په هچ سرکارے وش نه انت که وتی استمان ءَ کُش ایت

شیخ‌الاسلام مولانا عبدالحمید، ماں زاهدان ءِ جمعه نماز ءِ دیوان ءَ (۲۲ مهر ۱۴۰۱) گۆں اشاره به ملک ءِ زهرشانیاں «تهے ءُ ڈنے ملکاریانی بےپۆکی ءَ» را شه زهرشانیانی سبباں زانت ءُ شه ملک ءِ مزنێن ذمه‌واراں لۆٹ ات ئِے که مردمانی وڑوڑێں پاٹیانَ گند انت ءُ استمان ءِ توار ءَ بُشکن انت.

په سنی‌آنلاین ءِ سرهال ءَ شیخ‌الاسلام مولانا عبدالحمید گوشت: بیست رۆچ انت که مردماں زهرشانیَ کن انت، مئے سۆگه اێش انت که اێشرا دلگۆش کن اێں که پچے مردماں زهرشانیَ کن انت. اگاں گواچن ءَ چار اێں تهے ءُ ڈن ءِ ملکاریانی بےپۆکی ءَ گند اێں. وهدے ملکے ءِ ملکاری بےپۆک بےانت ءُ مشکل جۆڑ کنت، پکّا زهرشانی ءِ سببَ بیت.

🔹 مظلومانی آه بێران کنۆک انت

واجه ءَ گۆں اشاره به زاهدان ءِ هۆنێں جمعه ءِ پێشامد ءَ درّائێنت: «پێسریگێں جمعه ءَ باز ٹوهێن ظلمے ادا بوت. من ستک آں ءُ قسم ور آں که الله شه اے ظلم ءَ ناوشنود بوت؛ پچےکه ما پهکاں همدا ات اێں ءُ دیست اێں که چۆن بوت. اے بےگناهێں مردمانی کشگ الله ءِ دێم ءَ تاوان دار ایت. ما شه مردماں لۆٹ ات که امنیت ءَ سات انت ءُ شه آوان منت‌وار اێں که اے سۆگه ءَ را کمار اش کرت. ما انگت گپَ کن اێں، مئے گپاں خێرێن گپ انت، بلێن ما دیستگ که مظلوم ءِ آه بێران کن انت. اے مردمانی سر ءَ ظلم بوت ءُ الله گواه انت که ناحق ءَ کشگ بوت انت.»

زاهدان ءِ جمعه ءِ امام ءَ ٹکاٹک گوشت: مئے لۆٹ شه ذمه‌واراں اێش انت که بن‌گپ ءَ پٹءُپۆل کن انت. تاں وهدے آوان که مردمان کشتگ مجازات مه بےانت، مردماں وشنود نه بےانت.

🔹 اے مردماں زر ءُ نان ءِ گلام نه انت

مولانا عبدالحمید زهرشانیانی همگرنچ کنگ ءَ را تهنا گۆں رۆزیگی مسائلان هم رد زانت ءُ گوشت ئِے: راست انت که ملک دشمن دار ایت که لۆٹ انت سرکار ءُ استمان ءِ میانجینا جتایی بیار انت ءُ شه اے بابت ءَ مردمانَ شۆرێن انت، بلێن چوناهی ءَ مردم هم بازێن مشکلے دار انت که تهنا رۆزیگی نه انت. آوان که تهنا چشێن گپے جن انت سک رد انت. مردماں آزاتی ءُ حرمت لۆٹ انت. اے مردم زر ءُ نانے گلام نه انت، بلکه وتی عزت ءُ آزاتی ءَ لۆٹ انت.

🔹 درێگے ذمه‌واراں ایران ءِ تیوگێن استمان ءَ را دیستێن

زاهدان ءِ جمعه ءِ امام ءُ درشان کرت: مئے ملکے تها وڑوڑێن راج ءُ مذهب هست، اے چیز ءَ الله ءَ جۆڑ کرتگ ءُ آیی پسند انت، بائد ما هم اے چیز ءَ من اێں. تیوگێن مذهبانی حرمت دارگ بیت ءُ آوانی آزاتی دیگ بےانت. به هل ات پهکان گپ کن انت. درێگے ملک ءِ ذمه‌واراں بےغرضێن مردم بوتێن انت ءُ پهکانی گپان گۆش اش کرتێن.

مولانا عبدالحمید درائینت: نبائد گۆں زهرشانی کنۆکان ترندی بیت ءُ دشمن زانگ بےانت، هچ سرکارے ءِ حق نه انت که وتی استمان ءَ لٹءُکٹ کنت ءُ کش ایت، پچےکه شمے پله‌مرز همے مردم انت، اگاں سرکارے وتی استمان ءَ شه دست دنت گڑا کے آیی پله‌مرز بیت؟ اگه منی دست ءَ حکومتے بوتێن الم گۆں مردماں مدارا کرت آں. ذمه‌واراں مردمانی توار ءَ بشکن انت ءُ آوانی لۆٹان پسۆ دے انت.