شیخالاسلام مولانا عبدالحمیدا اِے هپتگءِ جمعهءِ نماز (29 مرداد 1395) ئا گوں اشاره په پیگمبرءِ صحابیانی بدوبیراه گوشگ ماں ایرانءِ راڈیو و ٹلویزیونا، گوشتی: راڈیو و ٹلویزیون باید چه اهلسنتا رسما پهلّی و مآپی بلوٹیت.
په واجه مولانا عبدالحمیدءِ هالرسانی سایتءِ هالکاریا، زاهدانءِ جمعهءِ پیشنمازا گوشت: تازهیاں «نسیم»ءِ چینلا ماں ایرانءِ راڈیو و ٹلویزیونا یک مجری و جارچینیا لهتے چه پیگمبرءِ صحابه بدگوشتگنت، بازیں عالم و واجهیا چه اِے کارا گلّه کرتگ و پارلمانءِ جهگیراں هں وتی اعتراض پیش کرتگ.
دارالعلوم زاهدانءِ کارمسترا گوں اِے گپءِ درشاں کنگا که «هر دین و مذهبا اهانت و بدگوشگ بد اِنت» گوشتی: اِے مَنّتگیں گپّے که تمامیں دین و مذهباں مقدسات و دینی باورانی عیب گرگ و بدگوشگ جائز نهنت، پچے که اهانتا په هچکسا پائدگ نیست اِنت، بلکیں بدتر فاصله و جتائی کاریت و تپاکیا چه بین روت.
واجها گیش کرت: مرچی دژمن میدانا یهتگنت و لوٹنت چه اختلاف و جتائیا وتی شومیں مراداں برسنت، مرچی تمام همے نتیجهئا رستگنت که مسلماناں ماں اِے جاورا وحدت و تپاکیءِ محتاج اَنت.
زاهدانءِ جمعهءِ پیشنمازا چه «ایرانءِ راڈیو و ٹلویزیونا» لوٹت که رسما باید چه اهلسنتا پهلی بلوٹیت و گوشتی: اگه چه راڈیو و ٹلویزیونءِ پارلمانی مددکارا نامهاِے نبشتگ و گوشتگی که ما اِے پروگرامءِ ناظر و هورتچار چه کارا درکتگ و مجری هں سَمجینگ بوتگ، بلے مئے امیت همشنت که اِے جریان راڈیو و ٹلویزیونءِ جندءِ برنامهياں باید پاچ کنگ ببیت و چه ایرانءِ اهلسنتا پهلی لوٹگ ببیت.
واجه مولانا عبدالحمیدا گوں اشاره په ایرانءِ رهشونءِ فتوا ئا که گوشتگی دینی ارزشت و مقدساتءِ بدگوشگ حرام اِنت، گوشتی: اِے اهانتا اول سرا ایرانءِ راڈیو و ٹلویزیون میاریگ اِنت. راڈیو و ٹلویزیونءِ هوربند یکسره چه رهشونءِ نیمگا اداره بیت، گڑا اِے امیت نیست اَت که راڈیو و ٹلویزیونءِ جارچیں اهلسنتءِ مقدساتا بدوبیراه بگوشنت و کم سه کم باید راڈیو و ٹلویزیونءِ جارچیں رهشونءِ فتوا و گپانی سرا عمل بکننت.
واجه مولانا عبدالحمیدا چه اهلسنتءِ جهگیراں که وتی اعتراضش پیش کرتگ منتواری کرت و گوشتی: مئے لوٹ اِشنت که گوں رهشونءِ پرمائشاتا باید یک قانونے جوڑینگ بیت که په دین و مذهبانی مقدساتءِ بدگوشوکاں باید مجازات تعیین کنگ ببیت. اهلسنتءِ جهگیر باید اِے گپا رندگیری کناَنت.
واجه مولانا عبدالحمیدا دیما شیعهیانی مقدساتءِ بدگوشگ «حرام» زانت و گوشتی منی فتوا اِشنت که شیعهیانی مقدساتا اهانت کنگ و بدگوشگ حرام اِنت.
واجها گوشت: ما را حتی اِے اجازت نیست اِنت که یهود و نصاراءِ مقدساتا بدگوشیں. بلّی که آیاں مئے اعتقاد و باور بد گوشتگ و مئی پیگمبرءِ واستا شکل کشّتگ و برے قرآن اِش سوتکگ، بلے هچ مسلمانیا وتا اجازت نداتگ که حضرت موسی و عیسائا بدگوشیت و یا که تورات و انجیلا بسوچیت.
مولانا عبدالحمیدا گڈسرا گوشت: توهین کنگ هچ دین و مذهبیا جائز نهنت. امیت اِنت که مسلمان چه اِے کاراں دوری کناَنت، اگه یک مسلمانیا اِے دابیں کارے کرت، دگراں باید آئیا سمجیننت تا چه اِے کاراں دست کشّیت.