سنی‌آنلاین ءِ گپ‌وتران گوں مکرانءِ رباتیکءِ تیمءِ کارمسترءَ

واجه عبدالاحد پاکباز ءِ نام و توار مرچی ماں گلیں بلوچستان، بلکیں ماں کل ایرانءَ برز اِنت. خاصکار ماں علمی محفل و دیواناں واجهءَ تمام پجاه‌آر اَنت.
واجه عبدالاحد پاکباز سراوانءَ “دِزّک”ءِ نندوک اِنت. واجهءَ وتی علم و زانت و وانگ ماں سراوانءِ “دانشگاه آزاد اسلامی”ءَ در برتگ. مرچی واجه پاکباز گوں ملکی و در ملکی رباتیکی تیماں رقابت کنت و هال وهال دات. واجهءِ تیمءَ بلّی که حکومتی و دولتی کمک نرسیت، بلے گوں وتی جهد و کوششءَ توانتگ‌اش که بازیں نامے بکٹ اَنت. چه آیاں یکے اِش اِنت که ماں چینءِ هوایی رباتیکءَ بهتریں جایزه و داداِش کٹ‌اِتگ.
عبدالاحد پاکبازءِ تیمءَ تازه‌یاں ماں اتریشءِ هوایی هوش مصنوعی مسابقهءَ بهر زرتگ و سومی جاهءَ اوشتاتگ.

سنی آنلاین ایرانءِ اهل‌سنتءِ هال‌رسانی سایتءِ گلگدارءَ گوں اِے واجهءَ دیمءَ بوان اِت:

سنی‌آنلاین: واجه پاکباز شمئے رباتیکءِ تیم تا هنو چنت ملکی و درملکی مسابقهءَ بهرزرتگ و کجام جاهءَ اوشتاتگ؟
عبدالاحد پاکباز: ما تا هنو 4 ملکی مسابقه و 7 در ملکی مسابقهءَ بهر زرتگ ماں بیرجندءِ مسابقه “پرنده هوشمند” ءَ اولی جاهءَ اوشتاتگ ایں و ماں دماوند مسابقهءَ دوم و امیرکبیر مسابقهءَ چهارم بوتگیں. و مئے درملکی مسابقه‌یانی رد چوش اِنت که ما ماں چین و امریکهءِ مسابقهءَ اول بوتگیں، روسیاءِ مسابقهءَ اول و ماں قطر و سوئیسءِ مسابقه‌یاں دوم و تازه‌ایں مسابقه اتریشءَ مئے شش نپری تیم سوم بوتگ.

سنی‌آنلاین: تا هنو شما را چه اختراعے بوتگ و چه نوکیں چیزے شما جوڑ کرتگ؟
عبدالاحد پاکباز: ماں مین‌یاب و معدن‌یابءِ ربات جوڑ کرتگ و همے پیم عمودپروازءِ بالی/هواپیما جوڑ کرتگ.

سنی‌آنلاین: پرچے شما اے تازه‌ایں مسابقه سوم بوت‌اِت سوب چی اَت؟ چه وتی اے نتیجهءَ رازیگ اِت؟
عبدالاحد پاکباز:مئے گورءَ امکانات و اسبابءِ کمی اَت ومئے زر هں کم اِتنت نتوانت ایں اسباب و وسایل به‌زوریں و مسابقاتءِ تمام بهراں بهر زورایں، پمشا ما امتیاز کم یارت و سوم بوت ایں یعنے مئے تمامیں امتیاز هما اولی مرحلهءَ بوتگ اَنت و آ دگه بهراں ما نبوتگیں. ما چه اے سومی رتبهءِ کٹگءَ رازی نه ایں ما په اول بیگءَ شتگ اِتیں مئے کارءَ اشکالے نه اَت بلکیں ما را امکانات و اسبابءِ کمی اَت. چه آدگه تیماں مئے اسباب باز کمتر اِتنت.

سنی‌آنلاین:‌ بلے شما چینءِ مسابقاتءَ اولی جاهءَ اوشتاتگ اِت اِت؟
عبدالاحد پاکباز: هو اودءَ اول بوت ایں ماں آ مسابقهءَ بازیں دوست و گموارےءَ ما را کمک کتگ اَت و ما توانتگ اَت وتی اسبابءَ سرجم کنیں. بلے اے مسابقهءَ کمتر کمک ما را رس اِت. بلکیں پمشا که آخر سال اَت.

سنی‌آنلاین: اے تیم که ماں اے مسابقهءَ چه شما دیم کپت اَنت هما شمئے چینی رقیب اِتنت یا دگر اِتنت؟
عبدالاحد پاکباز: چه هما تیماں هں ما پد منت ایں. البت ماں اے مسابقهءَ بازیں تیمے چه جهانءِ مختلف ایں کشوراں و چه مزنیں زانشجاهاں بهر زرتگ اَت. ما سوم بوت ایں چه اشیءَ سک دلپدرد بوتگ اِتیں پمشا ما گڈی دیوانءَ نه شت ایں. ما وتی سند رندءَ چه مسابقاتءِ برجم دارگءِ جاهءَ تهبیل گپت اَنت.

سنی‌آنلاین: شمئے هیالءَ اگه شمئے تیمءِ نام «مکران»ءِ جاهءَ مزنتریں نامے چوش «بلوچستان» بوتیں وش‌تر نه اَت؟
عبدالاحد پاکباز: بلے اگه “بلوچستان” بوت ایں گهتر اَت، بلےهنو تیمءِ نامءَ بدل کنگ مشکل اِنت هنو دراهیں ملکاں مئے تیمءَ گوں همے نام «مکران» جاه یار اَنت ما گوں همے نامءَ مسابقاتءَ شرکت کرتگ . باید چه هما اول بلوچستان ایں کت ایں که نکت ایں.

سنی‌آنلاین: استانی و کشوری مسئول و کارمستراں چه شمئے تیم حمایت و پشتیبانی کرتگ؟
عبدالاحد پاکباز: رسمی شکلءَ چه مسئولاں ما را کمک و مدتے نه رستگ، بلے حاجی مبارکی چهبارءِ منطقه آزاتءِ مدیر و دکتر تباور چهبارءِ بین‌المللی زانشجاهءِ کارمستراں چه وتی کمکیں اختیارات و اجازتءَ وتی توانءَ ما را کمک اش کرتگ همے واستءَ مئے تیم سوبیں بوتگ و په ملکءَ نامی کٹتگ. ما زانیں دولت چه ما دیمپانی نکنت و ما وتی دل ششتگ. مئے امیت اول خدا و رندءَ همے مئے استانی بلوچ ایں کارمستر اَنت بلکیں کمکے بکن اَنت.

سنی‌آنلاین: واجه پاکباز! شما را په ایرانی ورنا خاصکار په بلوچ‌ورنایاں چه پیگامے هست؟
عبدالاحد پاکباز: منی پیگام په ورنایاں همیش اِنت که وتی تمامیں جهدءَ کار گِر اَنت تا گوں علم و زانتءِ دربرگءَ وتی زانت و فهمءَ گیش کن اَنت و وتی دین و اسلامی ربیدگ و فرهنگءَ په دگراں معرفی کن اَنت و جهانیانی پیش دار اَنت.