شیخ‌الاسلام مولانا عبدالحمید، ماں زاهدان گونڈێن ائیدِ نمازے دیوانا (پنچ شمبی23 اردیبهشت 1400) گوں اشاره به اێشی که مردمان ناراضگی سبب بوتگ که گڈی اێں سالان ماں گچینکاریان کم شرکت کن اَنت، سکّ سۆگهِ کرت که وڑ وڑێں پاٹیانِ صلاحیت تأیید بیت تا ماں گچێنکاری ءَ هور بَےاَنت.
په زاهدانِ اهل‌سنتے جمعه‌وے پیشنمازے کارگسے هال‌رسانی‌ئے بنجاهے سرهالا، شیخ‌الاسلام مولانا عبدالحمید درشان کرت: ٹوهێں دل ۆ پراهێں دیدانک په ملک ۆ حکومتے نفع ءَ اِنت. مئے سۆگه په ذمه‌واران ۆ آوان که مهمێں اگده دارنت اێش اِنت که وتی دیدانک ءَ پراه کن اَنت.
واجه ءَ گوشت: صلاحیتے رد کنگ چه ماں شوراهانِ گچێنکاری ءَ بیت یا راجکماشی گچێنکاری ءَ وشێں ۆ جوانێن کردے نه اِنت ۆ توانت که په ملکے ۆ حکومتے ضرر ءَ بیت. هچ دورچارۆکێں ایرانی ءِ اے بازێن ردّ صلاحیتانَ پسندَ نه کنت. په اے واسته ءَ گچێنکاری ءَ راجی مه کنێں، بلکه دلا ٹوه کنێں ۆ به هلّ اێں هرکس گوں وڑ وڑێں دیدانک ءَ ماں راجکماشی گچێنکاری ءَ بهر زور اِیت.
زاهدان جمعه ئے اماما گێش کرت: ما نه گوش اێں آوان که نالائق اَنت هم صلاحیت اِش تأیید کنگ بیت، بلێن آوان که وس ۆ زانت ۆ تدبیر ۆ مدیریت دارنت صلاحیت اِش تأیید بیت ۆ استمان اختیار دَیَگ بیت که یکے را گچێن کنت.
واجه ءَ گوشت: مردم زبرَ زان اَنت که کے را گچێں کن اَنت. مردم شه امّا دێما اَنت ۆ گهتر ءَ زان اَنت که کے په ملکے خیر ءَ اِنت. مردمانَ په گچێن ءَ آزات به هل اێں ۆ گچێنے اگده ءَ آوانِ بڈا پرێن اێں که شه هر پاٹی ئے لۆٹ اَنت گچێں کن اَنت.
شیخ‌الاسلام مولانا عبدالحمید وتی هبران دێمترا گوشت: اپسوز اِنت که شه انقلابے چل ۆ دو سالے عُمر ءَ، اے گڈی اێں سالان مردمان، هم شیعه ۆ هم سنیان به خاطر ناراضی بوتن شه انقلابا باز کم مه گچێنکاریان شرکت اِش کرتگ.
واجه ءَ گێش کرت: مردمان گوں ناداری، بےوسی، بےکاری ۆ رۆزێگی سکّیان آماچ اَنت، مردمان زر ۆ مالان شه ارزشت کپتگ اَنت. اپسوز اِنت که روزیگی فساد ۆ اختلاسان هم ماں ملک ءَ باز بوتگ اَنت. بعضے وخت ءَ اشکنگ ءَ بیت که باز ٹوهێن پول شه بیت المالا اختلاسَ بیت بلێن ذمه‌وارانَ نه توان اَنت آوانِ دێما گر اَنت.
دارالعلوم زاهدان سرمستر ءَ گێش کرت: پچے مئے ملکے تها بیت المال که گردِ استمان ءِ حق انت هولَ بیت؟! اے اختلاسانَ بعضے وخت ءَ انچێن مردمَ کن اَنت که وت ءَ مسلمان ۆ پلگارکار نشانَ دَےانت ۆ نماز ۆ راهپیماییانِ صف اول ءَ اَنت، بلێن پدا اشتر ءَ گوں بار ءَ بر اَنت.
واجه ءَ درشان کرت: اے ایرانے نندوکانِ حق اِنت که شه ذمه‌واران گِلَگ ۆ انتقاد کن اَنت که پچے بیت المال ءَ را حفاظت اِش نه کرتگ. اے اختلاس ۆ فسادان خطرناک اَنت ۆ ملک ءَ مۆٹۆ ۆ بدبختَ کن اَنت.
🔹اهل‌سنتان لۆٹ شه جمهوی اسلامی ءَ تنها عدالتے اجرا کنگ اِنت
زاهدان جمعه ئے اماما وتی هبران دێمتر ءَ خاصکار به اهل‌سنتان مشکلان اشاره کرت و گوشتِ: اهل‌سنتان هم ایرانی اَنت و ایرانے گرد استمان قانونے دێما برابر اَنت. بنیادی قانونے برابر ءَ اهل‌سنتَ نه توان اَنت راجکماش بَےانت، بلێن په وزیری ۆ راجکماش ءِ معاون ۆ دگه مهمێن اگدهان هچ مکنے نه بوتگ، بلێں اهل‌سنتان ابید شه چنکه نپر ءَ ماں پارلمان ءَ دگه مهمێں جاهان هور نه اَنت.
🔹اول اهل‌سنتانِ لۆٹانَ رسیدگی کن اِت گڑا په آوانِ شرکت ماں گچێنکاری ءَ چم ۆ چاری بَےاِت
زاهدان جمعه ئے اماما گوشت: شما لۆٹ اِت که اهل‌سنتان ماں گچێنکاری ءَ شه شیعه یان هم دێمتر ءَ بَےانت، بلێن اول نابرابریانَ زور اِت ۆ وڑ وڑ اێں پاٹیانِ دلا دست بیار اِت ۆ اهل‌سنتانِ مذهبی آزاتیانَ مه گرد ملک ءَ دَےاِت گڑا اگه لۆٹ اِت ما ماں گچێنکاری ءَ شه شیعه یان هم دێمتر ءَ بَےاێں.
واجه ءَ درشان کرت: ماں ایرانے حکومت ءَ مهمێں اگده شیعه اێں پاگواجهان دستا اَنت ۆ اهل‌سنتێں پاگواجهان هچ اگده ئے نه دارنت، بلێن اگه مئے دستا بوتێں به الله ناما قسم که ما طورے کردار کرتێں که مئے شیعه اێں براسان په امّا دعا کرتێں. واجه ءَ گوشت شیعه یان پاگواجهانِ کردار گوں اهل‌سنتان اے ملکے تاریخے تها مانیت، پرێشی واسته ءَ جهد کن اِت که نێکێن نامے شه شما مانیت.
🔹جهانی چاگرد فلسطین ۆ اسرائیل جێڑه ءَ عادلانه گێش ۆ گیوار کنت
شیخ‌الاسلام مولانا عبدالحمید ماں دگه بهرے شه وتی هبران اسرائیل اُرش ءَ فلسطینانِ سرا سکّ اێر جت ۆ گوشتِ ما اے هورکشی ءَ اێر جن اێں ۆ امێت دارێں که جهانی چاگرد په اے جنگ ۆ جێڑهان گێش ۆ گیوار ءَ جهد کنت که فلسطینی وتی حق ءَ رس اَنت ۆ جتا اێں ملک اِش جۆڑ بیت.