واجه مولانا عبدالحمیدَے گال په واجه مولانا مفتی احتشام‌الحق آسیاآبادی باروا

مولانا مفتی احتشام‌الحق آسیاآبادی رحمه‌الله، یکّے چه رودراتکی/شرقی بلوچستانَے ٹوهیں عالم و زانتکاران اَت که یکشنبه 3 مرداد 1395 گوں وتی زهگ مولوی شبیر احمدا شهید کنگ بوت. بازیں واجه و زانتکاریا وتی بیزاری چه اِے تروریستی حمله‌یا درشان کرتگ و واجه مولانا مفتی احتشام‌الحق اِش په نیکی یادکرتگ.

شیخ‌الاسلام مولانا عبدالحمیدا هں زاهدانَے مسجد مکّی‌یَے مقتدیانی درمیانا و هں دارالعلوم زاهدانَے استاداتی نوکیں وانگی سالَے 38-1437 اولی دیوانا، مولانا احتشام الحقَے نام په نیکی گپت و واجهَے باروا گوشتی:
مولانا احتشام‌الحق آسیاآبادی یکے چه پاکستانَے ٹوهیں عالمان اَت و چه مفتی رشیداحمد لدهیانوی رحمه‌الله ئے خاصیں شاگردان اَت که گوں وتی زهگا ترور کنگ بوت و په شهادت رسینگ بوت.
مولانا احتشام‌الحق آسیا‌ابادی یک شریف، دلسوچ، لائق، فکرمند و زحمت‌کَشّیں مردے اَت. آئی‌یَے هستی په مُلکا سک پائده‌مند اَت و یک مزنیں خیرے اَت. واجه حقَّے پدا اَت و حقّا رسِت. واکی آئی شهادتَے حقدار اَت.
مولانا احتشام‌الحق دردمندیں انسانے اَت، وتی آخری سفرا که ادا (زاهدان) یهتگت پَلامرزی/حمایت، راهنمایی و همدردی لوٹت و چو گونڈیں زهگے گریتی و گوشتی: تبشیری دارنت مردماں عیسائی (مسیحی) کنَنت.
واجهَے شهادت په اسلامی چاگردا مزنیں مصیبتے. امیت اِنت که الله متعال واجهَے شهادتا سبب کنت که مردم هدایت ببنت، عالم و زانتکاراں آگاه ببنت و پهکانی عاقبت په وشّی و نیکی ببیت. چو که جاه کئیت واجهَے شهید کنوک هما کس اَنت که گوں دین و اسلامی شریعتا مخالف بوتگ اَنت که لوٹتگش واجهَے جهدانی دیما بگر اَنت.
دینی مدرسه‌یانی نوکیں وانگی سالَے بنگیجی دیوانا واجهَے یادا زندگ کنیں و په واجهَے مغفرت و دراجاتَے بُرزیا دعا کنیں.