پاریسءِ نوکیں اتفاقءَ جهان اسلام هں پریشان کت

واجہ مولانا عیدالحمیدءَ پاریسءِ گُڈّی بمب و تراکانی تراکینگ سک دردناک زانت و گوشتی اے حادثہءَ اسلامی ملک و تمامیں جهان پریشان کت.
پہ “سنی‌ آن‌لاین”ءِ هال‌رسانی سایتءِ هالکاریءَ واجہ شیخ‌الاسلام مولانا عبدالحمیدءَ اِے هپتگءِ جمعہ وعظاں (29 آبان 1394/ 8 صفر1437/ 20 نوامبر2015) رند چہ آیه «وَاتَّقُواْ فِتْنَةً لاَّ تُصِيبَنَّ الَّذِينَ ظَلَمُواْ مِنكُمْ خَآصَّةً وَاعْلَمُواْ أَنَّ اللّهَ شَدِيدُ الْعِقَابِ» [انفال:25] وانگءَ گوشتی: الله تعالیءَ ما را چہ انچیں فتنہ‌اے آسءَ وهدے کہ کپیت، تَرّ و هُشکءِ نچاریت و ظالم و مظلومءَ سوچیت، هژّار داتگ و ترسینتگ.
واجہءَ دیمءَ گوشت: اے زمانگءَ اختلاف و ناتپاکیءِ آس روشن بوتگ، صهیونیست و یُورپّی ملکاں وتی شُومّیں هدف ومقصد ماں اسلامی ملکاں دستءَ آرتگ اَنت و سوبمند بوتگ اَنت.
واجہءَ پاریسءِ گڈی اتفاقءِ بارهءَ گوشت: پاریسءِ حادثہءَسرجمیں جهان سُرینت و اسلامی ملک هں چہ اِے حادثہءَ ناراحت بوت اَنت. هچکس پہ پاریسءِ حادثہءَ راضی نہ اَت، و مسلماناں گوں بیراں بوتگینانی لوگیاں دلپدردی کرت، بلے چو مہ بیت کہ اِے اتفاقءِ آس دگہ جاهاں بہ کپیت و کل جهانءَ ناكام بکنت.
ما پیشءَ گوشتگ اَت کہ اگه پہ دنیاءِ بمب و تراکانے کہ انچو وت سرءَ تراکینگ بنت پکر و برنامه اے مہ بیت و پہ سُهلءَ کوشش مہ بیت آخرءَ بازیں ملکے امنیت هراب ترّیت.
زاهدانءِ جمعہءِ پیشنمازءَ اسلامی ملکانی تپاکی راهے پہ اے مشکلاتءِ حل و گیشّینگءَ زانت و گوشتی: رونند و یورپیاں اسلامی ملک وت ماں وتءَ جنگ داتگ اَنت و آیانی در میانءَ اختلافش جوڑ کرتگ و تا وهدے کہ اسلامی ملکاں گوں وت تپاک مبنت مشکل حل نہ بنت و اِے آسءِ دیم گرگ نہ بیت. اگہ تمامیں اسلامی ملکاں بیاتکین اَنت گوں وت سُهل و مذاکره‌اش بہ کرتیں تمامیں مشکل حل بوتگ اِت اَنت.
واجہ مولانا عبدالحمیدءَ گوشت: سازمان ملل و دگہ مزن‌واکاں اے توان هست اَت کہ اسلامی و میان‌رودراتکءِ مشکلاں حل بکن اَنت، بلے اے کار اِش نہ کت امریکه و یورپءَ توان هست کہ فلسطینءِ مشکلءَ حل بکن اَنت، پرچا کہ اسرائیل گوں آیاں همدست اِنت و آیانی هبرءَ دگر نکنت، بلے اپسوز اِنت کہ اِشاں چوش نکت.
دارالعلوم زاهدانءِ کارمسترءَ گوشت: جهانءِ هنوگیں تهدید و بیم سک جدی و خطرناک اِنت. بے سریں بمب و تراکانی تہءَ گیر چہ اصلی طرفاں، دگہ بازیں بے‌گناهے هں بیراں کنگ بیت بازیں زهگ و تِبلے کشگ بیت و بازیں بے گناهے آوار جنگ بیت.