مولانا احتشام‌الحقّ، پُلّے اَت که ناسرپداں زوت سِست

واجه مولانا احتشام‌الحق صاحب بلوچستانَے باز مزنیں زانوک و عالم وکواسے اَت، آئی مٹ و دروَر دنیائے توکا سَکّ کمّ انت. واجه بلوچی وانگ و نُبیسّگا باز ماهر أت و زندگی تها هم سادگ ات، گون اے مزنیں علم و زانت، بلے واجهَے پُچّ، کَوش، کُوٹ، لونگ و کُله باز سادگ و بلوچی ات.
واجه مولوی، مفتی و اسکول و کالجَے علم و روژنَے زانوک و دربروک و همے پیم بلوچی، عربی، اُرود زبانانی زانوک، وانوک و نُبیسوکے أت.
واجه گوَشے په کتابَے زورگ و وانگا شیدا و گنوک أت، ماتاں چوشیں چُک کم یارتگ. بلے اپسوز اِنت که اے وش رنگ و وشبوئیں گُل و پُلا باز رَو نکرت، ناسرپدان اے گل زوت سِست.
واجه بیران بوت بلے توام نبوت، آئی په شهادتَے برکتا جنّتَے گُل و پُل، قصر و ماڑی‌یَے واهند بوت، واجهَے جنوک و کُشوکاں مزنیں زَرر و نُکسانے کرت، په کمّین زرّے دوزهی آس اِش په بها زورت و تا زندگ اَنت آسودگ نبینت. واجهَے هون آیانی آرامی و آسودگیا دنیا و آهرتا گیرت، و په زِلَّت و واری مرَنت، پریشانی و واری تها گِرپتار بینت، عالمی هونَے تاوان گران اِنت هرکس په بدهتی و رسوائی تیار انت گڑاﮞ دیما کنزیت.
واجه احتشام دُرّے ات، په بلوچ راج دلسوز ات بلوچستانی آبادی‌یَے پِکر أت، په بلوچ قومَے وانگ و زانگا زهمتی کشِّت ، و هچ قومے بےوانگ و زانگ، سیاست و معیشت توکا دیما نکنزیت، دینی و دنیائی وانگ زانگ سک باز زروی انت. واجه آسیاآبادیا په اِے بابتءَ باز سَکّی و سوری برداشت کرت، آئیا شپا واب و روچا آرام نهت، په اِے بابتا ملک په مُلک گرد و گول کرت بَرے کوٹه، گوادر، کیچ، کراچی و وهدے چهبار، سرباز، سراوان و زاهدان ات، واجه مشهور و معروفیں شکسے اَت، ٹوه و کَسان جَنین و مردیں واجها زانت.
الله تعالی چه واجه احتشام راضی بات و آئی چک و زهگاں صبر و مزنیں مُزّ بدیات و واجهَے شهادتا به مولانا ریاض و آئی‌‌یَے براس و سیاد و قوم و سجئین علما و بلوچانی سروک و کماشاں تسلیت گوشین و وتی پدردیا درشاں کنیں.

(عبدالواحد قلندرزهی- سراوان، سوران)