واجہ مولانا عبدالحمیدءَ اے هپتگءِ جمعہءِ وعظاں گوشت کہ انساں گوں وظایف و مسئولیتانی انجام دیگءَ رستگار و کامیاب ءِ بیت.
پہ “سنی آنلاین”ءِ هالرسانی سایتءِ هالکاریءَ، شیخالاسلام مولانا عبدالحمیدءَ وتی جمعہ 6 آذر 1394 (15 صفر 1437)ءِ وعظ، گوں آیه «إِنَّ الَّذينَ آمَنوا وَعَمِلُوا الصّالِحاتِ كانَت لَهُم جَنّاتُ الفِردَوسِ نُزُلًا» بنگیج کت اَنت.
واجہ وتی وعظانی اولی بهرءَ گوشت: الله تعالی، تمامیں کائنات و انسانانی خالق و جوڑ کنوک اِنت.اللهءَ انسان پہ یک مرادے جوڑ کرتگ. هر موجودےءَ ماں دنیاءَ یک ماموریتے هست و یک حکمتے واستءَ جوڑکنگ بوتگ. ماه و استار پهکاں الله حکمءِ تابع اَنت و چہ اللهءِ حکمءَ سرپیچی نکن اَنت.
واجہ مولانا عبدالحمیدءَ پہ انسانءِ بُرزیں جاگاهءَ ماں مخلوقاتءِ در میانءَ اشاره کت و گوشتی: الله تعالیءَ انسان پہ یک مزنیں مرادے جوڑ کرتگ، انسانءِ رسالت توحید و راستیں عقیدهءِ سرا باور کنگ و نیکیں کردار کنگ اِنت.
زاهدانءِ جمعہءِ پیشنمازءَ دیمءَ گوشت: الله تعالی، انسانءَ پہ آئیءِ رسالت و مسئولیتءَ آزمایش کنت، اگہ انسان وتی مسئولیت و رسالتءَ جاه بیاریت و آئیءَ پہ شری ادا بکنت، گڑا آئیءِ ارزش چہ تمامیں مخلوقاتءَ باز بُرزتر روت. اپسوز اِنت کہ مرچی انسان وتی رسالتءَ جاه نیاریت و چہ وتی تعهدات و وظیفہءَ جِه اِیت.
کار و وظیفہیانی کنگ سکّ نہ اِنت
واجہءَ دیمءَ پہ انسانءِ غفلت و بے هیالیءَ چہ وتی مسئولیت و و ظیفہیاں اشاره کت و گوشتی: بازینے گوش اَنت کہ وظیفہیانی جاه آرگ سک اِنت، بلے انسان پہ آ کارے کہ سک بہ بیت و چہ توانی در بہ بیت حکم دیگ نبوتگ. حقیقت اِیش اِنت کہ ما چہ وتی مسئولیتاں جِهاِیں و شیطان و نفس ما را تلقین کن اَنت کہ دین سک اِنت.
شیخالاسلامءَ دیمءَ گوشت: الله تعالیءَ قرآن پہ تمامیں انساناں دیم داتگ و اسلام لوٹیت کہ تمامانءَ بهشتءَ بہ بارت. محمد رسول الله کہ پہ پهکیں انساناں دیم دیگ بوتگ، چہ مسلمان و تمامیں انساناں گله ای هست، الله تعالی و قرآن مجید، چہ ما گله کن اَنت کہ پرچا وتی نگهبتیءِ راه، یلہ داتگ و چہ اللهءِ راهءَ جِہ ایں و دیم پہ شیطان رو اِیں. چہ مسلمانءَ گله هست کہ پرچا واقعی مسلمان نہ بنت؟ وهدے کہ وتءَ را اللهءِ بندگ زان اَنت، گڑا پرچا اللهءَ بندگی نکن اَنت؟ پرچا انسانانی حق و حقوقءَ جاه نیار اَنت.
واجہءَ دیمءَ گوشت: اللهءَ دوست بیت کہ انسان چہ وتی وظیفه و مسئولیتءَ مہ تچیت، بلکیں وتی مسئولیتءَ پہ شری انجام بدات. پت و ماتاں پہ وتی زهگانی سرا مسئولیت هست، بازیں پت و ماتے پہ وتی زهگانی دین و اخلاقءِ سرءَ توجہ نکن اَنت.
گوں وظیفہ و کارانی انجام دیگءَ انسانءِ وجودءَ تحوّل و دگریءِ کئیت.
ایرانءِ اهلسنتءِ مزنیں واجہءَ گوشت: انسانءِ نگبهتی و پیروزی ماں دنیاءَ اشیءِ تهءَ اِنت کہ چه وتی وظیفہیاں مہ تچیت. وهدے کہ انسان چہ وتی مسئولیت و وظیفہ یاں مہ تچیت ، نماز و روچگ ءَ هما پیم کہ اللهءَ پرمان داتگ ادا بکنت، گڑا انسانءِ و.جودءَ تحولءِ کئیت. انسان گوں اللهءِ حقوقءِ ادا کنگءَ چم و گوشءِ حفاظت و گناهانی پهریزءَ، پہ کمال و مزنی رسیت.
واجہ مولانا عبدالحمیدءَ انسانءِ پیروزی ماں “مسئولیت و تعهدات”ءِ ادا کنگءَ زانت و گوشتی: مزنیں پغمبراں حاضر اِت اَنت کہ وت و وتی زهگانءَ چہ دستءَ بدینت ، بلے الله ءِ حکماں پروشگ مہ بنت. حضرت ابراهیم علیه السلام، نمرودءِ آسءَ شت و وتی زهگءِ ذبح کنگءَ تیار بوت تا اللهءِ حکم مہ پرش اَنت.
واجہءَ گوشت: بهشتءِ روگ آسان نہ اِنت. بهشتءَ راه و مسیرے هست؛ هما کہ بهشتءِ راهءَ بروت، بهشتءَ رسیت. بهشتءِ بها گران اِنت. آ کہ اللهءِ مشتری اِنت باید رنج و زحمتانءَ به سگیت و استقامت بکنت. گناه و معصیت انسانءَ جهنمءَ بر اَنت. بدی بکن اِین و نیکیءِ انتظار و ودارءَ بہ ننداِیں اے عقلءِ خلاف اِنت.
واجہ مولانا عبدالحمیدءَ دیمءَ مردم پہ پهریز چہ غفلت و مردمانی حقوقءِ جاهءَ آرگءَ دعوت دات اَنت و تاکیدی کت: اپسوز اِنت کہ ما نماز بوانین و اللهءِ یاتءَ مہ کپیں، اے اِشیءِ دلیل اِنت کہ ما دنیاءِ شیدا بوتگ اِیں. کارمستر باید ملت و مردمءِ حقءَ ادا بکن اَنت. جن و مرد یکادگرءِ حقوقءَ رعایت بکن اَنت.
استانءِ ناامنی ایرانءَ ضررءَ اِنت و جهانی مزنواکانءَ سود بر اَنت
واجہ شیخالاسلام مولانا عبدالحمیدءَ ماں دگہ بهرے چہ وتی جمعہءِ گپاں گوں تاکید پہ استانءِ سیستانوبلوچستانءِ امنیتءِ ضرورتءَ ، هر دابیں نا امنیءِ آرگی ایرانءِ ملکءِ ضررو دنیاءِ مزنواکانی فایدهءَ زانت و گوشتی: ما گندگائیں کہ نا امنیءَ جهان مان پوشتگ. بلے اے اللهءِ احسان اِنت کہ مئے ملکءَ امنیت بر قرار اِنت، گڑا باید این نعمتءِ شکرءَ بگر ایں.
واجہءَ دیمءَ گوشت: ایرانءِ بدواه و دژمناں کوشش کن اَنت تا ایرانءَ هں تفرقه و ناتپاکی بیار اَنت. آ پہ وتی فایدهءَ هردابءَ منتگ لوٹ اَنت کہ ایرانءَ نا امن بکن اَنت، بلے باید ما سرپد بئیں کہ هر دابیں ناامنی ایرانءَ ضرر دات و دژمن سود بر اَنت. اسرائیل و جهانِ دگہ مزنواکاں چہ اختلاف و ناامنیاں سوت بر اَنت، گڑا باید ما پهکاں هژّار بہ بئیں کہ ملکءَ نا امنیءَ پیش مئیت.
زاهدانءِ جمعہءِ پیشنمازءَ گوشت: تازهیاں لهتے بمبتراکیءِ هال ماں استانءَ رستگ کہ ما چہ اے کاراں باز دلگراں بوتگ اِیں، ما ٹِکّءَ ٹکءِ گوشیں کہ استانءِ مردم هچکسءَ ناامنیءِ اجازتءَ ندینت.
واجہءَ گوشت: الله ءِ شکر اِنت کہ مرچی استانءَ تفاهم هست. استانی کارمستراں گوں مردماں هور اَنت و دور گِند اَنت. شیعه و سنیءِ براتی چہ هر زمانےءَ گیشتر بوتگ.اے براتی و تپاکی مردمانی فایدهءَ اِنت. کہ پہ استانءِ آبادی و دیمرویءَ و کار و دَنداءِ جوڑ بیگءَ کمک کنت. اے امنیت و تپاکی هچ پیمءَ نباید هراب کنگ بہ بیت.
دارالعلوم زاهدانءِ کارمسترءَ تاکید کت: مئے استانءِ مردمانی لوٹ اِیش اِنت کہ هچکسءَ اجازت دیگ مبیت کہ استانءَ نا امن بکن اَنت. هر پیماِیں ناامنی ماں استانءَ استان و کشورءِ ضررءَ اِنت. اگہ چہ استانءِ مردماں مشکل هست، و پریشانی اش هست، بلے جنگ و ناامنی راهی نہ اِنت، بلکیں باید چہ صحیح و قانونی راهاں وتی مشکلاں حل کن اَنت.
واجہءَ گڈسرءَ امیت کش ات که الله تعالی مئے استانءِ امنیتءَ مدامی بکنات و هچکس متوانات کہ امنیت ءَ هراب بکنت.