مولانا گرگیج: انتظامی واکانی کار، نظمءُ امنیتءِ برجاه دارگ إنت

مولانا محمد حسین گرگیجءَ گوں اشاره په امنیتی نیروءُ واکانی تیرگواری ءَ که چنت نفر ءِ بیرانیءِ سوب بوتگ، گوشتی: امنیتی ءُ انتظامی واکاں مردمانی جانءُ مالءِ حفاظت کنوکءُ امنیتءِ برجاه داروک أنت.

په شیخ التفسیر مولانا محمد حسین گرگیجءِ هال رسانی سایتءِ هالکاریءَ واجهءَ ماں وتی (جمعه28شهریور1393)ءِ وعظاں پرمائینت: انتظامی نیرو ءُ واکاں  همے چاگردءِ چوک أنت ءُ انتظامی واکانی کار نظمءُ امنیتءِ برقراری إنت نباید کارے بکن أنت که بے نظمیءُ نا امنی بیاریت.  پیشی هپتگءَ  لهتے واکاں مردمانی نیمگءَ تیرگواری کرتگ که چه إے تبهکاریءَ یک بَزّگیں دکاں والائے بیراں بوتگءُ لوگءِ مردمانی ٹپّی بوتگ أنت.
مولانا گرگیجءَ پرمائینت: امنیتی واکاں باید اولءَ إے مردءِ بارهءَ پَٹءُ پول به کتیں رندءَ تیرگواری إش به کت إیں، اگاں یک جاهے یکے وت سریں کارے کنت ما نباید پهکانءَ وتی دشمن بزان إینءُ آیانی نیمگءَ تیراندازی بکن إیں.
دارالعلوم گالیکشءِ کارمستر، امنیتی واکانے که وت سرا تیرگواری إش کتگءُ إے  مردإش شهیدکتگ آیانی دیم گیریءِ لوٹوک بوتءُ گوشتی: امنیتی واکاں باید ماں وتی کاراں سک احتیاط به کن أنت، مسئولاں إے حادثه ءِ هرابکارانءَ قانونءُ رهبندءِ سرءَ برخورد به کن أنت.
واجهءَ گوشت اپسوز إنت که ماں بلوچستانءَ په 30لیتر گازائیلءَ ورنایانی سرا تیرگواری بیتءُ کشگ بنت، مسئولاں گیشتر وتی کارانی مواظب به بنت پچے که آ ملکءِ نگبهان أنت.
 امنیتی واکاں باید مردمانی جانءُ مالءِ محافظ به بنت نه إشی که سلیقهءُ وت سرا کار بکن أنت تا چو مبیت که چه إے ناحقیں کاراں پاٹءُ گَل جوڑ به بیت ءُ ملکءَ نا امن بکن أنت. امنیتی واکانی اصلی کار ملکءِ حفاظت چه دشمنان إنت نباید هرکسءَ که گند أنت تیرانی آماچی به کن أنت.
هوائی بمب گواری تروریسمءِ گار کنگءِ راه نه إنت
مولانا گرگیجءَ ماں دگه بهرے چه وتی گپاں په آمریکاءِ بمب گواری ماں لهتے اسلامی ملکاں په مبارزه گوں تروریسمءِ گارگنگءِ نیمونءَ گوشتی: آمریکاءُ رونندیاں مروچی لوٹ أنت که گوں بمب گواری ماں میاں رودراتکءَ گوں تروریسمءَ مبارزه به کنت  بلے إے بمب گواریاں تروریسمءَ نابود نه کن أنت  بلکیں تروریسمءَ گیش  کن أنت آیانی همے حرکت سبب بوتگ أنت که مرچی إے پیمیں گروپ جاه به جن أنت ءُ آیانی وتی جانءَ به کپ أنت.