شیخالاسلام مولانا عبدالحمیدءَ ماں زاهدانءِ جمعهءِ نمازوانوکانی دیوانءَ قلب و دل، تقوا و خدا ترسیءِ اصلی مرکز و جاگاه زانت و پہ دلءِ پاکی و اصلاحءَ تاکیدی کت.
زاهدانءِ جمعهءِ پیشنمازءَ ماں جمعه (1 آبان 1394/ 21 اکتوبر 20015)ءَ رند چہ آیہ «وَلَقَدْ ذَرَأْنَا لِجَهَنَّمَ كَثِيرًا مِّنَ الْجِنِّ وَالإِنسِ لَهُمْ قُلُوبٌ لاَّ يَفْقَهُونَ بِهَا وَلَهُمْ أَعْيُنٌ لاَّ يُبْصِرُونَ بِهَا وَلَهُمْ آذَانٌ لاَّ يَسْمَعُونَ بِهَا أُوْلَئِكَ كَالأَنْعَامِ بَلْ هُمْ أَضَلُّ أُوْلَئِكَ هُمُ الْغَافِلُونَ» [اعراف:179] ءِ وانگءَ گوں اشاره پہ «دل»ءِ جاگاهءَ ماں انسانءِ رهشونیءَ گوشتی: مئے وجودءَ یک مرکزے هست کہ سرجمیں بدنءَ رهشونی کنت. اگہ اے مرکز جوڑ و اصلاح بہ بیت، گڑا انسانءِ تمامیں اعضا پہ خیر و نیکیں کارءَ دیم کنت و الله تعالیءِ حکمانی فرمانبردار بیت، بلے اگہ دل فاسد بہ بیت، گڑا انسانءِ تمامیں اعضا فاسد بنت و گناهانی تہءَ گرپتار بنت. پیغمبرصلیاللهعلیهوسلمءَ بِیم داتگ کہ شمئے بدنءَ یک چُنڈے گوشت هست، کہ بدنءَ رهشونی کنت، اگہ آ اصلاح بیت، بدنءِ تمامیں اعضا خیر و نیکیءِ نیمگءَ دیم کن اَنت، گڑا باید دلءِ حالءِ هیالداری بہ بیت، و گوں نیکیں اخلاق و رپتارءَ، پاک و صاف کنگ بیت. هر وهد کہ دل هدایت بوت، و ایمان ماں دلءَ جاه گپت، انسانءِ ایمان پوره بیت و اللهءِ فرمانءِ چیرا جاه گریت.
واجہءَ گوشت: مرچی ما بدنءَ سینگاراِیں، جان شوداِیں، پہ وتی پُچ و جانءَ کوشش کن اِیں، شوکیں لوگ و ماشین و پچ گورءَ کن اِیں، گهاراں گوں وڑوڑایں جواهراتءَ وتءَ را سینگار اَنت، بلے اصلی گپ ایش اِنت کہ ما وتی دلءَ آراسته بکن اِیں.
زاهدانءِ جمعهءِ پیشنمازءَ چہ مشتبہ و گناهانی مقدماتءِ پهریز کنگءَ، تاکید کت و گوشتی: اسلامءِ تعلیم همیش اِنت کہ تمامیں گناه خطرناک اَنت و باید چہ گناهانی نزیک بیگءَ پهریز کنگ بہ بیت. باید چہ حرام، مکروه و حرامءِ مشابهاتءَ، دیری بکنایں، تا کہ فساد و هرابیانی تهءَ مہ کپ اِیں. پیغمبرصلیاللهعلیهوسلمءَ پہ اشی کہ ما حرامءِ تهءَ مہ کپایں، چه حرامءِ مشابه و مشتبهاتءَ هں ما را منع کرتگ. و فرمانی داتگ کہ حرامیں چیزّانی نزّیکءَ مہ رو اِت کہ خطرناک اَنت. پرچا آ کسے کہ گناهانی نزّیکءَ روت، اے بیم هست کہ گناهانی تہءَ بہ کپ اِیت. همے واستءَ قرآنءَ گوشتگ: : «لاتقربوا الزنا» و «لاتقربوا مال الیتیم». زنا و چورهءِ مالءِ نزّیکءَ مہ رو اِت.
دارالعلوم زاهدانءِ کارمسترءَ «اخلاص» تمامیں اعمالءِ بنیادی ڈیکی و رُکن زانت و گوشتی: پیغمبر صلیاللهعلیهوسلم،ءَ گوشتگ: إن الله لاینظر إلی صورکم و أجسامکم و لکن ینظر إلی قلوبکم و أعمالکم»؛ الله تعالی، انسانءِ ظاهرءَ کہ گوں پُچّاں سینگارگ بوتگ نہ چار اِیت. الله، دل و نیّتانی حالءَ چاریت کہ باریں دلءِ تهءَ اخلاص هست یا کہ پہ مادی منفعت و شهرتءِ شوهازءَ کار کن اَنت. هرکار باید اللهءِ خاطرءَ کنگ بہ بیت. امام بخاریءَ وتی کتابءِ اولی حدیث اخلاص بارهءَ آرتگ . دین باید سرجمیءَ گوں اخلاص بہ بیت، الله تعالی نیتانءَ چاریت کہ کار پہ چہ مقصدے کنگ بنت.
زاهدانءِ جمعهءِ پیشنمازءَ پہ دلءِ اصلاح کنگءَ تاکید کت و گوشتی: کہ اصلی روژنائی دلءِ روژنائی اِنت نہ چمّانی، مرچی اگہ مئے چمّ ضعیف بہ بنت آیانءَ جرّاحی و دوا و درمان کن اِیں، باید همے وڑءَ وتی دلءَ هں دوا و درمان بکن ایں. دل، دَنز و لوڈءِ گر ایت، و اگہ آئیءِ هال چونی مہ بیت، سک بیت و مُهر وارت و مریت.
زاهدانءِ جمعهءِ پیشنمازءَ وتی جمعهءِ گپانءِ اے بهرءِ گڈسرءَ مردم پہ الله ذکر و یات و درود و پہ پیغمبر و استغفار و ماپیءَ دعوت دات اَنت و گوشتی: باز دروت دیم دیگ پیغمبرصلیاللهعلیهوسلمءِ دوستی ءِ نشانی اِنت . دلے کہ آئیءِ تهءَ الله و الله ءِ رسولءِ محبت مه بیت آ دل مرتگ. دلءِ زندگی ماں الله و الله رسولءِ محبت محبتءِ تهءَ اِنت.
*امام حسینءَ باعزّتاِیں مرک، چہ چَمجهلیءَ گچیں کرت
واجہ مولانا عبدالحمیدءَ ماں زاهدانءِ جمعهءِ نماز وانوکانی دیوانءَ گوں اشاره پہ امام حسین رضیاللهعنه، ءِ قیام/جُنزءَ، «کربلا»ءِ پیشامد/ واقعاتی بیات کت اَنت.
شیخالاسلام مولانا عبدالحمیدءَ گوں اشاره پہ امام حسینءِ قیام و جُنزءَ گوشتی: امام حسن و امام حسین رضیاللهعنهما، حضرت علی و فاطمهءِ زهگ و پیغمبر صلیاللهعلیهوسلمءِ نماسگ اَنت. پیغمبر صلیالله علیهوسلمءَ گوں حضرت حسن و حسینءَ سک باز دوستی هست اَت.
واجہءَ گیش کت: یک روچے پیغمبر صلیالله علیهوسلمءَ حضرت حسین بغلءَ کت و گوشتی: اے منی زهگ سید و واجهے، الله تعالی اشیءِ سببءَ مسلمانانی دو گروهءِ میانجینءَ و درمیانءَ صلح و وشّی کاریت و انچو بوت، وهدے کہ حضرت علی رضیاللهعنه، ءِ شهادتءَ رند، مسلمانانی حکومت حضرت حسنءِ دستءَ کپت گوں حضرت معاویهءَ سُهلی کت و مسلمانانی دو گروهءِ در میانءَ وشی آرت.
زاهدانءِ جمعهءِ پیشنمازءَ گوشت: حضرت حسن و حسین پیغمبر صلیالله علیهوسلمءَ سک دوست اتنت. اے دوئیں واجہ ماں وتی زندگی، اخلاق و رپتارءَ گوں وتی واجهیں پت و پیغمبر صلیالله علیهوسلمءِ خاندانءَ سک مشابه اتنت. اشاں دلیری، بهادری، خدا ترسی ، مزندلی، اخلاق و رپتار چہ پیغمبر صلیالله علیهوسلمءَ و حضرت علی و فاطمهءَ پیشگ/ارث برتگ اَت.
دارالعلوم زاهدانءِ کارمسترا دیمءَ واقعه کربلاءِ لهتے بهر بیان کت و گوشتی: وهدے کہ مسلمانانی دین، سرنوشت، یک نااَهل، نازانت، نالائک و سست ایں انسانے دستءَ کپت، حضرت حسین ءَ زانت کہ اگہ حالات همے وڑءَ دیمءَ بروت، آ تمامیں قربانی یے کہ صحابهءَ ماں «بدر» و «احد» ءِ پڑ/ میدان ءَ داتگ پہ هدر رو اَنت و مردمانی دین و دینداری برباد بیت، گڑا پہ دینءِ حفاظتءَ قیامی کت و جاهی جت.
واجہءَ گوشت: وهدے کہ حضرت حسین کربلاءِ میدانءَ رست، سهیگ بوت کہ کوفهءِ مردم، و آیاں کہ گوں آئیءَ بیعتاش کرتگ ات، وتی بیعتاش پروشتگ و حضرت مسلم بن عقیل آئیءِ قاصدش شهید کرتگ و لوٹ اَنت کہ گوں امام حسینءَ مقابله بکن اَنت، گڑا امام حسینءَ اجازه لوٹ ات کہ آئیءَ اجازه بدینت، بروت گوں یزیدءَ مشوره بکنت یا کہ بِلّ اَنتی گوں وتی یاراں دیم پہ مدینہءَ پچ بہ تریت، بلے آیاں هیچ یکے چہ اے دوئیں لوٹاں/ درخواستاں پوره نکت اَنت و گوشتش: تو باید تسلیم ببئے! امام حسینءَ تسلیم بیگ پہ وت چمجهلی و ذلّتے زانت و گهتری زانت کہ گوں آیاں جنگ بکنت و شهید بہ بیت.
مولانا عبدالحمیدءَ گوشت: یزیدیاں ماں کربلاءِ میدانءَ پہ امام حسین و آئیءِ بیل و یاراں انچیں ظلم و جنایت کت کہ زبان چہ آیانی بیان کنگءَ عاجز اِنت و سُچیت. بلے آیاں کہ امام حسین و آئیءِ یاراش شهید کت اَنت، پہ ذلت و خواری مُرت اَنت. عبیداللهبنزیاد و شمر و… پہ وتی هدف و مقصدءَ نہ رست اَنت. ذلیل و وار بوت انت، یزید هں کہ بازیں ظلمے کتی و واقعه «کربلا» و «حرّه» بدترین اَنت، جوانی عمرءَ گوں سکیں نادراهی یے دپ کپت و چہ دنیا شت.اے اللهءِ سنت اِنت آیاں کہ پہ وتی قدرت و دنیاءَ، بے میارانی هونءَ ریچانت، و ظلم و بے عدالتی کن اَنت، هچبر پہ وتی شومّیں مقصدان نہ رس اَنت.
زاهدانءِ جمعهءِ پیشنمازءَ گوشت: امام حسینءَ ذلّت و چمجَهلی تحمل کت نکت، دلیری مرکی چہ اسارت و تسلیم بیگءَ گچین کت. امام حسینءَ گوں وتی جنزءَ، امت یاد دات که عزّتءَ، پہ واری و ذلتءَ گچین بکنت.
مئے زمانگءَ هں بازینے حسینی یا یزیدی انت
واجہ مولانا عبدالحمیدءَ ماں زاهدانءِ جمعهءِ نمازءِ دیوانءَ گوشت: مرچی بازینے چہ انساناں «یزیدی» و «بازینے» حسینی اَنت؛ آ کہ پہ وتی قدرتءِ دستءَ آراگءَ پہ ظلم وجنایتءَ دست جن اَنت، هونءِ ریچ اَنت، عدالتءَ لگتمال کناَنت، نیکیں مردم و خداترسانءَ گار و بیگواه کن اَنت، اے یزیدءِ راهءَ اَنت، بلے آ کہ سنت و پیغمبر صلیالله علیهوسلم، صحابه و اهلبیتءِ روش و طریقہءَ رند گیری کن اَنت ، آ واکی «حسینی» اَنت.
زاهدانءِ جمعهءِ پیشنمازءَ گوشت: اے کہ ما وتءَ را پہ آ بزرگاں هورترین ایں و وت «علوی»، «عمری»، «عثمانی» و «حسینی» بگوش اِیں، هچ دردے دوا نکنت، بلکیں باید آ بزرگانی سیرت و رپتارءَ وتی زندگیءَ بیار اِیں، آ کہ پیغمبر صلیالله علیهوسلمءِ سنتءَ رندگیری کن اَنت، پہ عدالت و انصافءَ کوشش کن اَنت و گوں ظلم و بے عدالتیءَ جنگ دینت، آ پہ پیغمبر صلیالله علیهوسلم، و اهلبیتءَ نزّیکتر اَنت.
زاهدانءِ جمعهءِ پیشنمازءَ گڈسرءَ گوشت: صحابه و اهلبیتءَ تهنا آیانی شهادت و بیگءِ روچءَ یاد مکنایں، بلکیں سالءِ دراجیءَ باید آیانی ذکر و یات کنگ بہ بیت، آیانی کردار مئے زندگیءِ نمونہ بہ بیت. هما پیم کہ صحابه و اهلبیتءِ بزرگاں وتی تپاکی و براتی جاه آرت و گوں وت دوستی اش هست اَت، مرچی هں باید شیعه و سنی گوں وت دوستی بکن اَنت و اے تپاکی و براتیءَ جاه بیار اَنت و یکّادگرءِ حقءَ بدینت.