محرّمءِ پُرس و پاتیایی دیواناں، دگہ مذهبانی ارزشانی هیالداری بہ بیت

واجہ مولانا عبدالحمیدءَ ماں زاهدانءِ جمعهءِ نمازوانوکانی دیوانءَ گوں اشاره پہ محرمءِ ماه و شیعیانی پرسی و پاتیایی دیوانانی برجم دارگءَ، پہ دگہ مذهبانی مقدسات و ارزشانی حرمتءِ هیالداریءَ تاکید کت.
پہ سنی‌آن‌لاینءِ هالرسانی سایتءِ هالکاریءَ، زاهدانءِ جمعہءِ پیشنمازءَ ماں جمعه 24 مهر 1394 همدپ گوں 2 محرم 1437ءِ وازّاں، گوشتی: بلکیں مئے شیعه‌ایں برات ایرنگ پگر کن اَنت کہ اهل‌سنتءَ گوں پیغمبر صلی‌الله‌علیه‌وسلمءِ لوگی‌مردم و خاندانءَ دوستی نیست اِنت و پہ آیانی پیشامداں بے سُدّ اَنت، بلے اگاں ماں شیعه و سُنّیانی ملکاں پٹ و پول کنگ بہ بیت، پدّر بیت کہ پیغمبرءِ خاندانءِ نامانی ایرکنگ پہ وتی زهگاں کہ دوستیءِ نشانی اِنت، اهل‌سنت و شیعہ گوں وت برابری کن اَنت.
واجہءَ دیمءَ گوشت: حضرت علی و بی‌بی فاطمه رضی‌الله عنهما ءِ دوستی و آیانی زهگانی دوستی، بهرے چہ مئے ایمان اِنت. هما پیم کہ صحابہءِ محبت یک بهرے چہ مئے ایمان اِنت، اهل‌بیتءِ محبت هں مئے ایمانءِ کپے. ما را پهکاں پیغمبر و آئیءِ لوگی مردم چہ دلءَ دوست اَنت.
واجہ مولانا عبدالحمیدءَ پہ اهل‌سنتءِ فقهی مسایلءَ اے بارهءَ اشاره کت و گوشتی: بلکیں لهتے اهل بیتءِ بارهءَ ما را بے سدیءِ تهمتءَ بہ جنت، بلے هچبر ما بے سد نہ اِنت، بلکیں هرکسءَ یک فقه و مذهبے هست و همائیءِ مطابقءَ عمل کنت، ما را هں چہ وت یک فقه و مذهبے هست و آئیءِ مطابق و روشناییءَ عمل کن اِیں، لهتے کار کہ دگه مذهب و گروه کن اَنت ما را مطابق وتی فقهءَ باور نہ اَنت.
واجهءَ گوشت: اے کہ اهل‌سنت، پرس و پاتیاءِ دیوانءِ نگر انت و وتءَ سیاه پوش نکن اَنت، سببی ایش اِنت کہ اے چیزانءَ باور نہ دار اَنت و اهل‌سنتءِ فقہ اے چیزانی اجازتءَ ندات، انچو کہ پہ وتی نزّیکتریں مردمانی پاتیاءَ هں وتءَ سیاه‌پوش نکن اَنت. و هرکس وتی اعتقاد و باورءَ عمل کنت.
واجہءَ اختلاف و جتاییءِ جوڑ کنگ مسلمانانی در میانءَ سک اِیر جت و گوشتی: نباید مسلمانانی در میانءَ اختلاف و جتایی جوڑ کنگ بہ بیت. امیت واریں کہ مقدسات و ارزشانی حرمت و جاگاه حفظ کنگ بہ بنت و شیعه‌یاں وتی دیوانءَ انچو برجم بہ دار اَنت کہ دژمنانی لوٹ پوره مہ بنت.
مسلمانانی تپاکی و وحدت چہ اللهءِ حکمان اِنت
زاهدانءِ جمعهءِ پیشنمازءَ ماں دگہ بهرے چہ وتی گپاں «امت واحده»ءِ باسک کہ ماں دیوانءَ حاضر اِت اَنت، وش‌آتک کت اَنت و گوشتی: بلّی کہ امت واحده ءَ مرچی ماں جهانءَ گراک/ مشتری نیست اِنت، بلے مسلماناں باید پہ امت واحدهءَ دلگوش کن اَنت، پرچا کہ مسلمانانی تپاکی و براتی چہ اللهءِ حکمان اِنت.
جیل و زندانیانی قرآنی مسابقه وشّیں کارے
زاهدانءِ جمعہءِ پیشنمازءَ ماں دگہ بهرے چہ جمعهءِ وازّاں، زاهدانءِ زندانیانی قرآنی مسابقه و هال‌هالءِ گرگءَ یک شریں کارے زانت و گوشتی: چہ قرآن مجیدءِحفظ و قرائتءِ مسابقہ ماں زندانیانی در میانءَ ماں زاهدانءِ مرکزی زندانءَ باز گل بوتاں، شر اِنت کہ چہ زندانءِ کارمسترءَ شگر گزاری بہ بیت. اے کہ زندانی بہ توان اَنت کہ قرآن مجیدءَ گوں تجوید بوان اَنت و یاد بگر اَنت و وتی در میانءَ مسابقه و هال‌هال برجم دار اَنت باز وشیں کارے. ما پہ اِشاں دعا خیر کن اِیں.