اخلاص و پہکیں نیت ۲

’’عن ابی عبداللہ جابر بن عبداللہ الانصاری قال کنا مع النبی صلی اللہ علیہ وسلم فی غزاۃ فقال ان بالمدینۃ لرجالا ما سرتھم مسیراً و لاقطعتم وادیا الا کانوا معکم حبسھم المرض و فی روایۃ الا شارکوکم فی الاجر‘‘ (روایۃ مسلم، ریاض الصالحین)

حضرت جابر بن عبداللہؓ گُش ایت کہ ما یک جنگی سفرےءَ گوں حضرت محمدصلی اللہ علیہ وسلم ہمراہ اتیں یک جاہے واجہءَ فرمان کرت کہ مدینہ شریفءَ لہتے مردم ہست انت کہ ہمک برّتگیں راہے و سر گوازینتگ ایں شیپ یےءَ گوں شما ہورانت آیاںءَ بیماریءَ داشتگ اَت، دگہ روایتءِ تہا فرمان انت آماں اجر و ثوابءَ شمئے شریدارانت۔
بزاں آیانءَ آیانی نیکیں نیت و ارادہءِ برکتءَ ہما اجر رسیت کہ شمارا رسگی انت، و اے پیمیں اجر و ثوابءِ سبب ایش انت کہ اے مردمانی واہگ و ارادہ ہمے بوتگ کہ شمئے ہمراہ بہ بنت بلے بیماریءَ یا دگہ شرعی عذرءَ آیانءَ شمئے ہمراہیءَ نہ اشتگ انت بلے اجرءَ شمئے شریدار انت بزاں انچو کہ پہ شمئے اے عملءَ اللہ تبارک و تعالی شمارا اجردنت آیانءَ ہم انچوش اجر دنت پرچا کہ مومنءَ چہ آئی عملءَ ہما وہدءَ اللہ تعالیءِ رضاءِ ہمد پی اجر رسیت کہ آئی مقصد چہ اے کارءَ ایوک اللہ تعالیءِ خوشنودی بہ بیت و اگہ آئرا عذرے مہ بیت چہ اللہ تعالیءِ رضاءِ راہءَ و اللہءِ رضاءِ کارءَ ھچ چیزے آئرا مداریت بزاں اگہ سلامت انت گڑا اللہءِ حکماں سرجم بکنت اگر ملامت انت وتی دلءِ تہا ہمے خیالءَ بداریت کہ اگر من در راہ و وش بوتوں نوں مروچی ہما کارءَ کہ اللہ تعالیءِ نیکیں و خبر زورکیں بندہ کنگا انت من ہم ہما کار کرت و و تی دلءِ تہا اے تیاریءَ ہم بہ بیت کہ اگر من وش بباں چہ اے دست گٹّیءَ منی دست ہورک و حالی بہ بیت من اول وقتءَ اللہءِ راہءَ درکپاں اللہ تعالی انسانانی دلانی راز و حالاں زانت اگر کسے سر ظاہرءَ اللہءِ رضاءِ و وشنودیءِ راہءَ اِنت بلے نیت اے نہ انت کہ من خاص وتی پروردگارءِ راضی کنگءِ حاطرءَ اے کارءَ کناں گڑا آئرا چہ اے عملءَ اجر و ثواب نہ رسیت، آئرا ثوابے بدلءَ گناہ رسیت گڑا بایدانت کہ مسلمان وتی عملءَ بزانت و بکنت، اللہ تعالیءِ وشنودی آسان ترین کارانت مردمءَ باید انت کہ آسان ترینءَ پہ گرانین بدل مکنت، اللہءِ مہربانیءِ حال و بوداش انت کہ مردم ہنچو کہ اللہءِ رضاءِ حاطرءَ یک کارےءِ نیتءَ کنت آئرا اجر و ثواب رسگ شروع بیت و وہدیکہ مردم ہما کارءَ کنت اللہ تعالی آمردمءَ آئی کرتگیں کارءِ دہ سری اجر دنت، بلے اگہ مردم یک کارے کنت تا کہ آئی پیمیں مردمے چہ آئی کرتگیں کارءِ دہ سری اجر دنت، بلے اگہ مردم یک کارے کنت تا کہ آئی پیمیں مردمے چہ آئی راضی بہ بیت گڑا باز زبرءَ بوتگ کہ مردم چہ اے کرتگیں کارءَ راضی بوگءِ بدلءَ گیشتر ناراض بوتگ گڑا ہمیش انت کہ انسان وتی کارءَ بزانت و وتی کارءِ میدانءَ ہم بزانت انسانءِ کار اللہءِ رضائے حاطرءَ آئیءِ حکمانی پورہ کنگ انت و آئی کارءِ میدان اسلام انت و قرآن و سنت انت۔

سرچمّگ: راستیں راہ