اپسوز اِنت که لهتے جاها «نماز وانگ» هں پُجّگ نبیت

شیخ‌الاسلام مولانا عبدالحمیدا ماں وتی جمعه‌یِ گپاں (21 خرداد 1395) چه نمازوانوکانی دیم گرگ ماں تهرانِ لهتے نمازجاهاں سک گلّه کرت و چه کارمسترانی لوٹت که اِے ترندروانی دیما بگرنت.
په سنی‌آنلائنِ هالکاریا، واجه مولانا عبدالحمیدا ماں زاهدانِ جمعه‌یِ نمازِ دیوانا اول سرا په جهان اسلام نگیگیں هالاتا اشاره کرت و گوشتی: مرچی جهانِ هالات سک هراب اِنت. اسرائیل و دگه دنیای مزن‌واکاں کوشش کنَنت که په وتی مرادانی رسگا، اسلامی مذهبانا گوں وت درگیر کنَنت و اسلامی ملکاں ناامن کنَنت. باید مسلمان هُژّار ببنت و چه تفرقه و جتائیا دوری کنَنت.
واجها دیما گوشت: الحمدلله مرچی مئی ملک امن اِنت. دژمناں اِے امنیت وش نبیت. لهتے ترندرو و تنگ‌نظر هست که اِے امنیتِ ارزشا نزاننت و پُجِّت و تهمّلی کرت نکننت.
دارالعلوم زاهدانِ کارمسترا بیان کت: الحمدلله اهل‌سنتا تا جاهے که توانتگ، په وحدت و تپاکیِ برجم دارگا کوشش کرتگ. اهل‌سنتِ ترندروانی دیم گرگ بوتگ. مرچی ما را اهل‌سنتِ درمیانا چیں ترندرو که بتوانت وتی توارا برز بکننت نداریں. پچے که زاننت مئی مردم آگاه اَنت.
واجها مولانا عبدالحمیدا گوشت:‌ ما چه ملکِ رهشون، راجکماش و دگه کارمستراں لوٹیں که مواظب ببنت لهتے ترندرو اهل‌سنتِ قانونی آزاتیانی دیما مگرنت. ما هما آزاتی و حقّاں که قانونا ما را داتگنت همایانا لوٹیں.

اپسوز اِنت که لهتے جاها نماز وانگ هں پُجّگ نبیت

شیخ‌الاسلام مولانا عبدالحمیدا دیما گوں گله چه «نمازِ دیم گرگ» ماں تهرانِ لهتیں نمازجاهاں گوشتی: ماں کشورے که وحدت و تپاکی هست، اپسوز اِنت که لهتے جاها نماز وانگ هں پُجّگ نبیت. نماز، راز و نیازے بنده و ربِ درمیانا و په هچکسا تاوانی نیست. دنیایا هچ جاگاه په نمازا حساسیت پیش ندارنت. اگه ماں یک اسلامی یا غیر اسلامی ملکے یک شیعه یا سنی یے نمازِ دیم گرگ ببیت، ما آیانی گورجیگا گریں، بلے اپسوز اِنت مئی وتی اسلامی ملکا لهتے جاهاں ماں رمضانِ مبارکیں ماها په نمازِ وانگا حساسیت پیش دارنت و امنیتی واکانا پرمائیننت که ماں لهتے نمازجاهاں، نماز وانگِ دیما بگر انت.
واجها گوشت: ما زاناں گوں وت برات نئیں؟ زاناں ما ایرانی نئیں؟ ما پهک ایرانی ئیں و تهران و زاهدان و دگه مزنیں شهراں گوں وت هچ پرکے نیست انت. ما را چه کارمستراں امیت هست که ما را آزاتی ببیت تا وتی نمازا بے‌ترس و بیمے بوانیں. اِے مئی قانونی حق اِنت باید قانونِ مجریاں آئیا اجرا کننت. ما چه ملکِ مستر و کماشاں لوٹیں که ترندرویں مردمانی دیما بگرنت که نئیلنت ما نمازے بوانیں، مئی درمیانا غیرچه وحدت و براتیِ جریانا دگه هچ جریانے نیست انت.

نمازِ دیم گرگا ما پُجّت نکنیں

واجه مولانا عبدالحمیدا گوں اِے گپِ درشاں کنگا که «نمازِ دیم گرگا ما پُجّت و تهمل کرت نکنیں»، گوشتی: نماز یک چیزّے که ما هچ‌پیم نتوانیں چه آئیا چَمّاں بندیں. اِے که نمازِ وانگِ دیم گرگ ببیت و یا که امنیتی واک په نمازِ برجم دارگا تهدید بکنت اِشیا ما هچ‌بر تهمل کرت نکنیں. په نمازا هچ اجازتے نلوٹیت. نمازِ دیم گرگ یک غیراسلامی، غیرقانونی کارے و گوں وحدت و تپاکیا ضد اِنت.