٹ ءَ ھوار دمشق ءِ زربار ءَ سلاھانی بنجل ھم نشانگ کنگ بیتگ.

برچانیه ءَ ھستین سیریئن آبزوریٹر فار ھیومن رائٹس ءَ گوشتگ که چار مردم بیران بیتگ اَنت دَہ جون ءَ دمشق ءَ میان‌اُستمانی بالی‌پٹ ءَ اسرائیل ءِ برزی اُرشاں انفراسٹراکچر ءُ رن ویز ءَ باز تاوان رس اتگ ءُ آ شر کنگ ءَ پد دو ھپتگاں رند پچ کنگ بیتگ.

ستمبر ءِ ماہ ءَ اسرائیل ءِ برزی اُرشاں شام ءِ مستریں شھر گوریچانی حلب ءَ میان اُستمانی بالی‌پٹ نشانگ کنگ بیتگ ات چریشی ءَ بازیں روچاں بند بیتگ اَت سال دوھزار ءُ بیست ءُ یک ءِ گڈسر ءَ اسرائیل ءِ جنگی بالیگاں میزائل لاطاکیه ءِ بندرگاہ ءَ کنٹینرز نشانگ کتگ ات اَنت چریشی ءَ اود ءَ آس چست بیتگ ات.

اسرائیل ءَ اے گپ پدر کرتگ ات که آ ایران ءِ ھمسنتیں ناشریں گلاں نشانگ کنگ ءَ اِنت چریشانی توک ءَ لبنانےَ ھزب الله نامیں گلے ھوار اِنت ایشی ءَ چه شام ءَ سروک بشار الاسد ءِ پوج ءِ پلامرزی ءَ ھزاراں جنگول راہ داتگ اَنت.

بن‌شۆن: دی بلوچستان پسٹ