“غفلت” اصلی سوب په انسانانی جراتءُ مان میاتکی په گناه إنت

شیخ الاسلام مولانا عبدالحمیدءَ گوں وتی پریشانیءِ درشاں کنگ چه گناهءِ بازبوگ ماں اسلامی ملکاں، غفلتءَ اصلی سوب په گناهءِ انجام دیگءَ زانتی.

زاهدانءِ اهلسنتءِ جمعهءِ پیشنمازءَ ماں جمعهءِ نمازءِ گپاں (29-آذرماه- 1392)ءَ رند چه إے آیهءِ وانگءَ« وما هذه الحیوة الدنیا الا لهو ولعب وان الدارالآخرة لهی الحیوان لو کانوا یعلمون» پرمائینتی: مروچاں غفلتءِ نادراهی ماں چاگردءَ عام ترّإتگءُ عامءُ خاص ماں آئیءَ گرفتارأنت. غفلت إشنت که انساں په وظایف، ذمه داریاں، پیمانءُ آکاراں که آئیءَ انجام دیگیگ أنت دلگوش مکنت. چه غفلتءَ مراد إشنت که انسان چه آراهے که آئیءِ دیماإنتءُ چه إشی که بهشتءَ روت یا جهندمءَ نادلگوش ببیتءُ چه محشرءِ حسابءُ کتابءَ شوشکارببیت.
یکے چه غفلتءِ نشانیاں إشنت که مردم اللهءِ یادءَ مبیت.
دارالعلوم زاهدانءِ مدیرءَ پرمائینت: فکرکنگ په دنیاءِ زندگی، غفلتءَ پیداگ کنت. مئی پهکیں همءُ غم دنیاإنت حتی وهدے که مسیتءَ مان بیئں ءُ په نمازءَ اوشت إیں اودءَ هں دنیاءِ کارءُ مسایل مئی یادءَ کاینت.
واجهءَ دیمءَ گوشت: اسلام نگوشیت که شما دنیاءَ یله بکن إتءُ بس په آجهانءَ فکر بکن إت، بلکیں اسلامءِ گپ اشنت که شما وتی دنیاءَ بجوڑین إتءُ آجهانءَ هں آباد بکن إت.
الله تعالیءَ إے واکءُ هاٹیگ انساناں داتگ که وتی دیاءُ آخرتءَ هور آبادبکن أنت.
اگاں مسلماناں دنیائی علومءِ وانگءِ گورءَ بهربزورأنت گڑا توان أنت که وتی دوئیں جهانءَ بجوڑین أنتءُ آبادبکن أنت.
زاهدانءِ اهلسنتءِ جمعهءِ پیشنمازءَ ماں وتی گپانی اولی بهرءِ آسرءَ اللهءِ رضایتءَ مزنتریں نگبهتی جاه آرتءُ گوں إے آیهءِ وانگءَ« الا بذکراللهءِ تطمئن القلوب» خداءِ یادءَ دلانی آرامشءِ سوب زانتءُ درستانی په دوری چه غفلت، اللهءِ پرمانانی انجام دیگ، کاملیں تابعداری چه مهتر رسول اللهءِ سنتاں ءُ قرآنءِ یادگرگءُ پایبندی په نمازءَ تاکید کت.

ملکءِ مردم گوں هر ناامنیءُ شدتءَ مخالف أنت
مولانا عبدالحمیدءَ ماں وتی جمعهءِ گپانی گڈی بهرءَ گوں اشاره په سئے مرزدارءِ شهیدبوگءَ ماں سراوانءِ سیمسرءَ پرمائینتی: ماں گوستگیں هپتگءَ سئے نفر چه پلیں مرزداراں که ماں سیمسری نوارءَ روا کنگاإتنت گوں بَـمباری إے دوچارکپت أنتءُ شهیدانی کاروانءَ هواربوت أنت.
زاهدانءِ اهلسنتءِ جمعهءِ پیشنمازءَ گوں إے کارءِ محکوم کنگءُ ردگوشگءَ پرمائینتی: مئی جار همش إنت که إے ملکءِ مردم چه دینی زانتکاراں، کماشاں، وانوگرءُ هریکے چه إے مردماں شدتءَ ردکن أنتءُ گوں هر ناامنیءَ سک مخالف أنت.
واجهءَ تاکید کت: منطقهءِ پهکیں مردم آرامشءُ امنیتءِ لوٹوک أنتءُ براتیءُ تپاکیءِ رندءَ أنتءُ په استانءِ دیمرویءُ آبادیءَ جهد کنگاأنت.
الحمدلله هنو گوں تدبیرءُ امیتءِ دولتءِ سرکارآیگءَ مئی استان دیم په آبادیءُ توسعهءَ گام جنان إنت.
مولانا عبدالحمیدءَ دیمءَ پرمائینت: خداءِ شگرإنت نوکیں سرکاراں لوٹ أنت که گوں شورءُ مردمداریءُ گوں مردمانی همکوپگیءَ استانءَ آباد بکن أنت.
پمشا ماں إے پیمیں جاوراں مارا گیش چه پیشءَ په امنیتءُ آرامیءَ نیاز هست.
مئی امیت همش إنت که خداوند هر وڑیں  ملکیءُ درملکی ناامنیاں بُنسوچ بکنت.
 زاهدانءِ اهلسنتءِ جمعهءِ پیشنمازءَ ماں آسرءَ پرمائینت: ما په استانءِ دیمی حالاں باز امیدوارإیںءُ مئی دعا همش إنت که إے استان آبادترءُ سبزتربباتءُ مئی آزاتیءُ براتی گیشتر ببات.