مولانا عبدالحميد: نادلگوشي په اصلاح وهدايتءَ، جامعه و چاگردءِ مرگءِ نشاني إنت

زاهدانءِ اهلسنتءِ جمعهءِ پيشنمازءَ إے هپتگءِ جمعهءِ (4 بهمن 1392 /24  جنوری 2014)ءِ گپاں گوں إے آيتءِ وانگءَ «وَالْمُؤْمِنُونَ وَالْمُؤْمِنَاتُ بَعْضُهُمْ أَوْلِيَاء بَعْضٍ يَأْمُرُونَ بِالْمَعْرُوفِ وَيَنْهَوْنَ عَنِ الْمُنكَرِ وَيُقِيمُونَ الصَّلاَةَ وَيُؤْتُونَ الزَّكَاةَ وَيُطِيعُونَ اللّهَ وَرَسُولَهُ أُوْلَئِكَ سَيَرْحَمُهُمُ اللّهُ إِنَّ اللّهَ عَزِيزٌ حَكِيمٌ» [توبه: 71] بنگيج كت و پرمائينتي: دين مبين اسلامءَ هريكے چه اسلامي چاگردءِ مردماں اولسرءَ په وتي اصلاحءُ تزكيهءُ رندءَ په إے دگه مردماني اصلاح كنگءَ پرمان داتگ.

مولانا عبدالحميدءَ پرمائينت: اسلام يك هم جهاني ئیں دينے هست إنت. اسلام په يك خاصيں ملكءُ قومےءَ نياتكگ، بلكيں په جهانءِ سرجميں مردماں آتكگ. رسول الله صلي الله عليه وسلم تا قيامتءَ خداءِ برحقيں پيغمبرإنتءُ پهكيں نبيّاں آئيءِ امتي أنت.
واجهءَ ديمءَ په فكركنگ انساني جامعهءِ اصلاحءِ بارهءَ تاكيدكتءُ پرمائينتي: گوں اپسوزيءَ مرچي هيالءُ فكراں، انساناني هدايتءُ اصلاحءِ‌ بارهءَ محدودبوتگ أنت. مسلماناں په سوداگريءُ دنيايي نپءُ سوتءَ، چين، جاپان، أمريكاءُ إے دگه ملكاں گولاينت بلے دينءُ آخرتءِ واستا چوشيں كارے نكن أنت. پمشا فسادءُ ناشريءُ غفلت عام بوتگءُ گناهءُ معصيت روچ په روچءَ گيشتر بوان إنت. ماں جاورے كه ما مسلمانانی يك په يكءِ زمه واری هست كه وتي جرندءُ لوگءِ مردمءُ سياداني اصلاحءُ بچگءَ فكرے بزورإيں. مئي زمه واری إنت كه وهدے ما منكرءُ رديں كارے ديت چه آئيءِ گوَرءَ په بے پرواهيءُ بے سدي مگوزإيں، بلكيں په وتي وسءَ آئيءَ اصلاح بكنيںءُ اگاں إشيءَ نتوانيں، گڑا په آ منكرءِ گاربوگءَ دعا بلوٹيں.
زاهدانءِ اهلسنتءِ جمعهءِ پيشنمازءَ گوشت: گناهءُ معاصي چوشكه زنا، دزي، ظلمءُ كشتار ماں مروچيگيں چاگردءَ سكّ بازإنت. آیانے كه گناه كن أنت ايوكءَ وتءَ زلرءُ نُقص ندينت، بلكيں چاگردءِ پهكيں مردماں نقصان دينت. هماوڑءَ كه قرانءِ وانگءُ عبادت، اللهءِ‌ رحمتاني إيرآيگءِ سوب بنت، منكراتءُ گناهاں هں اللهءِ هژمءُ غضبءَ پادكن أنتءُ چاگردءَ خراب كن أنت.
مولانا عبدالحميدءَ پرمائينت: چاگردءِ اصلاحءُ هدايت كنگ، تهنا عالمءُ تبليغياني سرءَ نه إنت، بلكيں كماشءُ ذمه دارانءُ لوگءِ واجه په وتي وسءَ ذمه واری إش هست كه جامعهءِ اصلاحءِ بارهءَ گامے بزورأنت. نادلگوشي په اصلاحءُ هدايتءَ، چاگردءِ مرگءِ نشاني إنت. گڑا منكراني ديمءَ گرگءُ په چاگردءِ اصلاحءَ فكرے زورگ سك لازمءُ هژدري إنت.
زاهدانءِ اهلسنتءِ جمعهءِ پيشنمازءَ حضرت لقمانءِ سوج په وتي زهگءَ ديمءَ آرت ءُ پرمائينتي: لقمان حكيم وتي چكّءَ پنت داتءُ پرمائينتي: «يَا بُنَيَّ لَا تُشْرِكْ بِاللَّهِ إِنَّ الشِّرْكَ لَظُلْمٌ عَظِيمٌ» لقمانءِ اولي پنت په آئی چكّءَ إيش أت كه گوں خدا دگه كسےءَ شريك مكنت، پچے كه هچ گناهے چه شركءَ مزنتر نه إنت.
واجهءَ “نمازءِ وانگ”ءُ ” امربه معروفءُ نهي چه منكر”ءَ يك دگه پنتے چه لقمانءِ پنتاں زانتءُ پرمائينتي: حضرت لقمان حكيمءَ وتي چكّءَ گوشت: «يَا بُنَيَّ أَقِمِ الصَّلَاةَ وَأْمُرْ بِالْمَعْرُوفِ وَانْهَ عَنِ الْمُنكَرِ وَاصْبِرْ عَلَى مَا أَصَابَكَ إِنَّ ذَلِكَ مِنْ عَزْمِ الْأُمُورِ» لقمان رند چه توحيدءُ نمازءَ، وتي چكّ په امر به معروفءُ نهي چه منكرءَ پنت دات.
زاهدانءِ اهلسنتءِ جمعهءِ پيشنمازءَ ماں إے بهرءِ آسرءَ چه وتي گپاں گوں إے آيتءِ وانگءَ «وَالْمُؤْمِنُونَ وَالْمُؤْمِنَاتُ بَعْضُهُمْ أَوْلِيَاء بَعْضٍ يَأْمُرُونَ بِالْمَعْرُوفِ وَيَنْهَوْنَ عَنِ الْمُنكَرِ وَيُقِيمُونَ الصَّلاَةَ وَيُؤْتُونَ الزَّكَاةَ وَيُطِيعُونَ اللّهَ وَرَسُولَهُ أُوْلَئِكَ سَيَرْحَمُهُمُ اللّهُ إِنَّ اللّهَ عَزِيزٌ حَكِيمٌ» [توبه: 71] دلگوش كنگ په امر به معروفءُ نهي چه منكرءَ تاكيد كتءُ إے كاري انساناني دنياءُ آخرتءِ كاميابي زانت.
مولانا عبدالحميدءَ ماں دگه بهرے چه وتي گپاں په “آريل شارون”ءِ مرکءَ اشاره كتءُ آئيءَ “تاريخءِ ناشركار” نامي داتءُ آئيءِ سكراتءِ دراج كش بوگءَ په إے دگه زوران سرءُ ناشراں عبرتے زانت.
واجهءَ ماں وتي گپاني آسرءَ په “تپاكيءِ هپتگ”ءِ گوزگءَ اشاره كت ءُ پرمائينتي: ماں إے گوستگيں روچاں بازيں محفلے په پيغمبرءِ سيرتءُ زندءِ چارگءُ دلگوش كنگءَ برجم دارگ بوت. ما بايد مدام مهترءِ سيرتءَ بوان إينءُ آئيءِ سنتاں وتي زندگيءِ توكا بيارإيں. مرچاں اسلامي امت بازيں أڑءُ جیڑهانی آماچ إنتءُ إشيءِ سوَب دوربوگ چه قرآنءُ سنت إنت. اگاں اسلامي امت شريعتءِ كشكءِ سرءَ بيئتءُ په قرآنءُ سنتءَ عمل بكنت گڑا نگبهتءُ كاميابءَ بيت.