عمر گوزیت، مَرک کئیت

دنیاءِ زندگی گوزگ انت. یکے بیت دگرے مریت. یکے دوراه ؤ سالم بیت، دگرے نادوراه ؤ ناجوڑ بیت. دنیا روچے په رنگے انت. مرچی گل ؤ شادی باندا درد ؤ پریشانی. یک جاهے سور ؤ عاروسِ دیوان انت، دگه جاهے پرس ؤ پاتیاءِ دیوان انت.

دنیا چو درچکے ساهگ انت. اے دیم ؤ آ دیم بیت ؤ چو که شپ وتی تهاریں برانزاں مان شانیت، بیگواه بیت. دنیا انچوش اے دیم ؤ آ دیم بیت، یکبرے بیگواه بیت. دنیاءِ هر روچ په ما گنجے. اللهِ داتگیں نعمتے. هر روچ یک نوکیں اسپیتیں تاکے چه مئی زندِ دپترا. گوں روچِ ٹکا مئی زندِ نوکیں تاکے لیٹیت. مئی وتی دستا انت که اے تاک چے نبیسیں. اے تاکا مئی هر گپ ؤ هبر کار ؤ کرد نبیسگ بنت. نیکیں یا بدیں. سیاهیں بنت یا اسپیتیں. دوراهیں نبیسگ بنت. گوں روچِ نندگا آ روچِ تاک لیٹیت.

مرچی وتی هر کار ؤ کردِ هیالداریا کنیں که باندا ما را جست بیت. باندا اِے دپتر مئی دیما پاچ کنگ بیت ؤ گوشگ بیت شما وت بوانِت.

دنیا نیکیں عملِ جاه اِنت. نیکیں عمل پشت کپیت. جن ؤ چُک، ماشین ؤ بنگله اِے تمام پشت کپنت، ما روین ؤ‌ مئی عمل. نیکیں کارانی ثمره ؤ بروردا ما رند چه مرکا گندیں. اودا مئے دردا ورنت.

بزرگے گوشیت: روچے که شما دنیائا یهتگِت، تماماں گل بوتگنت ؤ شما گریواں، انچو زند بگوازینِت که روچے که شما رواِت تماماں گریواں بنت ؤ شما کنداں.

شاکر رئیسی