مذھبی و تعلیمی کارانی دیم گرگ گوں بنیادی قانونا ضد انت

واجہ شیخ‌الاسلام مولانا عبدالحمیدا وتی گوستگیں جمعۂ (27 مھر 1397) گپانی تھا دینی مدرسہ و مسیتّانی سرا محدودیت و مشکلاتِ جوڑ کنگ، ایرانِ بنیادی قانون و تپاکیِ خلافا زانت.

پہ سنی‌آنلائنِ ھالا، واجہ مولانا عبدالحمیدا مہ یک بھرے چہ وتی گپاں درّائینت: تازه یاں ملکِ لھتے جاھاں ھال پیداگ انت کہ لھتے مسیت و مدرسہ‌ سرا سک گیری بیگ انت و پہ نماز و مذھبی کارانی واستا محدودیت آرگ بیت.
دارالعلوم زاهدانِ مدیرا گوشت: ما را اے چہ دابیں رفتار و جریاناتِ اشکنگا لجّ کنت و تعجب کنیں. اے کہ یک دینی مدرسہ‌اے دیم گرگ بیت و یا یک مسیتے داخلی کارانی تھا دخالت و دست‌مانجنی بیت، گوں تپاکی و ھمدلیا ضد انت، ھچ پیما مئے مردماں گوں وت نزّیک نکنت.
واجھا اے پیمیں کار “چکّی کار” زانتنت و گوشتی: لھتے کہ وتا ملکِ مسئول و ذمہ‌وار زاننت چکی کار کننت. مذھبی و وانینگی/تعلیمی کارانی دیم گرگ بنیادی قانونا گوں ضد انت، پچے کہ بنیادی قانونا مسیت، نماز وانگ و تعلیم و وانینگ پھک کاملی سرا آزادی داتگ انت.
مولانا عبدالحمیدا گیش کت: اے کہ ھنّوگیں خرابیں حالاتِ تھا که مردم گوں ھر وڑیں مشکلاتا دیم پہ دیم انت و زوراکانی ظالمیں تحریمانی سببا گوں اقتصادی فشاراں درگیر انت، پدا ھں لھتے بیاینت و چیں کار بکننت و مردماں سرا مذھبی فشار بیارنت، اے واکی نازانتی یے و گوں دورچاریا ضد انت.
مولانا عبدالحمیدا گوشت: مدیر و مسئولاں باید برابری و عدالتِ کِشکا گام ایر کننت، پچے کہ تمامیں مردم حاکمیتِ چُکِّ جاها انت و حکومت باید پهکانی درمیانا برابری و انصافا برقرار کنت و پہ گرداں مھربان ببیت.
واجہ مولانا عبدالحمیدا مسئول پہ “پراہ‌دلی” سوگہ کرتنت و گوشتی: مئے سوگہ په گرد مسئولاں ھمیش انت کہ تمام کارانی تھا چہ وت ‌پراہ‌دلی پیش دارنت. مدیر و مسئولانی رفتار گوں مردماں باید عادلانه ببیت و چه قومی و مذهبی حرکتاں وتا دور دارنت، راج و مذھبانی درمیانا فرق قائل مبنت.
واجھا گیش کرت: مئے ملک و استانا لھتے ھست کہ قومی و مذهبی حرکت کننت، اے سستیں مدیر انت. ڈڈیں مدیر ھما انت کہ ٹوھیں دید و پراھیں دلے واھُند ببیت و تمام اقوام و مذاهبِ مشکلاتا بگندیت و په آیانی گیشّینگا جھد بکنت.