واجه مولانا عبدالحمیدءَ ماں جمعهءِ وعظاں په گناهانی پهریز و چاگرد/جامعهءِ اصلاح و امر په معروف و نهی چه منکری، تمامانی وظیفه زانت.
زاهدانءِ جمعهءِ پیشنمازءَ ماں زاهدانءِ جمعهءِنماز (18 دی 1394/ 27 ربیعالاول 1437/10 ژانویه 2016) ءَ رند چه آیه «كُنتُمْ خَيْرَ أُمَّةٍ أُخْرِجَتْ لِلنَّاسِ تَأْمُرُونَ بِالْمَعْرُوفِ وَتَنْهَوْنَ عَنِ الْمُنكَرِ وَتُؤْمِنُونَ بِاللّهِ وَلَوْ آمَنَ أَهْلُ الْكِتَابِ لَكَانَ خَيْرًا لَّهُم مِّنْهُمُ الْمُؤْمِنُونَ وَأَكْثَرُهُمُ الْفَاسِقُونَ» [آل عمران:۱۱۰]تلاوتءَ گوشتی: یکّے چه دیندارانی وظیفه و رسالتاں اِیش اِنت که باید په وتی اصلاح و پاکیءَ و همے پیمءَ وتی چاگرد/جامعه و لوگیانی اصلاحءِ هیالداری ءَ بکن اَنت. حقیقی مسلمان همیشه وتی اصلاح، چاگردءِ اصلاح و په جهانءِ اصلاحءَ فکر کن اَنت که چطور اصلاح ببنت.
واجهءَ دیمءَ گوشت: فساد، تفرقه و جتاییءِ دیمگیری هر مسلمانءِ وظیفه اِنت. عالمانی وظیفه چه دگراں گیشتر اِنت. الله تعالی عالم و عقلمندانءَ هژار دات که اگه په وتی ظیفهءَ عمل مکن اَنت و چاگردءَ چه فسادءَ مه روک اَنت، جامعه اللهءِ عذابانی تهءَ گرپتار بیت. هرچاگردے که گناهءِ نیمگءَ بروت، آئیءِ تهءَ حقکشی و جنایت به بیت، گڑا آ جامعه هلاکت و نابودیءِ نیمگءَ روان اِنت.
زاهدانءِ جمعهءِ پیشنمازءَ دیمءَ په لهتے چه اجتماعی مفاسد و هرابیاں اشاره کت و گوشتی: مئے اسلامی چاگردءَ انگت جاهلی اثرات گندگ بنت. مرچگیں جاهلیت، چه اسلامءَ پیشءِ جاهلیتءَ باز بدتر اِنت. قومی تعصّب، دروغ و تهمت چه جاهلیتءِ اثرات اَنت. لهتے نازانت گروگانگیری کن اَنت و په وتی مرادانی رسگءَ پیر و زهگانی سرءَ رحم نکن اَنت و آیانءَ گروگان بر اَنت گوں اِشیءَ که اسلامءِ شریعتءَ حکم کتگ که په زهگ و پیراں نرم دلی کنگ به بیت.
واجهءَ دیمءَ گوشت: مرچی یکے چه دژمنانی طرح و برنامهیاں اِیش اِنت که گناه و سِلکاری ماں جامعه و چاگردءَ رواج دینت. آ لوٹ اَنت چه ماهواره و دگه برنامهیانی طریقءَ اسلامی دود و فرهنگءَ چه بین ببرنت و وتی هرابیں دود و فرهنگءَ رواج دینت. گڑا باید تماماں هژار به بنت.
دارالعلوم زاهدانءِ مدیرءَ جامعهءِ اصلاح و پاکی تمامامیں مردمانی کار و وظیفه زانت و گوشتی: جامعهءِ اصلاح تهنا عالمانی کار نه اِنت، بلکیں هر مسلمان باید په چاگردءِ اصلاحءَ چه گناه و فسادءَ کوشش بکنت. هرکس وتی توانءَ گوں پنت و اندرزءَ نافرمانی و گناهءِ دیمءَ بگریت. اللهءِ حکمانی سرپیچی سک گران اِنت. مسلمان نباید قرآن و سنتءِ خلافءَ بکن اَنت.
چه سعودیعرب و ایرانءِ زهریءَ مسلماں ضرر کن اَنت
شیخ الاسلام مولانا عبدالحمیدءَ ماں دگه بهرے چه زاهدانءِ جمعهءِ نمازءِ دیوانءَ په شیخ باقر النمرءِ پاهو/اعدامءَ اشاره کت و گوشتی: شیخ نمرءِ اعدام گرانیں هبرے اَت. بازیں مردمے پریشان و جذباتی کت. شیخ نمر یکے چه سعودی عربءِ عالمان اَت که رند چه زندانیءَ بازیں پاٹی یے په آئیءَ در کپت.
واجه مولانا عبدالحمیدءَ گوشت: شیخ نمرءِ اعدامءَ نه تهنا شیعه دلپدرد کرت اَنت، بلکیں شیعه و سنی چه اے کارءَ دلگران بوت اَنت، پرچے که عالمانی کشگ شیعه و سنی حتی مسیحی عالمانی کشگ، مردمانءَ جذبات و احساساتءَ ٹپّی کنت. مگر اشی که آ عالم قتلے بکنت و رندءَ شریعتءِ حکم آئیءِ سرا جاری کنگ به بیت. بلے اگه یک عالمے خاصکار هنچینے که مردماں په آئیءَ واهگ هست و قتل و کوشے نکرتگ، گڑا اِے نباید کشگ به بیت و مردمانی جذبات چست کنگ به بنت.
زاهدانءِ جمعهءِ پیشنمازءَ دیمءَ گوشت: رند چه شیخ نمرءِ اعدامءَ بازیں اعتراضے کنگ بوت. ما هں اشیءِ اعدام تقبیح کت و بد زانت . اگه یکےءَ مشکلے هست، باید دگه نرمیتریں رپتارے گوں آئیءَ کنگ به بیت، سزایی کشگ نه اِنت.
واجهءَ دیمءَ په سعودیءِ سفارت و کنسولگریءِ اُرُش ماں ایرانءَ اشاره کت و گوشتی: اُرُش/حملهاے که سعودی عربءِ سفارتءَ ماں تهران و کنسولگریءَ ماں مشهدءَ کنگ بیت، ایرانءِ مردم اے کارءِ لائق نه اِتنت، پرچے که سفارتجاه و کنسولگریانی سرا ارش شریعت، عقل و بینالمللی قانودءِ خلافءَ اِنت. اگه یک دولتےءَ غلطیں کارے کت باید آ دولتءِ جهگیر ماں دگه ملکاں امنیتءِ تهءَ به بنت و نباید وتسریں مردم کارے بکن اَنت که تمامیں مردمانی آبرو و عزتءَ به برنت.
واجهءَ گوشت: سعودی عرب و ایرانءِ زهریءَ په منطقه و مسلماناں فائده و سوتے نیست، بلکیں بازیں نقصان و ضررے داریت. ایران و سعودی عربءَ ماں میاںرودراتک/خاورمیانهءَ مزنیں جاگاهے هست و جهان اسلامءَ دو مزنیں ملک اَنت که توان اَنت مردمانی مشکلاتءَ حل بکن اَنت و بگیشّین اَنت، گڑا نباید اِے دوئیں ملک گوں وت به مِڑ اَنت. اسلامی ملکاں نباید وتی رابطهءَ گوں وت به سند اَنت. اے دابیں کار مسلمانانی ضررءَ اِنت. ما را امیت اِنت که هرچے زودتر گوں شور و گپوتراں اے رابطه اپدءَ بر قرار کنگ به بیت.
واجه مولانا عبدالحمیدءَ وتی گپانی گڈسرا چه «پاهو/اعدام»ءَ ماں لهتے ملکاں گلّه کت و گوشتی: اعدام شریں چیزے نه اِنت و سکتریں سزا اِنت. په اعدامءَ ماں اسلامءَ کم جاهءَ حکم دیگ بوتگ. ما چه اسلامی و غیر اسلامی ملکاں لوٹیں که وتی اے قانودءَ اپدءَ بچار اَنت. هر ملکءِ قانود چارگ به بنت اگه ضرورتے هست اَت باید ٹگلینگ به بنت . اے قانون چه آسمانءَ ایرگیج نبوتگ اَنت، بلکیں انساناں جوڑ کتگ اَنت و انسان هرچنت که مزنیں فقیه و عالمے هں به بیت اپدءَ بیت کنت که اشتباه بکن اَت.