یک بدکاریں گروپیا ایرانشهرِ تها لهتے جنیں آدمِ دزّتگ و آیانی نیمگا دست دراجی کتگ

یک بدکاریں گروپیا ایرانشهرِ تها لهتے جنیں آدمِ دزّتگ و آیانی نیمگا دست دراجی کتگ؛ ملکِ مردم و ورنایاں اِے بدکارانی گرانیں سزاءِ لوٹوک بوتنت

سنی‌آنلائن| یک فسادکار و سل‌کاریں گروپیا تازه‌یاں ایرانشهرِ (پهره) تها بازیں جنیں آدمے دزّتگ و اذیت و آزار رسینتگ. چو که گوشگ بیت اِے باندا 41 جنیں آدم تا هنّو دزتگ و چنت ماه اِنت که اِشانی کار و دندا ھمے بوتگ.
اول سرا اِے گپّ واجه مولوی محمدطیب ملازهیا وتی ایرانشهرِ عیدِ نمازِ گپاں ظاهر کت. واجها گوں پر دردیں دلے گوشت که یک باند و گروپے درآتکگ و کارش همیش اِنت که جنیں آدمانا دزّ اَنت و برنت و رند چه وتی پلیتّیں کارِ کنگا آیانا کارنت و شهرِ یک نیمگے ویل کننت.
مولوی محمد طیبا همے پیم گوشت که یکے چه همے جنیں‌چُکّانی پت منی گورا یهتگ و اِے حالی منا داتگ و گوشتگی که اِے سل‌کاریں گروپا تا هنّو 41 جنیں آدم دزّتگ و برتگ.
مولوی طیبِ اِے گپاں مردم سک غمیگ و پریشان کت اَنت. پچے که بلوچستانِ تاریخِ دراجیا هچبر اِے دابیں گپ کسا نه اِشکتگ. بلوچیں مات و گهارانی دامنِ پاکیِ نام دنیایا پرشتگ، گڑا چتو اِے بدکاران لوٹنت که اِے دابیں جنیں آدماں په وتی پلیتّیں نفسی واهشات و لوٹانی پوره کنگا ندر کننت.
هما عیدِ روچا واجها گوشت که یک نفرے چه اِشاں گرگ بوتگ و منّتگی که آئیِ همراه و ساتی کی بوتگنت.
مولوی طیب صاحبا چه قضایی و انتظامی مسئولاں لوٹت که اِے شومیں سل کار هرچے زودتر باید گرگ و وتی سزایا رسینگ بنت.
رند چه واجه مولوی طیبِ گپاں، ایرانشهرِ بازیں مسئولیا واجهِ گپ منّت اَنت و قولش دات که اِے مسئله‌یا په دل چست و ایر کننت و اِے تبه کاراں که چیں کار اِش کتگ ضرور وتی سزایا رسینگ بنت.
نبی‌بخش داودی ایرانشهر فرماندارا گوشت: اِے خرابکاریِ اصلی نفر گرگ بوتگ، بلے انگت پرونده په سرجم نهنت. آیاں که دزّگ بوتگ و آزارش دیستگ هں پهک الّم نهنت.
مولوی طیبِ گپ دیر نبیت که ملکی و درملکی رسانکانی دستا کپت اَنت و دنیاءِ کرّ و گورِ مردماں اِے حال سهیگ بوتنت.
مروچی ایرانشهرِ ورنایاں هں وتی هژم و زهرشانی پیش داشت، بازیں مردمے مروچی ایرانشهرِ فرمانداری دپا مُچ بوتنت و چه فرماندارش لوٹت که زودتر اِے باند و گروپِ مردم گرگ و دارکشّگ بنت. یکے چه ورنایاں گوشت: تا پنچ روچا اگه فرمانداری کارے مکنت ما وت سلاح زورین و گلائیش بیں.
ایرانشهرِ فرماندارا هں وتا مردمانی مچّیا رسینت و گوشتی: من اِے شمے لوٹا ضرور پوره کناں بلے انگت صبر کن اِت که اِے پرونده وتی قانونی مرحله‌یاں بگوازینیت.
گوشگ بیت که لهتے ورنا مروچی چه همے مچّیا گرگ و بند کنگ بوتگ و تا هنّو حالش نیست.
رند چه اِے مُچّیا بازیں ورنایے ایرانشهرِ مسجد نورا شتگنت و اودا گوں مولوی طیبا دیدارش کتگ. واجه مولوی طیبا اِے دیوان ورنا گوشتگ اَنت که ما تا آخرا که اِے مجرم وتی سزایاں برسنت اوشتاتگیں. بلے من چه شما دزبندی کناں که آرام بت و وتی لوگاں برو اِت. ان‌شاءالله منی دیمی جمعه‌ نمازا اِے باروا آخری گپان کناں.

بلوچ راج و تمام مسلمانانی چمّ په ایرانشهرِ مسئولاں سکّ اَنت و چار اَنت که باریں گوں اِے بدکار و پلیتّاں چے کننت؟ چنت نفر گرگ بیت؟ اِشانی سزا چے بیت؟
🌺🌺🌺