ترکیایَے مردماں گوں وتی هُژّاریا «فوجی» ناکام کرتَنت

سنی‌آنلاین-بلوچی/ دوشی شپَے‌وهدے دنیایَے رسانکاں هال کرت که ترکیایَے فوج/ارتش، رجب طیب اردوغانَے حکومتَے خلافا چست بوتگ و ملکا تهبیل گِرگ اِنت.
په رسانکانی هالا اول سرا فوجا «بسفرَے» پُهل که یورپی ترکیایا گوں آسیائیا هور کنت بستگ و رندا گوں ٹانکاں خیابان و سڈکاں دیمی کتگ.
دیر نبیت که فوجَے بالی/ هواپیما بالا لگّت اِتنت و ترکیایَے پارلمان و دگه بازیں حکومتی جاهے سرا بمب‌گواری شروع بوت. فوجا حکم کت که ملکَے تمامیں بالی‌پٹ/ فرودگاه بند اَنت. فوجیاں آتاترکَے بالی‌پٹ، ترکیایَے ٹلویزیونی شنگ‌جاه تهبیل گپت. «trt» شبکه فوجیاں گپت و پیش‌کنوکش هُجّ/مجبور کرت که باید آیانی پیگاما په مردماں بوانیت که اردوغانَے حکومتی تمام اِنت.
اول سرا المّیں هال نیست اَت، لهتیا گوشت که بلے اردوغانا پروش وارتگ و چه ملکا جستگ، بلے دیر نبیت که ترکیایَے راجکماش رجب‌طیب اردوغان ماں ٹلفونی گوانکے وتی واهگداری توار جتنت که چه وتی لوگاں در بِت.
دیر نگوست که نعره‌یانی توار ماں ترکیا چست بوت و ترکیایَے سڈک و خیابان چه مردماں پر بوتنت. ترکیایَے دلیریں مردماں فوجیانی دیما اوشتاتَنت و آیانی ٹانکش وتیگی کتَنت و آتاترکَے بالی‌پٹ‌اِش آزات کت.
اردوغانا وتا را په استامبولَے بالی‌پٹا رسینت و مردمانی دیمی گپ کرت و گوشتی: یک گونڈیں پاٹے چه فوجا لوٹیت مردمانی تپاکیا برهم بجنت. آ که اِے خیانتیں کارش کرتگ، گرانیں تاوانی دینت. ما اِشانی دیما اوشتئیں، توریں مئے سر بروت.
فوجیانی زور گوں مردمانی دیستنا پرشت. پمشا یک په یکّا وتی سلاهش اِیر کتنت و امنیتی واکانی تسلیم بوتنت. امنیتی واکاں بازینی چه فوجی مستر و افسراں دزگیر کرت و بندجاها دور داتنت.
تا مروچی ترکی کارمستراں گوشتگ فوجیانی ناکامیں ارش و حمله‌یا پروش وارتگ، بلے انگتا چه ترکیایَے مردماں لوٹتگش که وتی لوگاں مرو اَنت و سڈکانی سرا بوشتنت.
الجزیره شبکه‌یا گوشتگ که تا هنو 250 نپر کشگ بوتگ، 104 نپر چه آیاں فوجی اَت. 3 هزار فوجی هں دزگیر کنگ بوتگ.