مولانا ھدایت الرحمان: سیمسر ءَ آجوئی کارءُبار مئے ھک اِنت

ھک دو تحریک ءِ راھشون مولانا ھدایت الرحمان بلوچ ءَ مروچی پنجگور ءَ سر بوتگ کہ آ چاردہ چار راہ ءِ سر ءَ وش آتک کتگ ءُ آ گاڑیانی مُچی ءِ دروشم ءَ پنجگور چتکان بازار ءَ بسم اللہ چار راہ ءِ سر ءَ مچی جاہ ءَ سر بوتگ.

مولانا ھدایت الرحمان ءَ ھک دو تحریک ءِ برجم داشتگیں مچی ءَ تران کنان ءَ گْوشتگ کہ ما را چیریں تاکتانی کاردار گشوک اے بہ گوش اَنت باپ پارٹی ءُ آئی ءِ وزیراعلیٰ کجام تاکتانی رُستگین اَنت کہ آ وزارت اعلیٰ ءِ کرسی ءِ سر ءَ نندارینگ ءِ ھاتر ءَ شاتکام گندگ بوتگ اَنت.

مولانا ھدایت الرحمان ءَ گْوشتگ کہ سیمسر ءِ سر ءَ ایف سی ءِ ساڑی بوگ ءَ ھچ وڑیں سبب نیست سرجمیں مستری ءَ دمگی انتزامیہ ءَ ئے دست ءَ بدے اَنت ایف سی ءَ داتگیں پولیس مستری ءَ ھم واتر پچ بگر اَنت.

آئی ءَ گْوشتگ کہ سیمسر ءَ آجوئی کارءُبار مئے ھک اِنت پنجگور راج ھک دو تحریک ءِ ھمراھداری ءَ بہ کن اَنت سیمسر ءَ ٹوکن سسٹم ھلاس بیت دلجم بہ بہ اِت.

مولانا ءَ گْوشتگ کہ ایف سی ءُ دگہ ادارہ روگن ءُ ڈیزلاں گر اَنت بلے نشہ چو سرزاھر دمک ءُ بازاراں بھا بیت اے ادارھاں گندک نیا اَنت.

آئی ءَ گْوشتگ کہ راجی جیڑہ ءِ ھلاس بوگ ءَ تاں مئے تھریک برجاہ بیت ءُ اگاں صوبائی ھکومت کھولانی پاسداری نہ کُت گڑا انچیں نندانک ءُ زھرشانی کن ایں چریشی ءَ ھکمرانانی در ءُ دیوال جُنز اَنت راج دل ءَ چہ تُرس ءَ در بہ کن اَنت ءُ زُلم بے انساپیانی بگیری ءَ پڑ ءَ در بیا اَنت نو اے وڑ نہ بیت پوج ءِ مردم دگانی سر ءَ مئے مات گوھار کماشانی بےعزتی بہ کن اَنت ما بے تواریں ندارگ پیلو بہ کن ایں.

مُچی ءَ پیپلزپارٹی ءِ شاہ حسین ءَ تران کنان ءَ گْوشتگ کہ بلوچستان راج ءِ سکّیانی سر ءَ راجدوستانی بے تواری سوالیہ نشانی ریکوڈک ءَ ھوار دگہ مڈیانی لُٹ ءُ پلاں اے بے تواری ءِ شکار اَنت وھدے راج ءِ سر ءَ زوراکیانی بگیر ءَ یکے گپ بہ کنت آئی ایجنٹ گوش اَنت.

آئی ءَ گْوشتگ کہ سیمسر ءَ چہ تھنا لھتے مردماں پائدگ رسگ اِنت لَس مھلوک تیل ءُ گیس ءِ گرانبھائی ءَ زورگ ءَ لاچاراں.

آئی ءَ گْوشتگ کہ لَس مھلوک ءِ پائدگ ھاتر ءَ ما جُھد کنگ ءَ ایں.

گوستگیں صوبائی وزیر غلام جان بلوچ ءَ گْوشتگ کہ الم جانسلامتی ءُ کارءُبار ءِ سر ءَ ما گپ مہ کن ایں گُڑا کے کنت راج ھک دے تھریک ءِ ھمراھداری ءَ بہ کنت.

اشرف ساگر ءَ گوشتگ کہ ھک دے تھریک سیمسر ءِ گپ سر ءَ اوشتاتگ راج ءِ مولانا ءِ مچی ءَ مزنیں کچے ءَ بھرزورگ ءِ آیانی یکینی ءِ اسر اَنت.

سرچمگ: دی بلوچستان پست