نعمتانی یاد کنگ، اللهءِ دوستیءَ مئے دلءَ جاه دات

واجه مولانا عبدالحمیدءَ ماں وتی جمعهءِ گپاں (14 اسفند 1394)ءَ په اللهءِ نعمتانی یادکنگءَ تاکید کرت و گوشتی که نعمتانی یاد مئے محبت و دوستیءَ گوں اللهءَ گیش کنت.
شیخ‌الاسلام مولانا عبدالحمیدءَ رند چه آیه «يَا أَيُّهَا النَّاسُ اذْكُرُوا نِعْمَتَ اللَّهِ عَلَيْكُمْ هَلْ مِنْ خَالِقٍ غَيْرُ اللَّهِ يَرْزُقُكُم مِّنَ السَّمَاء وَالْأَرْضِ لَا إِلَهَ إِلَّا هُوَ فَأَنَّى تُؤْفَكُونَ» [فاطر: 3] وانگءَ گوشت: الله تعالی انساناں حکم کنت که منی بلاهیں نعمتاں که من شما را داتگ اَنت یاد اِش کن اِت.
واجهءَ دیمءَ گوشت: تمامیں نعمتے که من و شما وتی وجود و وتی چاگردءَ گندیں که انسان چه آیانی نام گرگءَ ناتوان اِنت، تمامیں چه رب‌العالمینءِ نیمگءَ اَنت
واجهءَ گوشت: اللهءِ نعمتانی یاد کنگ سوب بیت که اللهءِ معرفت و دوستی مئے دلءَ جاه گریت و اے دوستی سوب بیت که ما اللهءِ حکمانی سرءَ عمل کن ایں.
واجهءَ تاکید کرت: باید اللهءِ محبت که ماری بازیں نعمتے داتگ مئے دلانی جهلانکیءَ جاه گریت و په اللهءِ رضامندیءَ جهد کن اِیں. باید ما پهکاں دلءَ په اللهءَ دئیں و چه تمامیں گناه و کرداراں که اللهءَ ناراض کن اَنت پهریز کن‌اِیں.
واحهءَ په توبه و استغفار و دوری چه غفلتءَ تاکید کرت.

گچیں‌بوتگیں کاندیدایانی رقابت تمام بوتگ، هنو دوستیءِ وهد اِنت
واجه مولانا عبدالحمیدءَ ماں دگه بهرے چه وتی جمعهءِ گپاں چه مردمانی بهر زورگ ماں گوستگیں هپتگءِ گچیں‌کاریءَ منتواری کرت و گچیں‌بوتگیں جهگیری/نماینده گوشت اَنت که شمئے رقابت و پیشی گرگءِ و هد تمام بوت، هنو گوں وت دوست و سنگت بئیت و په ملک و مردمانی مشکلانی حل کنگءَ گوں وت جُهد کن اِت.
واجهءَ گوشت:‌ باز وش‌هالی جاه اِنت که پیشی هپتگءَ ایرانءِ مردماں شری سرءَ چه گچیں‌کاریءَ بهر زرت. ایرانءِ جنین و مردیناں خاصکار مئے استانءِ مردماں ماں اے گچیں‌کاریءَ گوں شوق حاضر بوت اَنت.
دارالعلوم زاهدانءِ کارمسترءَ گوشت: اِے گچیں‌بوتگیں کاندیدانی گچیں‌کنگءَ پیش داشت که ایرانءِ مردماں اعتدال و نرمی راه‌ دوست بیت. چه ترندروی و تنک‌چمیءَ بَداِش کئیت. چه اے گچیں‌کاریءِ نتیجهءَ پد تمامیں حزب و گروه وتی سیاستانءَ بررسی کن اَنت و وتءَ گوں مردماں همگام کن‌اَنت.
واجه مولانا عبدالحمیدءَ گچیں‌بوتگیں کاندید وصیت کرت اَنت که گوں وت «همدل» و «همفکر» به بنت و آیانی رقابت و پیشی گرگءِ وهد تمام بوتگ و هنو دوستی و رفاقتءِ وهد اِنت. آ باید وت ماں وتءَ دوست و برات به بنت و په مردمانی مشکلاتءِ حل کنگ و ملکءِ دیمرویءَ جهد کن اَنت.
واجهءَ سیستان‌وبلوچستانءِ مردمانی گچیں‌بوتگیں جهگیر گوشت اَنت: منی وصیت په شما همش اِنت که گوں همدل و همفکر به بت و شمئے در میانءَ جتایی مبیت. گوں کشوَری و استانی مسئول و کارمستراں همکاری کن‌اِت و چه وتی مردمءِ حقءَ دیمپانی کن اِت. اِے کار ملک و استانءَ آبات کنت و قوم و راجاں گوں وت تپاک کنت.
واجه مولانا عبدالحمیدءَ پیشی هپتگءِ گچیں‌کاری چه سالم‌تریں گچیں کاریاں زانت و گوشتی:‌ ما چه حکومت و کشوری کارمستراں خاصکار چه استانی کارمستراں و زاهدانءِ استاندارءَ منت‌وارایں که باز جهدش کرتگ، اپدءَ هں لهتے کاندیدءَ اعتراض کرتگ و کارمستراں هں قول داتگ که آیانی جوابءَ دینت، مئی وصیت هں همش اِنت که باید آیانی جواب دیگ به بیت اے یک کانودی کارے.
واجه مولانا عبدالحمیدءَ گوں اشاره په واجه مولانا نذیر احمد سلامی خبرگانءِ مجلسءِ گچیں بوتگیں جهگیر و واجه علیم یارمحمدی مجلس شورا اسلامیءِ گچیں‌بوتگیں جهگیرءَ که ماں دیوانءَ حاضر اِتنت، په آیانی سوبمندیءَ دعائی کرت.