گوں ملکے تهئے ؤ ڈنّے سیاستانِ تعدیل کنگا زرّے ارزشتا برگردینت

شیخ‌الاسلام مولانا عبدالحمید مان اهل‌سنتے جمعه نمازے گپان تها (27 تیر 1399) گوشت: تعدیل مان ملکے تهئے ؤ ڈنّے سیاستانِ توکا، مردمانِ کانونی آزاتیانِ گیش کنگ ؤ اعدامے حکمے زورگا اے ملکے زرے ارزشتا برگردینت.
شه زاهدان اهل‌سنتے جمعهٔ پیشنمازے دفتر حال رسانی حالا، واجه شیخ‌الاسلاما درشان کرت: کروناوا مچ دنیائا گپته، البت آوانِ زرے سرا بازین اثرے نه هشتهءِ، بلین مئے ملکے تها ما را همِ گپته ؤ مئے زرے ارزشتا هم جهل آورته.
مولانا عبدالحمید گوشت: چو ٹوهین رهشونے هبرا مئے اقتصاد ناجوڑنت. مئے سؤگه ایشنت که اے ناجوڑی بائد آسیب‌‌شناسی ؤ پٹ ؤ پؤل بیت، پچے که هر مشکل و سکّی مان دنیاوے تها باید پٹ ؤ پؤل بیت. واجها گیش کرت: اگه ملکے اقتصاد آسیب‌شناسی ؤ پٹ ؤ پؤل بیت اے دو آسرات داریت، مئے زرے کرونا سیاسی‌ئین کرونای که آیرا دو تعدیلَ لوٹیت، یکے مان ملکے سیاستان تها و دومی مان ڈنے سیاستان تها. اگه مچ ملکے تها کارخانه جوڑ کنِت که وسایل جوڑ کننت، انگت هم زرّے مشکل شرَ نبیت.
واجها شه ذمه‌واران لوٹت که مردمانِ آزاتیانَ گیشتر کننت ؤ مردمانَ بِلَّنت که نگد کننت، پچے که اگه نگد مبیت اصلاح همَ نبیت، اعدامے حکم زورگ بیت، مگه جائے که الله پرمان بیت.
اهل‌سنتے جمعه پیشنمازا درشان کرت: اعدام گرانین حکمے ؤ دنیا ما را نگدَ کنت، آسراتِ همیشنت که زرے ارزشت جهل آته. اگه ملکے تهئے ؤ ڈنے سیاستانِ تها بدلے بَیت که مردمانِ آزاتی گیشتر بَیَنت ؤ آ تواننت نگد کننت، ملکے زرے ارزشت برگردیت.
واجها وتی هبرانِ گڈسرا گون ایشی که من بید شه مردم ؤ ذمه‌وارانِ خیرلوٹی ؤ دلسوچیا دگه واهشتے ندارین، گوشته: سیاستانِ تعدیل کنگ سک هژدری ؤ اثر دارنت.
شیخ‌الاسلام مولانا عبدالحمید وتی هبرانِ اول‌سرا گون اشاره به ایشی که اے حجے روچنت درشانِ کرت: حج یکے شه اسلامے بندات ؤ ارکاناننت که درورے شه واهگ، اوپار ؤ عمل به شریعتاینت، هر سال دنیاوے مسلمان شه وڈ وڈین رنگ ؤ پاٹی ؤ لبزا الله گسے کرّ ؤ کنکا ؤ مه صحرای عرفات ؤ مزدلفه‌ئا جمع بَیَنت ؤ حجے مناسکانَ انجام دینت.
واجها په اخلاصا مان اعمالان تها تأکید کرت که اگه شما نماز بوانت، جهاد کنت، روچگ گرت و حج کنت،‌ بائد شه اے پهکان شمے واهشت الله رضا بیت که اے اعمال الله دیما قبول ؤ ارزشت ودی کننت. واجها وتی هبرانِ‌دیمترا به ماه ذی‌الحجه ئے نزّینک بیگا اشاره کرت ؤ گوشته: تلاوت، ذکر، روچگ ؤ دگه عبادت مان ذی‌الحجه‌وے اولی‌ئین ده روچا باز ارزشت دارنت، پمیشا اے ده روچا عبادت کَنِت ؤ عرفه وی روچا (نهم ذی‌الحجه) روچگ گرت که بازین ثوابے داریت.
دارالعلوم سرمسترا همےپیم به قربانی‌ئے فضیلتان اشاره کرت که یکے شه ٹوهین اعیدے مزنین عبادتاننت.

انونین جاورے لوٹ توبه،‌استغفار ؤ اعمالانِ اصلاح کنگنت
مولانا عبدالحمید گوشت اپسوزنت که انونین جاورے تها که جامعه گون رنگ‌رنگین ناجوڑی ؤ مشکلان دیم‌په‌دیمنت انگت بازین مردمے گون گناه، دزّی ؤ جنگا دزگٹنت. واجها گیش کرت: گناه، مردمے کشگ ؤ دزّی هر جاورے تها جایز نَئِنت، بلین اے روچ ؤ جاورا باز رڈنت. اے روچ توبه ؤ استغفارے روچنت که بائد ٹگّی ؤ سستی‌ئے که مان عبادتان بوته دور بوَنت ؤ شه الله‌ئا لوٹگ بیت که کرونا و دگه آپتانَ زوریت.