سنیآنلاین| مولانا محمد دهقان، حدیث ۆ فقهئے زبردستێن استاذ ۆ گشتِ سراوانے «عینالعلوم» دینی وانگجاهے اداریئێن معاون شنبهئے شامے وهدا (3 آبان 1399/ 7 ربیعالاول 1442) په ناجوڑیئے سوَبا ماں زاهدانِ “خاتمالأنبیاءِ” نادراهجاها ماں 82 سالگیا کوڑهیں دنیائا یل دات ۆ دێم په وتی ابدمانێن جاها رهدگ بوت.
اے مزن زانتکارے نماز جنازه مرۆچی یکشمّبیا (4 آبان/ 8 ربیعالاول) ساعت 17:30ئا ماں گشت مێتگے عیدگاهئا برجمدارگَ بیت.
په سنیآنلاینِ سرهالا، مولانا محمد دهقان عینالعلوم گشت دینی وانگجاهے ناظم ۆ فقه ۆ حدیثے استاذ بوته. وفاتے وهدا مولانائے عمر 82 سال بوته. په مولانائے خاندانانِ بیانهئے ردا مولانا دهقانِ نماز جنازه مرۆچی پد شه رۆنشتنا ماں گشتِ عیدگاهئا برجمدارگَ بیت.
بازێن پولکار ۆ زانتکاران چۆ مولانا عبدالحمید، کُلهئے مولانا دهقانِ وفاتا را تسلیت گوَشت ۆ وتی دلپدردیا را اے باروا جارش جت. مولانا عبدالحمید، مولانا دهقانا را یکے شه «سیستان ۆ بلوچستانے اهلسنتان دینی وانگجاهان شورائے» بنهشت اێرکنوکان زانت که تاں آخری دما هزمتِ کرت، کسّے که گوں شیخالحدیث مولانا محمدیوسف رحهمهاللهئا گونات ۆ مدام آ واجهئے کرّا ات.
واجه شیخالاسلاما گوَشت که زانتکارێن پاگواجهئانِ وفات په مسلمانان ٹوهێن تاوانے ۆ آدگه پاگواجهئانِ اگدهئا گیشَ کنت، پچے که آوان وتی اگدهئانِ کِرّا بائد آ زانتکارانِ کارانَ که وفات بوتگنت، هم دێما برنت.
مولانا دهقان سراوانِ مزن مێتگا، ماں «بخشان» ڈیهئا ودی بوت. ائولی سبکّانَ مولانا عبدالواحد گشتی (حضرت صاحب) ۆ مولانا محمدیوسف حسینپورِ دێما وانتِ ۆ پدا پاکستانا شت. مولانا دهقان سابعه ۆ دوره حدیثا ماں دارالعلوم کراچیا وانت ۆ همۆدا سبکّا را ماں 1383قمریا هلاسِ کرت. آیرا ماں دارالعلوما اے وار رست که شه آدگه پاگواجهئان په درور مولانا محمدشفیع، پاکستانے دێمے مفتی، مولانا رشیداحمد لدھیانویؒ، مولانا اکبرعلی، مولانا سحبان محمود، مولانا سلیم الله خان رحمہم اللہ ئا هم سۆبمند بیت.
مولانا دهقان (رحمه الله علیه) ماں راولپنڈیا دو گشت مولانا غلامالله خان دێما ۆ یک گشت مولانا عبدالله درخواستیِ دێما دورۀ تفسیرِ وانت ۆ گڑا په ملکا بِرگشت.
مولانا محمد دهقان (رحمه الله علیه) 8 ربیع الاول 1442 ئے سهبا پد شه 53 سال وانێنۆکیا ماں عین العلوم گُشتِ وانگجاها، وفات کرت.
اللَٰهُمَّ اغْفِرْ لَهُ وَارْحَمْهُ وَعَافِهِ وَاعْفُ عَنْهُ وَأَكْرِمْ نُزُلَهُ وَوَسِّعْ مُدْخَلَهُ وَاغْسِلْهُ بِالْمَاءِ وَالثَّلْجِ وَالْبَرَدِ وَنَقِّهِ مِنْ الْخَطَايَا كَمَا نَقَّيْتَ الثَّوْبَ الْأَبْيَضَ مِنْ الدَّنَسِ وَأَبْدِلْهُ دَارًا خَيْرًا مِنْ دَارِهِ وَأَهْلًا خَيْرًا مِنْ أَهْلِهِ وَزَوْجًا خَيْرًا مِنْ زَوْجِهِ وَأَدْخِلْهُ الْجَنَّةَ وَأَعِذْهُ مِنْ عَذَابِ الْقَبْرِ.