انسانءِ ارزش په آئيءِ ايمان، تقواءُ خداترسيءِ اندازه إنت

شيخ الإسلام مولانا عبدالحميدءَ په نفسءِ اصلاحءَ تأكيد كتءُ انسانءِ ارزشي ماں ايمانءُ تقواءُ خداترسيءَ جاه آرت.

زاهدانءِ اهلسنتءِ جمعهءِ پيشنمازءَ ماں جمعهءِ گپاں(6/ديماه/ 1392)ءَ پرمائينت: مهتر رسول اللهءَ ارشاد پرمائينتگ: «الناس معادن كمعادن الذهب والفضة خيارهم في الجاهلية خيارهم في الإسلام إذا فقهوا» پهكيں مردماں معدن أنت؛ هر راجءُ قومے يك معدنے شمار بيت.
قبيلهءُ ٹولياں وڑوڑيں معدن أنت؛ بلے اختلاف بس طلاهءُ نقرهءِ اندازه إنت. چه لهتے معدنءَ طلاه در كنگ بيت ءُ چه لهتے نقره، البت هر دوئيں نقد أنت ءُ حديثءِ بزانت هں همش إنت كه چه دراهيں مخلوقات، انساناں نقد أنت. مهتر رسولءَ  انسان په دگه معدنے چوشكه مسءُ آسنءَ تشبيه نكت، بلكيں بس په طلاهءُ نقره تشبيه كت. پَدّر بيت كه انسان چه إے دگه موجوداتءَ گيشتر ارزش داريت.
واجه ماں إے حديثءِ گيشءُ گيوارءَ پرمائينت: دلگوش كرزيں گپ إشنت وهدے كه طلاهءَ چه معدنءَ در كن أنت آ شمش نهنت، بلكيں بايدإنت ماں كوره ءَ آپ كنگ ببيت تا كه ڈوكءُ هاك چه آئيءَ جدا ببنت. همے پيمءَ انسان وهدے كه چه ماتءَ بيت خالصءُ زگر نه إنت ، بلكيں بايدإنت تزكيهءُ اصلاح ببيت تا كه رديں اخلاق چه آئيءِ وجودءَ در ببنتءُ ناخالصياني دور كنگ ببنت.
 واجهءَ ديمءَ پرمائينت: انسان خداءِ گورءَ همينچو ارزش داريت كه چه پرشتگاں دوستناكترإنت.
 خداءَ انسان كرامتءُ مزن شاني بكشايتگ. مومنيں انساناں چه پرشتگاں دوستناكترأنتءُ خاصيں بندگاں چه خاصيں پرشتگاں دوستناكترأنت. مهتر محمدءُ إے دگه نبياني جاگه چه مقربيں پرشتگاں برزترإنت.
زاهدانءِ اهلسنتءِ جمعهءِ پيشنمازءَ پرمائينت: زمينءِ سرءَ انسانانے هست أنت كه اللهءِ گورءَ دوستناكءُ نزيك أنتءُ لهتے دگه انسان هست كه خداءِ گورءَ چه حيوانءَ هں بدتر أنت .
انسانءِ ارزش په آئيءِ ايمان، تقواءُ خداترسيءِ اندازه إنت.
دارالعلوم زاهدانءِ مديرءَ ماں إے بهرءِ گپاني آسرءَ گوں إے گپءِ بيان كنگءَ « هچ يكے چه شريعتءِ پرماناں چه حكمتءَ خاليگ نه إنت» پهكاني په شريعتءِ تابعداريءَ توصيه كتءُ پرمائينتي:  هچ يكے چه شريعتءِ پرماناں چه حكمتءَ خاليگ نه إنت، اگاں چه حكمتءَ خاليگ ببوتين أنت ما پدا هں اطاعت كتگ أت بلے درستاں حكمت دار أنت. عمل كنگ په شريعتءِ پرماناں انسانءَ گوں خداءَ نزيك كنت ، بلے گناهءُ معصيت انسانءِ ارزشءَ گار كنت.

ذمه داراني آيگ په سيستانءُ بلوچستانءَ، دولتءِ خاصيں دلگوشي په إے استان إنت
مولانا عبدالحميدءَ ماں بهرے چه وتي گپاں ماں جمعهءِ نماز په ملكءِ ذمه داراني آيگ په استان سيستانءُ بلوچستانءَ اشاره كتءُ إے چيزي دولتءِ خاصيں دلگوشي ماں إے استانءَ زانت.
زاهدانءِ اهلسنتءِ جمعهءِ پيشنمازءَ پرمائينت: گوستگيں هپتگءَ ملكءِ بازيں ذمه دار منجمله ڈاكٹرنوبختءُ همے پيمءَ حجت الاسلام يونسي، راجكماشءِ خاصيں دستيارماں راجءُ مذهباني امورءَءُ دگه لهتے عزيزيں ذمه دار په سيستانءُ‌بلوچستانءَ آتك أنت كه إشاں پهكاں تدبيرءُ اميتءِ خاصيں دلگوشي په استان إنت.
واجهءَ ديمءَ گوشت: لهتے استان كه پيسرءَ محروم بوتگ أنت، هنو چه سيريں استانان أنت؛ بلے سيتانءُ‌بلوچستان انگتءَ چه زبهريں استانان إنت په إے علتءَ كه چه صنعتءُ كارجاهاں بے بهرإنت.
مولاناعبدالحميدءَ په لهتے چيريں استعداداں اشاره كتءُ‌پرمائينتي: سيستانءُ بلوچستانءِ استانءَ چيريں استعداد هست كه اگر كارگرگ ببنتءُ مسئولاں گيشتر دلگوش بكن أنت گڑا إے استان زوت ديمروي كنتءُ حني توانيت ملكءِ مركزببيت.
واجهءَ پرمائينت: انساني واكءُ كاربلديں مردماں چه إے استانءِ مزنيں استعدادان أنت كه اگاں په آياں دلگوش كنگ ببيت استانءَ تبديل كت كن أنت.
شيخ الاسلامءَ ديمءَ ” روحانيءِ گيشتر دلگوش ديگ”ءُ “سفر په استان سيستانءُ بلوچستان”ءَ لوٹوك بوتءُ پرمائينتي: هما پيمءَ كه شما چه دولتءِ‌ دلگوش ديگ په إے استانءَ سهيگ إت مئي واهگ همش إنت كه گيشتر دلگوش بكنتءُ همے زوتاں إے استانءَ بيئيت.
واجهءَ إے استانءِ مردماںءُ اهلسنتءِ بارهءَ پرمائينت: إے استانءِ مردماںءُ اهلسنت راستينءُ براتيءِ راهءِ سرءَ أنتءُ چه افراطءُ شدتءَ دورأنت.
مولانا عبدالحميدءَ ماں آسرءَ پرمائينت: ايرانءِ مردم شيع ببنت يا سني بايدإنت چه ترندرويءُ افراطءَ دوري بكن أنتءُ په ملكءِ آباتيءُ سرسبزيءَ گوں يكادگرءَ تپاك ببنتءُ دلگوش بكن أنت كه دورچاريءُ سعه صدر چه فهيميں راجءُ قوماني خصوصيتان إنت.