- سنی آنلاین - https://sunnionline.us/balochi -

علم ءُ زانت

مرۆچیگێں اے دور بیست ءُ یکمی کرن گشگ بیت اے دورءَ وانگ ءُ زانگ سائنسی علم ءُ منطق مزنێں ارزشتی دار اِیت پرچێکه یک راجےءِ ترقی ءُ دێمروئیءِ تیوگێں دارءُمدار گۆں وانگءُزانگءَ اِنت. بزان یک راجےءِ سیاسی، معاشی، معاشرتی، اقتصادی، اخلاقی، ادبی ترقیءِ دارءُمدار گۆں علمءَ همگرنچ اِنت پرچێکه وانگءُزانگ هما سِلا اِنت که آ یک چاگردے تها تیوگێں هرابیان چه رۆتگان وَل‌گوَج کنت.
علم بنی‌آدمءَ را یک شرێں ءُ جوانێں زندےءِ راهءَ پێش دار اِیت علم هما روشنائی اِنت که آئیءَ هچ تهاری نێست علمءِ روشنائیءِ سوب اِنت که مرچی تیوگێں جهان چه علم ءِ رژنءَ درپشگ ءَ انت.
چوشکه علمءِ معنی زانگ ءُ مارگ انت بنی‌آدمءَ مرۆچی ماهءِ سرا گام اێر کتگ انت. همے علمءِ سببءَ مرۆچی انسان نۆک نۆکێں ٹیکنالوجی ایجاد کنگءَ انت یک مردمے که علم حاصل کنت ءُ شرێں سرپدێں مردمے جۆڑ بیت چاگردءَ را یک شرێں شرفءُ عزتے بخشائیت. آئیءِ کردارءِ تۆک ءَ پختگی کێت انت. آئیءَ را باعمل ءُ باکردار جۆڑ کنت. وتی حقانی گرگءِ راهءَ پێش دار اِیت، علم بنی‌آدمءَ را چه جهالتءِ تهارێں شپان کشّ ایتءُ رژن ءُ آگهی بخشائیت مردم هر چیزءِ نێک ءُ بدءَ زانت.
بلے هما مردم که آئی علم در نه برتگ ءُ هچ نزانتءُ آ را هچ پێم شریءُ هرابی ءِ پرک نه‌اِنت پرائی زندءِ گوازێنگ یک بلائێں اڑے جۆڑ بیت ءُ هر هما مردم که علم ءُ زانت ءَ وتی مکسد زانت ته آ هچ وهدءَ ناکامی ءُ نامرادی نه گنداِیت بلے هما مردم که علمءَ چه دور بوتگ ءُ نه‌ونتگے آئیءِ نزینکءَ تیوگێں جهان تهاراِنت.
یک کوّاسےءِ قول انت که علم مسلمانءِ گار بوتگێں مال ءُ مڈی اِنت چه هرجاگه ءَ دست کپت بزوراِش. درستێں هبرانی مکسد همێش انت که دنیاءِ هرچ کارے به بیت بےجهد ءُ کۆشستءَ دربرگ نه بیت همےپێم علمءِ دربرگ ءِ هاترءَ بازێں جهد پکارانت. پیرێنان گشتگ جهد بکن ترا سوب‌مندی الّم ءَ رس اِیت.
سرچمگ: تاکبند گدان