فلسطینی زهگا چه زندانا په وتی ماتا نامه نبشت

«شادی افراح» فلسطینی دوازده سالگیں زهگے که اِے روچاں ماں ظالمیں اسرائیلِ جیل و زندانا گوازینگ انت، آئیا په وتی ماتا/ماسا نامه‌اے نبشتگ و په صبر و اوپاری وصیت کرتگ.
“شادی افراحا” ماں اِے نامه‌یا که وتی دل احساسی گوں وتی ماتا درشان کرتگ، نبشتگی: منی مات جان! چه تو دزبندی کناں که صبر و اوپارا وتی پیشگ کن و چو مَچّے که هچ گوات و زمین‌چنڈے آئیا نه سرینیت، وتی گاماں مهر دار.
اِے گونڈوا وتی زندان روگ «اللهِ امتحان زانتگ» و نبشتگی: منی مات! گم موَر، پچے آچیزے که منی سرا یهتگ، اللهِ امتحان انت. نباید په اشیا حسرت و اپسوز بورئے.
شادیا وتی نامه‌یِ گڈسرا چه زندانِ میله‌یانی پشتا په وتی لوگِ مردماں سلام دیم داتگ و نبشتگی: منی سلاما په سنگت و سیاداں، منی برات و گهاراں خاصکار «ریّانا» سر کن.
اِے نامه‌ که ماں اجتماعی شبکه‌یا دست په دست بوتگ بازیں فعّال و جهدکارے دل په درد یارتگ و په اسرائیل رژیما آیانی هژمی جوش یارتگ.
اسرائیلِ امنیتی واکاں چنت ماه پیش “شادی افراح” په همے بهتاما که لوٹتگی اسرائیلِ سربازانی سرا گوں چاکوگ ارش بکنت، گپتگ و جیلا/زندانا دور داتگ.
بلے شادی افراحِ لوگِ مردماں اے تهمت رد کتگ و گوشتگش مئے گونڈکیں زهگ چه مدرسه‌یا پیداگ بوتگ و آیاں چکاپتگ و جیلا دور داتگ.