مولانا عبدالحمیدِ مبارکبادی پیغام پہ پاکستانِ سروزیرا

شیخ‌الاسلام مولانا عبدالحمیدا، عمران خانِ سوبمندی ماں پاکستانِ گچینکاریاں مبارک باد گوشت.
چہ زاهدانِ اهل‌سنت جمعه پیشمازِ دفترجاهے نیمگا گوشگ بیتگ: شیخ‌الاسلام مولانا عبدالحمیدا اے پیغامِ تها پہ پاکستانِ سروزیرا گیشتر سوبین بَیَگِ امیت کتگ و گوشتگ: منی لوٹ چہ ترا «عدالتِ برجم دارگ»، «درستیں قومانی شرترینانی دیما آرگ» و «اسلامِ شریعتِ پاسپانی» اِنت، اے باروا گیشتر جهد بکن.

✅ شیخ‌الاسلام مولانا عبدالحمیدِ پیغام اے وڑا اِنت:

🔹بسم‌الله‌الرحمن‌الرحیم

🔸جناب واجہ عمران‌خان! من تئی سوبین بَیَگا ماں پاکستانِ گچینکاریاں و تئی سروزیر بَیَگا مبارک باد گوشاں، گوں اِشیا که ما را چه تئی اجتماعی و سیاسی دیدانک و نظراتا بازیں سرپدی یے نیست، بلے «تحریک انصافِ» حزبِ کامیابیا من وش فالی گران و امیت کناں «انصاف و عدالت» کہ مروچی تمام راج پہ آئیا تُنّیگ اَنت، پاکستانا برجم دارگ ببیت، پرچیا کہ راجانی تپاکی، راحتی، دیمروئی پہ بے عدالتی و انصافا بَند نوارت.

🔶گوں مرچیگیں پیش آتکگیں جاوراں من چندے گپ تئی یادا آرگ لوٹاں:

▪️1. چہ درستاں گرانبهاتریں کِرد، عدالت و انصافِ برجم دارگ: زانگ لوٹیت کہ پاکستانا وڑوڑیں قوم وَ مذهب نندوک اَنت، عدالتِ برجم دارگ اِشانی درمیانا سکّیں مهمیں کارے اِنت.
▪️2. خاصیں دلگوش کنگ په شموشتگیں قوم و راجانی نیمگا چوش که قومِ بلوچ اِنت که گوں اِشیا که چه نجیب وَ شریفیں قومان اِنت، بلے اپسوز اِنت که دراجیں مُدّتے اِنت گوں نیستی، بیکاری و همک پیمیں نادلگوشی و بے انصافی دیم پہ دیم اِنت وَ گوستگیں سالاں اِے قومِ بازیں زانتکارے آوار جَنگ وَ گار کنگ بیتگ اَنت، بازیں تهمت و بدرفتاری یے آیانا حقّا کنگ بوتگ، گَپّ وَ شور و صلاحِ دیوانِ جاها گوں آهاں ترندی کنگ بیتگ.
واجہ سر وزیر! عاقلی کارے نہنت کہ گوں ردیں سیاستاں چشیں مزنیں قوماں که پاکستانِ مزنیں بهریا زندگی کننت، دژمن په وتی مرادانی پوره بیگا کارمرز کننت. شرتر همیش اِنت کہ اے قوما بگِند، آیانی لوٹاں گوش بدار و گوں آیاں گِند وَ نند بکن، وتی سرکاری جاهاں آهانی شرتریناں کار ببَند.
واجه تو که هنّو منطقۀ یک اثر ایرکنوکیں ملکے سروزیریا گچین کنگ بوتگ ئے، په اسلامی ملکانی تپاکی و وحدتا چه هچ جهد و کوششیا وتا دور مدار.
▪️4. جهد پہ اسلامی شریعتِ برجم دارگ: پاکستانِ تشکیل بَیَگِ مهمتریں فلسفہ و مراد اسلامِ شریعتِ برجم دارگ بوتگ، پاکستانِ گیشتریں مردم مسلمان اَنت، من چه تو همے وداریگاں تا جاهے که توان ئے وتی دولتا پہ اسلامِ شریعتِ برجم دارگا سکین بدَے، پرچیا کہ الله پاکِ کمک و مردمانی رضامندی همے چیزِ توکا اِنت.

واجہ عمران خان اے گپّانی سرا عمل کنگ وَ تچکیں سیاستانی کار بندگ، ترا ماندگار و نامداریں سروزیرے جهانا بدل کنت. ان شاءالله
گڈسرا من گوں تئی گیشتر سوبین بَیَگ و سربلندیِ واهگا، ترا اِے چیزِّ نیمگا دلگوش دیاں که اِے دنیائی پست و مقام پشت نه کپ اِنت، هما پیم که پاکستانا بازیں راجکماش و سروزیرے گوستگ.
امیت کناں تو چه پاکستانِ اثر ایرکنوک‌تریں مسئولاں ببات ئے، داں تئی نیکیں نامِ همیشه واستا مردمانی یادا پشت کپات. و ما علینا إلا البلاغ

✍🏽 (مولانا) عبدالحمید
– زاهدانِ اهل‌سنتِ جمعۀ پیشنماز
– دارالعلوم زاهدان کارمستر

مکه، منایِ سرزمین / 10 ذی‌الحجه 1439

📝رجانک: نصیب