واجه مولانا عبدالغنی اسماعیل‌زهی وفات بوت

واجه مولانا عبدالغنی اسماعیل‌زهی زاهدانءِ گلوگهءِ جمعهءِپیشنماز، زِی جمعه 13 فروردین 1395ءَ کوڑهئیں دنیائی رکست کرت.
په سنی آنلاینءِ هالکاریءَ مولانا عبدالغنی اسماعیل‌زهی چه بلوچستانءِ ربانی و الله والائیں عالم و زانتکاراں زی جمعه هیسک و نفس‌تنکیءِ سوبءَ وفات بوت.
واجه مولانا عبدالغنیءِ جنازهءِ نماز زی جمعهءِ روچءَ گوں عالم، طالب، و بازیں مردمے مُچیءَ گوں واجه شیخ‌الاسلام مولانا عبدالحمیدءِ پیشنمازیءَ وانگ بوت.
شیخ‌الاسلام مولانا عبدالحمیدءَ ماں زاهدانءِ جمعهءِ نمازءِ دیوانءَ گوں وتی دلپدردیءِ درشان کنگ چه واجهءِ وفاتءَ گوشتی: مولانا عبدالغنی یک نیکیں عالم، عابد و ذاکرے اَت. واجهءَ قرآن مجید باز تلاوت کرت. شپاں آگاه اَت و تهجدی وانت، خداترسے اَت. الله تعالی واجهءَ وتی بهتریں رحمتانی چیرءَ جاه دیات و درجاتی بُرز کنات.
گوشگی اِنت که خدامرزی مولانا عبدالغنی اسماعیل زهی، پاکستانءِ رحیم‌یارخانءِ دارالعلوم حمادیهءِ زانت‌دربراں بوتگ و واجه شیخ‌التفسیر مولانا جاجرویءِ شاگرد بوتگ.
همے پیم واجه مولانا عبدالغنی چه شیخ‌الاسلام مولانا عبدالحمیدءِ نزیکیں سیاد و وارثاں بوتگ و واجه مولوی محمدیوسف اسماعیل‌زهی چه سنی‌آنلاینءِ کارمستراں بوتگ.
سنی آنلاین ایران‌اهل‌سنتءِ هال‌رسانی سایت، اے واجهءِ رکستءَ په واجه مولانا عبدالحمید و مرحومءِ گِسی مردم و تمام سیاد و وارثاں تسلیت گوشیت و چه پاکیں اللهءَ لوٹیت که مرحومءَ وتی رحمتانی ساهگءَ جاه دیات و پُشپداں صبر و اوپار دیات.
اللَّهُمَّ اغْفِرْ لَهُ ، وارْحمْهُ ، وعافِهِ ، واعْفُ عنْهُ ، وَأَكرِمْ نزُلَهُ ، وَوسِّعْ مُدْخَلَهُ واغْسِلْهُ بِالماءِ والثَّلْجِ والْبرَدِ ، ونَقِّه منَ الخَـطَايَا، كما نَقَّيْتَ الثَّوب الأبْيَضَ منَ الدَّنَس ، وَأَبْدِلْهُ دارا خيراً مِنْ دَارِه ، وَأَهْلاً خَيّراً منْ أهْلِهِ، وزَوْجاً خَيْراً منْ زَوْجِهِ ، وأدْخِلْه الجنَّةَ ، وَأَعِذْه منْ عَذَابِ القَبْرِ ، وَمِنْ عَذَابِ النَّار »