اعتکافِ موسم و آئیِ فضایل و آداب

یکے چه رمضانِ مزنیں عبادتاں اعتکاف انت. پیگمبر صلی‌الله‌علیه‌وسلم، وتی مبارکیں عمرا اعتکاف سرا پابندی کتگ و رمضانِ آخری ده روچا اعتکافا نشتگ. واجه وتی عمرِ آخری سالا 20 روچ اعتکافا نشتگ و گوں وتی پاکیں رَبّا راز و نیازی کتگ.
ماں اے نبشتانکا اعتکافِ بزانت و آئیِ فضایل و آداب بیان کنگ بنت.

?اعتکافِ بزانت
اعتکاف ماں لغتا یک جاھے مانَگ و وتا دیر دارگ گوشنت. ماں شریعتِ گورا اعتکاف مانگ و نندگ ماں ھما مسیتے/مسجدے کہ پنچ وھدے نماز اودا وانگ بیت گوں خاصیں شرطاں.

?اعتکافِ پایدگاں
1. مسلمان ماں اعتکافا وتی وھد و جانا پہ اللہِ عبادتا دات؛
2. اعتکاف والا چہ دنیایی جیڑہ یاں سمبالگ بیت؛
3. پہ اعتکاف والایا مدام نمازِ ثواب ھست انت؛
4. اعتکاف والا گوں فرشتگاں همرنگ و هم درور انت؛ پچے کہ آ چو فرشتگاں مدام ماں ذکر و عبادت دزبنداِنت.

?اعتکافِ فضیلت
– اعتکافِ مُزّ و ثواب سک باز انت و رسول الله صلی‌الله‌علیه‌وسلم، مدام رمضانِ گُڈی ده روچا اعتکافا نشتگ و وتی عمرِ آخری رمضانا 20 روچ اعتکافا نشت.
– اعتکاف والا چہ گناھاں سمبالگ بیت.
– پہ اعتکاف والایاں ھما کساس/اندازه نیکی نبیسگ بیت کہ پہ پھکیں نیکی کنوکاں نبیسگ بیت.
– یک روچے اعتکاف نندگ انسانا سَے خندق چہ جھنما دُور کنت.

?اعتکافِ حکم
مہ گیشتریں مذھباں اعتکاف سُنت انت، بلے احنافِ مذھبا سنت موکّدہ انت اگہ یک نپرے مسیتا اعتکاف بیت آ دگہ گنھگار نہ بنت، بلے اگہ کسے نہ نشت آکَلّگے/روستایِ پھکیں مردم گنھگار بنت.

?اعتکافِ وھد و پاس
سُنّتیں اعتکافِ وھد رمضانِ گڈی دہ روچ انت، بزاں چہ بیستمی روچِ بیگاہا بُندات بیت داں عید فطرِ روچا.

?مردین و جنینانی اعتکاف‌جاه
مردیں ماں ھما مسیتے اعتکافا بنندیت کہ اودا پنچ وھدِ نماز وانگ بیت، بلے جنین ماں لوگا اعتکافا بنندیت، ماں ھما جاھے کہ آیی پہ وتی نمازِ وانگا گچیں کُتگ.

?اعتکافِ مسایل و احکام
پہ اعتکافا اے سَے چیز پہ کار اَنت:
– اعتکاف ماں ھما مسیتے بہ بیت کہ پنچ وھدءِ نماز اودا وانگ بیت.
– اعتکاف والا چہ پلیتیا ( مردیں چه جنابت و جنیں چه حیض و نفاسا) پاک بہ بیت.
– اعتکاف والا باید عاقل و بالغے بہ بیت انت.

?اعتکافِ پروشوکاں:
– ابید عذر و ضرورتا چه مسجدا در آیگ.
– گوں وتی لوگ بانُکا وپت و واب کنگ یالیب کنگ و چُکّک.

?هما ضرورت که اعتکافا نه پروش اَنت:
1. شخصی ضرورت درور: پہ لانک‌بوج/قضا حاجتا روگ، دیم‌شودگ، و پہ وت نان و آپ جوڑ کنگ، وھدیکہ دگرے مہ بیت کہ پہ آئی اے کارا بکنت.
2. شرعی ضرورت درور: پہ جمعہ‌یِ نمازا روگ.پہ جمعہ‌یِ نمازا اعتکاف والا ھنچو بروت کہ تحیۃ المسجد و سنتان اودا بوانیت ور ند چہ آدینگِ نمازا ھمینچُک توانت بہ نندایت کہ سنتان بوان ایت و بسّ.

?اگہ اعتکاف پہ اے چیری کارانی بابتا ویل دیگ بہ بیت اعتکاف باطل بیت، بلے معتکف گنھگار نہ بیت:
– پہ آسِ خاموش کنگا.
– پہ کسے کہ آپِ تها بُک گپتگ / غرق انت، آئیِ کمک دیگ.
– پہ مسیتِ لُمبگ (بلے رند چہ مسیتِ خرابیا اعتکاف والا هما دمانا پہ دگہ مسیتے بروت و اعتکافِ نیتا بکنت)

?اعتکافِ لهتے مسائل
– گھتریں جاگَہ پہ اعتکافا مسجدالحرام، پدا مسجدالنبی، پدا مسجدالاقصی، پدا جامع مسجد و گُڈسرا ھمامسیتے کہ ماں آئیا پنچ وھدِ نماز گوں جماعتا برجم دارگ بیت.
– اعتکاف والا رند چہ وتی حاجتانی اداکنگا زوت بایت دیم پہ مسیت پچ بہ تَرّایت.
– اگہ اعتکاف والا پہ بے خیالی چہ وتی اعتکاف جاہا درآتک آییِ اعتکاف پرشتگ.
– ماں اعتکافا کاملیں ساکتی و بے موچی مکروہ تحریمی انت.
– معتکف چہ سِلّیں گپاں دوری بکنت و وتی وھدا گوں تلاوت و ذکر و نمازا بگوازینیت.

?دلگوش: ھما پیمے کہ گوشگ بیت اعتکافِ جاگہ مسیت انت، مراد چہ مسیت ھما جاگاھے کہ اودا نمازوانگ بیت و کوش چمپلاں اودا درکنگ بنت.