شیخالاسلام مولانا عبدالحمید وتی اے جمعهیے (18 بهمن 1398) هبرانِ توکا گوشت که انقلاب اسلامی یک مردمیئێن انقلابے بوته ؤ آیی مانگ هم گوں مردمی بوتنائنت.
شه زاهدانِ اهلسنتِ جمعه پیشنمازِ دفترِ حالرسانی حالا، مولانا عبدالحمید درشان کرت: مه اسلامی انقلابے جوڑ بیگے وهدا مردمانِ امێت به انقلابے واجهکارانِ دل پراهیائت. همے امێت ات که ایرانے ملتا را جمعِ کرت ؤ پهکانْ امام راحل ؤ آدگه زانتکارانِ پدا راه کپتنت ؤ سال 1357 انقلاب بوت.
مردمان به اے هیالا اتنت که شه اودا که علما ؤ زانتکاران گوں دینا ارتباط دارنت ؤ شه خدا ؤ رسولا گیشترَ زاننت، همےپیم آیانِ دل پراهی هم بازنت. واجها به مردانِ اُستاتنے سببان اشاره کرت ؤ گوشته: آ وهد ؤ زمانا ظلم ؤ بےانصافی بازت، مردمانِ هبر اُشکتگَ نبوت، آیانِ لوٹ دلگوشَ نبوتنت، ملکے منافع ؤ سؤبانَ غیرانَ برت، مردمان به گناهے نیمگا كشّگَ بوتنت، همے چیز سبب بوتنت که ایرانے ملت بُستیت ؤ انقلاب بیت. واجها گوشت که بایدات مردمانِ اولِ انقلابے شعار که عدالت ؤ آزاتیات دلگوش کنگ بیت و آیان وتی نبیسگ ؤ هبر کنگے تها آزات بیَنت.
بایدات بےعدالتی ؤ نابرابرییے دێم گرگ بیت
زاهدان جمعهی پیشنمازا په عدالتے اجرا ؤ نابرابرییے دیمگرا تأکید کرت ؤ گوشته: بایدات که عدالت اجرا ببیت و نابرابری شے مردمانِ سرا زورگ بیت، پچے که نابرابری و بےعدالتیا اسلام توکا هچ جای نهنت. ذمهواران بایدات که بےعدالتی و نابرابرییے دیما بؤشتنت ؤ نابرابریيے ریشهگا شه ایرانے راج ؤ مذاهبانِ میانا سندنت ؤ پهکین ایرانے ملتے حق برابر رسیت، پچے که یک راج ؤ مذهبے انقلاب نکرته، بلکین مے انقلاب، اسلامی انقلابےات، پمے واستا بایدات که اسلامے پراهین دیدانکا چَمّے چیرا گِرن نه مذهبے گونڈین دیدانکا، اگه ما اسلامی بچارن گڑاں پهکانِ حقه رسیت، مشکلانْ حلَّ بینت ؤ مردمان راحت.
اهلسنتان په وتی آیوک ؤ آیندهیا گڈتّیَ کننت
دارالعلوم زاهدانِ سرمسترا وتی هبرانِ دیمترا به اهلسنتانِ مشکلان اشاره کرت ؤ گوشته: اهلسنتان تمام این چهلویک سالے تها شه اسلامی انقلابا پلّامرزی کرته ؤ گوں نظامے ذمهوار ؤ مزنین راهشونا هور بوتگنت، بلین افسوزنت که آیانِ لوٹگان پوره دیگ نبوتگنت، هنگت اهلسنتان په وتی آیوک ؤ حقان گڈتی دارنت. اهلسنتے دینی وانگجاهانِ هماهنگی شوراءِ سرمسترا وتی هبرانِ دیمترا گوں انتقاد شه نابرابری به اهلسنتانِ حقےتها مه پست ؤ مقامانِ داتن ؤ مذهبی آزاتیان، گوشت: اے چهل ؤ یک سالے تها په خدماترسانییا جهد ؤ کوشستے بوته، پمشا انتقاد کمترنت، بلین ذمهواریانِ داتن به اهلسنتان ؤ آیان بودیں ؤ زانتکارانِ کارگرگ، آزاتی مذهبی ماں ٹوهین میتگان که اودا اهلسنت کمانت، شے چیزاں گِلگ دارنت.
اهواز ؤ کرمانِ اهلسنت شه مذهبی سکّی ؤ فشاران گلگ دارنت
واجها وتی هبرانِ دیمترا گوشت: مے انتظار ایشنت که ذمهواران وتی اهلسنتیں براسانَ هرجا دلگوش کننت ؤ په نمازے وانتنا گوں آیان مدد بیت، بلین افسوزنت که اهلسنت گوں بازیں مشکلے دیمپهدیم انت. اهواز اهلسنت گوں ما گلگَ کننت که به امّا دلگوشَ نبیت ؤ مذهبی سکّی بازنت. مے براسان به کرمان تها، که ما هچّ انتظارے ندارن که اودا مذهبیئین سکّی بیت، بلین آیان هم گوں مشکلان دیمپهدیم انت.
واجها گوشت: تپاکی ؤ براتی ایشنت که اهلسنت هر جای شے ملکا باید آزات بَینت، سنی ؤ شیعه بایدات که وتی نمازے برجا دارگ ؤ زهگانِ تعلیمے تها آزات ببنت. واجها دیمترا گوشت: آیان که مسلمان نهنت ؤ مے عقیده ؤ باورانَ نمنّنت ؤ مے راها نرّونت، آیانِ آزاتی هم دیَگ بینت.
پست ؤ مقامانِ داتنے تها باید به «شایستهسالاری»یا دلگوش کنگ بیت
مولانا عبدالحمید وتی هبرانِ دیمترا گوشت: افسوزنت که ماں اسلامی جمهوریا شایستهسالاری پوره اجرا نبیت، فُرمان توکا «شیعه» ؤ «سنی» نبشته بوته که دنیایِ داب اے وڈ نهنت، هچ جای شه دنیایا شه مذهبا سؤجَ نبیت، همے که مسلمانں بس انت، اگه لوٹن گیشتر زانں مسلمان بوتن بس انت. واجها وتی هبرانِ دیمترا تنگنظرییا ڈؤمِّت ؤ شه آیی پدے خطران ڈاه دات ؤ گوشته: اگه یک سیستمے تها تنگنظری بَئت لَٹّے که آ يرا جنت، ڈنّے دشمنَ نجنت ؤ الله گوں آ سیستما هورَ نبیت.
دارالعلوم زاهدانِ سرمسترا گوشت: چهل ؤ یک سال شه اسلامی انقلابا گوزیت، بلین بازین اصولے شه بنیادی قانونا دلگوش نبوتگنت یا وتی دلےوڈ به آوان عملش کرته، مے کُلَه به دولتےسرؤکان ایشنت که اے فرصتانَ ساتت، گوں راج ؤ مذاهبان هما پیم که قانونے تهائنت عمل کنِت، اهلسنتانَ ناامیت مکنت، آیانَ گوں وت نزّینک ؤ آیانِ گڈتّیانه زْیان کنِت.
ماں گچینکاریا بائد به وَسِی ؤ بودیں نامزدان دلگوش ببیت
مولانا عبدالحمید وتی هبرانِ تها گوں اشاره به پارلمانے گچینکاریا درشان کرت: گچینکاری هم پراهین دیدانکے لوٹیت ؤ باید ڈن شه پاٹی، راج ؤ مذهبا بیت. آ که دیندار ؤ پَلگار کنوکے بیت، بلین پراهین دیدانکے مداشته بیت به پارلمانے جهگیرییے دردا نوارت، پارلمانے جهگیر شه هر راج، پاٹی ؤ مذهبے بیت، بلین پراهین دیدانکے داشته بیت. واجها گوشت که شورای نگهبانَ توانت گوں وسی ؤ بودینانِ تأیید کنگا گچینکارییے آچشے جلا ٹوه کنْت، مولانا عبدالحمید درّاینت: ایران گِردِ ایرانیانِ ئنت، یک وهدی که هِدا دولتے نبوته اے منطقهوے مردم انگریزِ دیما اؤشتاتگنت، کُشگ بوتگنت بلین اے منطقهیا په ایرانائِش ساتته، باید اے ملت دیسته بیت ؤ تمام راجان که شه ایرانا دفاعش کرته دلگوش ببنت.
زاهدانِ اهلسنتے جمعهٔ پیشنمازا وتی هبرانِ گڈسرا شه نمازوانوکان لوٹت که په 22 بهمنے راهگولیا که یک ملی روچے برَوَنت.