- سنی آنلاین - https://sunnionline.us/balochi -

ما گۆں وت‌مستری ءَ سکّ مخالف اێں

شیخ‌الاسلام مولانا عبدالحمید، ماں زاهدان ءِ جمعه نماز ءِ دیوان ءَ (۹ دی ۱۴۰۱/ 30 دسمبر 2022) «وت‌مستری» ءِ بنڈ ءِ لچێنگ ءَ به ایرانی راجاں رد کرت ءُ گوشت ئِے: اگاں وت‌مستری لۆٹے ودی بیت آیی اۆلی اێر جنۆک ما بلوچ ءُ پارسی ءُ عرب ءُ ترکمن ءُ ترک ءُ لر ءُ آدگه ایرانی راج اێں.

🔹بائد جنێنانی حرمت ءُ حقاں کمار بےانت

په سنی‌آنلاین ءِ سرهال ءَ شیخ‌الاسلام مولانا عبدالحمید وتی هبرانی ائولی سر ءَ گۆں اشاره به زانتے کٹگے زلورت ءَ په جنێناں تچکاتچک گوشت: هماپێم که زانت په مردێناں هژدری انت په جنێناں هم هژدری انت. اے ردێن سسائے که کسے گت کنت جنێناں تهنا په زهگے رۆدێنگ ءُ گسے کاراں جۆڑ بوتگ انت. جنێنانَ توان انت زانشت‌جاه ءُ دینی‌وانگجاهانَ راه بر انت، توان انت نبیسۆک ءُ کواس بےانت ءُ دنیا ءِ مردمانَ بوانێن انت. الله پاک ءَ جنێنانَ بودشت داتگ. بائد به هل اێں جنێناں درس بوان انت ءُ حرمت ءُ حقان اش کمار بےانت.

🔹منی باور اێش نه انت که پاگواجهاں ملکے سرۆک بےانت

🔹نه جاه ءُ نه نامءُتوارے پد ءَ آں

مولانا عبدالحمید درّائێنت: اے گپاں که من ادا گوش آں، بس پرێشی انت که وتی اگده ءَ ادا کن آں، من ایران ءِ پهکێن مردمان ءُ سرکار ءِ خیر ءَ لۆٹ آں. اگاں من سرکارے باروا گپے جن آں په آیی خیر ءَ انت ءُ آگاں استمان ءَ چیزے گوش آں هم په دێمپان شه آیی حق ءَ انت. منی جند ءَ هچ لۆٹے نێست.

مولانا عبدالحمید «جاه لۆٹی» ءُ «نام‌ءُتوار» ءِ بنڈانی باروا گوشت: ما جمهوری اسلامی ءِ پله‌مرز بوتگ اێں ءُ مدام ماں گچێنکاریاں بهر زرتگ اێں، بلێن اێشرا ذمه‌واراں زان انت که من هچ چیزے شه حکومت ءَ نه لۆٹ اتگ آں. یک برے گوشت اش که ما جمعهانی امامانَ ماشین دےآں ءُ شما را هم یکے دے اێں ءُ نهادے گر اێں. من گوشت من شمے ماشین ءَ سوار نه به آں. آوان که گت کن انت من جاه ءُ نامءُتوارے پد ءَ آں زان انت که چش نه انت. منی واهشت دو چیز انت؛ یکے مردمانی دنیا ءِ آبادی ءُ آزاتی ءُ آمیدے کٹگ که ایران ءِ مردمانی حق انت. دۆمی اے مردمانی آدگه دنیا ءِ آبادی ءُ مرادی آں که مردم الله ءَ وشنود کن انت. من تهنا آ دنیا یا تهنا اے دنیا ءَ په شما نه لۆٹ آں، بلکه هردو دنیا ءِ وشبهتی منی واهشت انت.

زاهدان ءِ جمعه ءِ امام ءَ گوشت: من وتی نونێن زندگی ءَ شه بادشاهی ءُ هر جاهے گێشتر پسندَ کن آں ءُ په پاگواجهاں هم همێشرا لۆٹ آں. منی باور اێش انت که پاگواجهاں وتی بنداتی اگدهانَ لچ انت، منی باور اێش نه انت که پاگواجه ملکے سرۆک بےانت، بلکه کاربلداں ملکے سرۆک بےانت.

🔹مئے کرداراں سبب بوتگ انت که لهتے جنێناں سرپۆشانَ سۆچ انت

مولانا عبدالحمید گۆں انتقاد شه زهرشانی کنۆکێن بانۆکانی بندیگ کنگ ءَ گوشت: من بهمانگ آں که پچے جنێنانَ بندیگَ کن انت! اگاں منی دست ءَ‌ بوتێن یکے شه اے جنێنانَ ماں بندیجاه ءَ نه هشت آں، مگه آ جنێنے که انچێن جرمے کرتگ که بکشایگی مه بیت، نه که تهنا زهرشانی ئِے کرتگ ءُ وتی سرپۆش ءَ سُهتگ ئِے. ما سبب بوتگ اێں جنێناں وتی سرپۆشانَ سۆچ انت. واکانی کرداراں گۆں بانۆکاں وش نه بوتگ که آوان اش تێلانک داتگ ءُ ماشینے تها ایر داتگ.

🔹مئے مالءُمڈی گۆں ملکاری ءَ جۆڑ بیت

زاهدان ءِ جمعه ءِ امام ءَ ملک ءِ رۆزیگی مشکلانی سبب ءَ را ردێن ملکاریاں زانت ءُ گوشت ئِے: اگه من اگدهے داشتێں یک سیاسی بندیگے را ماں بندیجاهاں نه هشت آں. مئے مالءُمڈی گۆں ملکاری ءَ جۆڑ بیت. شما یک رۆچے ملک ءَ منی دست ءَ دے ات من پهکێن سیاسی بندیگانَ آزاتَ کن آں، گڑا گند ات که چۆنێن اثرے ماں مالءُمڈی ءَ دار ایت.

واجه ءَ شه سکیانے که چاگرد ءِ وڑوڑێن پاٹیاں گۆں آوان آماچ انت انتقاد کرت ءُ گوشت ئِے: واجه رسول‌الله صلّی‌الله‌علیه‌وسلّم ءَ درائێنتگ: هرکس گونڈلانی سر ءَ‌ رحم مه کنت ءُ پیرێنانی حرمت ءَ مه دار ایت، شه ما نه انت. بلێن ما اشکن اێں که ده، دوازده سالگێن زهگکاں ماں بندیجاں بندیگ انت. اے زهگکانَ پنت دےانت، بلێن بندیگ مه کن ات. برے زهگکاں گرانێن حکم دیگَ بےانت. وهدےکه زهگکاں جرمے هم کن انت ءُ کسے را هم کش انت، قتل عمد مارگَ نه بیت ءُ قتل خطا بیت. اے که زهگکانَ ماں بندیجاهان دارگ بےانت تاں وهدےکه بالغ بےانت ءُ پد ءَ پاهو دیگ بےانت، رد انت. جرمے کنگ ءِ وهد اعتبار دار ایت.

🔹ماں دینے که آیی تها درگوزگ مه بیت هچ خیرے نێست

مولانا عبدالحمید همےرنگ گوشت که پاگواجهانَ دستگر مه کن ات ءُ آمیدگساں مه لۆٹ ات. وتی مشکلانَ گۆں پاگواجهاں گۆں ترانکاری ءَ حل کن ات. ماں دینے که آیی تها درگوزگ مه بیت هچ خیرے نێست. آ بندگاں که رحم دار انت، الله هم آیانی سر ءَ رحم کنت ءُ الله بےرحمێں بندگانی سر ءَ رحم نه کنت.

واجه ءَ درائێنت: تایباد ءُ خراسان ءِ پاگواجهاں تهنا بیانیه ءِ دات ات ءُ دگه کارے نه کرت ات، بلێن پمێشی سبب هم لۆٹائێنگ بوتگ انت. انتقادان منّ ات، اے په شمے سۆب ءَ انت، اگاں انتقاد مه بیت گڑا زۆرغنڈی بیت ءُ چاگرد هم اصلاح نه بیت. الله ءِ بندگ انتقاد ءَ پسند کن انت، کسے که جوانێن انتقاد دار ایت، هبرے سگّ ات. بائد وتی سستیانَ گند اێں، پاگواجه ءُ حاکماں سستی دار انت، بائد مردمانَ دلگۆش کن اێں.

🔹کردارانی پار ءَ شه اسلام ءَ دلسرد مه به ات

مولانا عبدالحمید ذمه‌وار ءُ حاکمانی کردارانی گستایی ءِ باروا شه دین ءَ درشان کرت: من اے ٹک ءَ مرۆچی گوش آں که ایران ءِ درّێن مردماں چه ملکے تها انت یا ڈن ءَ، اگاں مرۆچی شه من سستی ءِ دیست ات، شه دین ءَ دلسرد ءُ دور مه به ات. اگاں دین ءَ لۆٹ ات به محمد رسول الله صلّی‌الله‌علیه‌وسلم ءُ صحابه ءُ اهل‌بیتانی زندمانی ءَ دلگۆش کن ات. بلێن حاکم ءُ ذمه‌وار ءُ مردمانی کردارانی پار ءَ شه اسلام ءَ دور مه به ات.

🔹جمهوری اسلامی ءِ کانود اِلگِش دار ایت، بلێن همایی رد ءَ هم کرد نه بیت

واجه شیخ‌الاسلام ءَ گۆں انتقاد شه نابرابراں که ایران ءِ استمان آماچ انت، تچکاتچک گوشت: ایران ءِ استمان ابید شه آمید ءُ آزاتی ءَ دگه چیزے نه لۆٹ انت. همے چیزانی پار ءَ ایران ءِ استمان ءَ ماں سال 57 ءَ انقلاب کرت، اے چیزاں دنیا ءِ پهکێن مردمانی حق انت. نبائد جنێن ءُ مردێنانی حقانی باروا نابرابری بیت. نون تیوگێن ایرانیاں شه اے نابرابریاں دلگران انت. کانود هم الگش دار ایت، که من ادا آوانَ نه گوش آں، بلێن همایی رد ءَ هم کرد نه بوتگ.

واجه ءَ همےپێم درائێنت که ایران ءِ استمان وت‌مستری لۆٹ نه انت ءُ اگاں چشێن کسے بیت گڑا ما آیی اۆلی مخالف اێں. ایران ءِ پهکێن راجاں یکےانت ءُ بائد حقان اش کمار بےانت.